Wãrãda ĩjã ɓʉ cawaya Ãcõrẽ

¿Bʉa cawa ɓʉ Abrahaʉ̃ warra casa trʉ̃bada? Idji trʉ̃ Isa. Abrahaʉ̃ba idjía jaradiasida bio quĩrĩãi carea Jeowara idjaɓa idji beɗeara. Isaba 25 poa eroɓasiɗe, Jeowaba Abrahaʉ̃a iwiɗisida ne zarea ɓʉra oida ɓʉa.¿Cãrẽ jarasi Jeowaba?

Ãcõrẽba Abrahaʉ̃a jarasida: “Quĩrã djuburiadua. Eya ʉtʉ nũmʉmaa diaɗe wãdua bʉ warra aɓabe ɓʉda”. Maʉ̃ bʉrʉ Moria puruɗe wãsiɗada. Cawaẽ́ ɓasimĩna, cãrẽã Jeowaba jãʉ̃ra jarasida, idjia ĩjãsida Jeowa beɗea.

Nũrema diapeɗeɗa, Abrahaʉ̃ra, Isa, nezocarã umé wãsiɗada Moria puruɗea. ¿Jũmasã ewari wãsiɗada? Ewari ũbea wãsiɗada. Maʉ̃ne eyada unusiɗada. Abrahaʉ̃ba idji nezocarãa jarasida: “Mãrãra nama panenida. Mʉ̃ra mʉ̃ warrame jãma wãida animarã diai carea Jeowa”. Abrahaʉ̃ba neco zaqueda waga eroɓasida idjaɓa idji warra jarasida tʉbʉ uruaɗe ede wãi carea. Dji warraba idisida dji tataa: “¿sãma ɓʉɗa animarã bá diabueɗi carea?” Dji zezeba jarasia: “Necai ɓadua. Jeowaba diaya”.

Eya ʉtʉ jũẽnapeɗa, animarã bá ɓaɗamae osida. Mãʉ̃be Abrahaʉ̃ba Isara jʉ̃caraba jʉ̃sida dji jʉwa jĩrũ siɗa, idjaɓa jarasida nama ta ɓeida.

Abrahaʉ̃ba necoda jidasida dji warra beai carea. Maʉ̃ne bajãnebema nezocarãba jarasia: “¡Abrahaʉ̃! ¡Jãwã orãdua! Mʉ̃a cawa ɓʉa bʉa wãrãda Ãcõrẽrã ĩjã ɓʉa, bʉ warra mʉ̃́a dia quĩrĩã ɓaɗa bẽrã”. Maʉ̃ne Abrahaʉ̃ba jẽda acʉbʉrʉɗe, chiwatu umaquĩrã unusia. Bacuru jʉwateɗe dji cachura jũẽ nũmesia. Mãʉ̃ carea, oveja jidapeɗa beasida. Mãʉ̃be dji warra beaẽ́ basída.

Jãʉ̃ ewariɗe Jeowaba jarasida: “Abrahaʉ̃ra wãrãda mʉ dji bia” ¿Cãrẽã Jeowaba jãʉ̃ra jarasida? Abrahaʉ̃ba Jeowaba jarapeɗa jũma ĩjãsida, adua ɓasimĩna.

Jeowaba wãya quĩrãnebasida idjia Abrahaʉ̃a jaraɗara: “Mʉ̃a bʉ́a carebaya idjaɓa bʉa warrarã zocãrã eroɓaida”. Jãʉ̃ beɗea jara quĩrĩã ɓʉda Abrahaʉ̃ warraɗeba Jeowaba zocãrã ne biada diaya ẽberãrã sobia.