Cadjirua mãwãsira Carmelo eyaɗe

Dji bororã die puruda o tribu Israelɗebemara bio cadjirua panasiɗada. Baribʉrʉ aɓa ɓasida dji boro trʉ̃ jarabada Acabo. Jãʉ̃gʉra bio cadjiruara ɓasida dewararã boro cãyãbara. Acabora mĩã cãĩsida wẽrã bio cadjirua ɓʉme, trʉ̃ jarabada Jezabel idjaɓa idjia dji idibadjiɗa dji ãcõrẽ Baal. Acabo Jezabel, ãdjirã dji idibibadjiɗada ẽberãrã zocãrã Baal idjaɓa quenasiɗada zocãrã dji propetarã Jeowaɗera. ¿Cãrẽda osida Jeowaba? Diabuesida Acabora Elíaba jaramãrẽã Jeowaba jaraɗada.

Maʉ̃ bʉrʉ Elíaba jarasida Acaboa: “Cue zeẽ́da Israelɗe. ¿Cãrẽã? Bʉra dji boro bio cadjirua bẽrã cue zeẽ́ basida poa ũbea idjaɓa ne uɗara wariẽ́ basida jãʉ̃ ẽjũãne. Jãʉ̃da mãwãna bẽrã maʉ̃bebʉrʉ ẽberãrã bio jarra panasiɗada”. Mãwãnacarea Jeowaba diabuesida wãyã Elíara beɗeamãrẽã dji boro Acabome. Dji boro Acaboba jarasida: “Bʉa aɓabe ɓebarida beɗea dromane”. Elíaba panusia: “Jãʉ̃ra mʉ̃ cuentaẽ́da naʉ̃ cue zeẽ́ ɓʉra. Bʉra dji boro bio cadjirua ãcõrẽ Baal dji idibari bẽrã”. Elíaba panusia: “Cawai carea ãbaa jʉredua ẽberãrãda Carmelo eya quẽbʉɗe”.

Puruɗebemarã ãbaa jʉresiɗada eyaɗe. Jãma Elíaba jarasida: “Jeowada wãrã arada Ãcõrẽda ɓʉra, mãrãba ẽpẽnadua. Baribʉrʉ Baalda wãrãda Ãcõrẽ baibʉrʉ ẽpẽnadua. Maʉ̃ carea oɗida”. Ara maʉ̃da dji propetarã Baalɗe, 450 dji propetarãba ne edaɗapeɗa wãsiɗada ãdji ãcõrẽ Baal carea. Elíaba panusida: “Mʉ̃a biɗa oya idjaɓa ne ɓapeɗa ɓʉida maʉ̃bebʉrʉ trʉ̃ida mʉ̃ Ãcõrẽ Jeowada”. Puruba ĩjãsida.

Mãwãbʉrʉ dji propeta Baalɗeba ara maʉ̃da osiɗada. Dji propetarã ewari entero dji idisiɗada. Jarasiɗada: “¡Ay Baal, carebadua daira! ¡Ũrĩdua daiba idi panʉra!” Elía idjira bio ipiɗasida, Baalba panuẽ́ ɓaɗa bẽrã. Maʉ̃nebʉrʉ jarasida dji propetarãa: “¡Jĩgua ɓiaɗadua ũrĩnamãrẽã!” Mãwãbʉrʉ dji propetarã Baalɗeba mãsa trʉ̃ jarasiɗada baribʉrʉ panuẽ́ basida.

Elíaba ne ɓapeɗa ɓʉsida. Maʉ̃gʉda ʉ̃rʉ̃ baidoda weasida. Maʉ̃bebʉrʉ idjira dji idisida: “Ay Jeowa, puruba ununamãrẽã bʉra wãrã arada Ãcõrẽ arada”. Ara maʉ̃da Jeowaba bajãneba diabuesida tʉbʉ uruada babuei carea. Ẽberãrãba jarasiɗada: “Jeowa, bʉ trʉ̃ wãrã arada Ãcõrẽ arada”. Elíaba jarasida: “Ẽdrʉbirãnadua ni aɓaʉ propeta Baalɗebemara. Quenanadua 450 propetarã Baalɗera”.

Mãwãnacarea unusida jʉ̃rãrãda pusa ʉ̃rʉ̃. Mãwãbʉrʉ Elíaba jarasida Acaboa: “Acʉdua awua zebʉrʉda bajãne jʉ̃rãrãda. Wãdua bʉdji cawayo edapeɗa bʉdji deɗaa”. Ara maʉ̃da unusida bajãra jʉrãrãba pãĩsosua nũmesida. Idjaɓa bio zarea zesida nãũrãra. Idjaɓa bio zarea cue zesida. Mãwãbʉrʉ ẽjũã põãsa nũmanara jõsida. Ara maʉ̃da idji cawayo edapeɗa atewa wãsida. Baribʉrʉ Elíara carebasida Jeowaba, mãwãbʉrʉ ʉɓʉara wãsida. Baribʉrʉ ¿beɗea droma Elíaɗera jõsida? Maʉ̃ carea acʉɗida jãʉ̃ra.