Jeowaba Elíara ʉɓʉada diasida

Jezabelba cawasida cãrẽda mãwãsiɗada dji propetarã Baalɗera. Maʉ̃ bʉrʉ idjira bio quĩrũsida. Maʉ̃ bʉrʉ jarabisida Elíaa: “Nu bʉra beaɗida aɓarica beaɗida propetarã Baalɗe quĩrãca”. Elíaba jãʉ̃gʉ ũrĩsiɗe bio perasida idjira. Maʉ̃ bʉrʉ mĩrũ wãsida jeweɗaɗe. Maʉ̃bebʉrʉ jãma dji idisida: “Ay Jeowa mʉ̃a droaẽ́a. Beui quĩrĩã ɓʉa mʉ̃ra”. Sẽ baera maʉ̃ bʉrʉ cãĩ ɓesida bacuru erica.

Maʉ̃ne angel Jeowaɗeba beɗeaɗe wãsida. Ibiya jãʉ̃ beɗeara jĩgua beɗeaẽ́ basida, jarasida: “Elía piradrʉdua ne comãrẽã”. Maʉ̃ne unusida Elíaba paʉ̃da mõgara ʉ̃rʉ̃ idjaɓa unusida zocoɗe baidoda. Wãyã cãĩ ɓesida. Angelba wãya trʉ̃ jaraɗe wãsida ʉ̃rʉ̃mamãrẽã: “Codua, bʉra tʉmʉ wãi bẽrã”. Elíara mãsa ne cosida. Mãwãnacarea wãsida 40 ewari idjaɓa 40 dimisi, jũẽne wãsida Horeb eyaɗaa. Jãma eɗa wãsida eya nendeɗe cãĩne. Maʉ̃ne Jeowaba beɗeasida: “¿Cãrẽda jãma o ɓʉ Elía?” Eliaba panusia: “Israelitarãba ĩjãnaẽ́ panʉda bʉa jaraɗara. Jũma ãrĩsiɗada ɓʉɗe ɓaɗara dji propetarãba. Maʉ̃ bʉrʉ mʉ̃́ siɗa beaɗa quĩrĩã panʉda”.

Jeowaba jarasida Elíaa: “Ẽdrʉdua. Nũmedua naʉ̃ eyaɗe”. Mãwãnacarea jãrãpuasida nãũrãra bio zarea ɓʉda. Mãwãnacarea zesida de uremiada idjaɓa tʉbʉ urua. Maʉ̃ne ũrĩsida beɗea jĩgua ibiya beɗea quiruda. Ara maʉ̃da idjira quĩrã ãnẽ ɓari basida wuaba. Nũmesida jãma nendeɗe ãĩ zepeɗa. Jeowaba idisida: “¿Cãrẽa bʉra mĩrũ wãya ɓʉ?” Eliaba panusida: “Mʉ̃drʉ aɓabe ɓʉa propeta”. Baribʉrʉ Jeowaba panusia: “Bʉduɓa ɓʉẽ́a. Waɗi panʉa 7.000 ẽberãrã Israelɗebema idibada mʉ̃́a. Wãdua jaraɗe Eliseoa: Bʉra jʉrʉ edaɗada propeta ɓamãrẽã”. Ara maʉ̃da Elíaba osida Jeowaba jaraɗara. ¿Bʉa ĩjãibʉrʉ Jeowaɗeda, bʉ́ra carebaida idjia? Mae, mãwãda. Ara maʉ̃da cawaɗia jãʉ̃ ewari põãsa nũmasiɗe, ¿cãrẽda mãwãsida?