Jesu do ʉ̃rʉ̃ baribodosia

Jesuba poya biabicuasida cacua biẽ́ ɓearã idjaɓa ʉ̃rẽbabisida quininara. Mãsa poya tau ɓesida nãũrãra idjaɓa cuesiɗa. Mãwãnacarea wãsida eyada, dji idi carea. Jesuba eɗa acʉsida pusa Galileaɗa. Jãma unusida bio nãũrãra zarea ɓʉda. Dji nĩbabadarãa djuburia panasiɗada jãba waiɓʉaɗe nãũrã bio zarea ɓaɗa bẽrã. Maʉ̃ne Jesura baribodosida pusa ʉ̃rʉ̃. Dji nĩbabadarãba unusiɗada pusa ʉ̃rʉ̃ nĩmida Jesura, maʉ̃ bʉrʉ ãdjirãra bio dauperasiɗada. Baribʉrʉ Jesuba jarasia: “Mʉ̃ra Jesuda. Dauperarãnadua”.

Pedroba jarasia: “Mʉ̃ boro, bʉda jãwã ɓʉbʉrʉ bʉa mʉ́ra wãbidua bʉmaa”. Jesuba ara maʉ̃da jarasida: “Zedua”. Ara maʉ̃da Pedrora jãbaɗeba eɗa ɓadosida. Wãsida pusa ʉ̃rʉ̃ Jesumaa. Baribʉrʉ Pedrora Jesu caita jũẽbʉrʉɗe, maʉ̃ne acʉsida nãũrã zareada. Idjira perasida. Ara maʉ̃da tabʉrʉ quĩrãcasida. Maʉ̃ bʉrʉ jĩgua ɓiasida: “¡Mʉ̃ boro, ẽdrʉ edada mʉ́ra!”. Jesuba jʉwaɗe jidapeɗa jarasi: “¿Cãrẽ cãrẽã bʉa ĩjãẽ́ ɓʉda? ¿Mãẽteara ĩjãẽ́ ɓʉca?”.

Wãya Jesura Pedrome jãbadaa ɓadosiɗaa. Ara maʉ̃da nãũrã pichi nũmesida. Quĩchadua, ¿sãwã sentisiɗada dji nĩbabadarãra? Ãdjirãba jarasiɗada: “Wãrãda bʉra Ãcõrẽ warra”.

Aɓabe jãwã oẽ́ ɓasida jãʉ̃gʉdrʉ maʉ̃ cãyãbara ne quĩrãtanoa osia. Dewara ewariɗe Jesura idjaɓa dji nĩbabadarã wãbʉda basida jãba waiɓʉaɗe maʉ̃ne cãĩ ɓesida Jesura, cãĩ nũmʉmisa ara maʉ̃da bio zarea zesida nãũrã. Dji bogozoa siɗa jãba orroɗea ɓae nũmesida maʉ̃ bʉrʉ birasida baidora jãbara. Dji nĩbabadarãba Jesura ʉ̃rʉ̃manapeɗa jĩgua: “¡Jesu, dai boro dadjirãra joga quininia! ¡Carebadua!”. Jesura piradrʉpeɗa jarasida: “¡Pusa,necai ɓadua! ¡Piqui ɓadua!”. Ara maʉ̃da nãũrã idjaɓa pusa siɗa necai nũmesida. Maʉ̃ carea Jesuba idisida dji nĩbabadarãa: “¿Mãrãba ĩjãneẽ́ panʉca?”. Ãdjirãba jarasiɗada: “Wãrãda Jesura zarea eroɓʉda nãũrã cãyãbara idjaɓa pusa cãyãbara”. Dji nĩbabadarãba cawasiɗada bio ĩjã pananibʉrʉ Jesuɗeda mãwãra ne waya neẽ́ pananida ni aɓaʉ siɗa.