Jesuba mil juesuma auɗu ne cobigasia

Pascua oi naẽna dji poa 32ɗe, dji nĩbabadarãra jiruãbẽrã zesiɗada wã pananada jaradiaɗe. Ãdjirãra bio sẽ panasiɗada. Maʉ̃ bʉrʉ Jesuba edesida jãba waiɓʉada. Ara maʉ̃da wãsiɗada Betsaidá puruɗaa. Baribʉrʉ doya jũẽboɗoɗaɗe, Jesuba unusida zocãrã ẽberãrãda ẽpẽ panʉda jãma. Idjia quĩrĩã ɓasida aɓabe idji nĩbabadarãme bʉrʉ ɓaida. Baribʉrʉ idjia jũma ãbaa pesida ẽberãrãra bio quĩrĩãi carea. Biabicuasida cacua biẽ́ ɓea siɗa. Ara maʉ̃da jaradiasida zocãrã beɗea bia Ãcõrẽ beɗeaɗebemada. Beɗea ɓabadjida dji Boro Ãcõrẽnebemada ewari entero. Queuboɗoɗe dji nĩbabadarãba jarasiɗada: “Ẽberãrãa jarra panʉda. Jaradua wãnamãrẽã ne coɗi jʉrʉɗi carea”.

Baribʉrʉ Jesuba panusida: “Wãnaẽ́da. Diaɗadua mãrãba coɗida”. Dji nĩbabadarãba panusiɗada: “¿Bʉa quĩrĩã ɓʉda daiba edaɗe wãnida paʉ̃da ãdjirãa carea? Pelipera aɓa dji nĩbabada basida panusida: “Parata waiɓʉa eropanʉbara nẽdoɗi basida paʉ̃ra ãdjirãa carea. Baribʉrʉ zocãrã panʉda ẽberãrã”.

Jesuba wãya panusia: “¿Jũmasa ne cobadara eropanʉda?” Andreba panusia: “Eropanʉda juesumabe paʉ̃da idjaɓa umé ɓeda zaque. Baribʉrʉ waiɓʉaẽ́ quiruda coɗira jãʉ̃gʉ zocãrã ẽberãrã carea”. Jesuba panusia: “Enedua dji paʉ̃da ɓeda siɗa”. Mãwãnacarea jarasida ẽberãrãa: “Chũpanenadua chirua ʉ̃rʉ̃”. Ara maʉ̃da edasida paʉ̃da idjaɓa ɓeda siɗa. Bajãnaa acʉsida dji idiɗi carea. Mãwãnacarea diasida cobadara dji nĩbabadarãa jeɗeɗamãrẽã jũmarã ẽberãrã. Zocãrã panʉ ẽberãrã. 5.000 auɗu umaquĩrãrã. Idjaɓa jãma panasiɗada wẽrãrãda warrarã siɗa. Jũmarãda ne cosiɗada, jãwũã panesiɗada. Jẽdaare ɓaɗacarea dji nĩbabadarãba jʉrʉ pesiɗada aɗubaɗada aduarãnamãrẽã, 12 jamará birasiɗaa. ¡Birabisiɗada jãmara 12ɗe! ¿Bʉmaarã jãʉ̃ra wãrãda bia ɓasida?

Jũmarãba acʉsiɗada maʉ̃ bʉrʉ ãdjirãba quĩrĩãsiɗada Jesura ɓeida ãdji boroda. Baribʉrʉ Jeowaba waɗi quĩrĩãẽ́ ɓasida dji boro ɓeida. ¿Cãrẽ cãrẽã? Waɗi idji ewariẽ́ basida. Jãʉ̃gʉra Jesuba cawa ɓasida. Maʉ̃ bʉrʉ jarasida ẽberãrãa: “Wãnadua”. Aɓabe idji quĩrĩã ɓasida dji nĩbabadarãme wãida ãyã dji pusa Galileaɗaa. Ãdjirãra wãsiɗada jãba waiɓʉaɗe. Maʉ̃ne Jesura wãsida eyaɗaa. Idjiɗuba ɓa quĩrĩã ɓasida dji idi carea idji Zezea. Jesuba jʉrʉbadjida ʉ̃nãũya dji idi carea ne quĩrãtanoa o ɓʉmĩna.