Jesu jẽdaare ne coɗi diamasi

Judiorãba obadjiɗada dji piesta pascua jũma poaza ewari 14 jeɗeco trʉ̃ jarabadjiɗada nisán. Mãwã quĩrãneba badjiɗada Jeowaba ãdjira ẽdrʉ edasida nezoca panana Egiptoɗe. Maʉ̃ bʉrʉ edecuasida ẽjũã quĩrãwãrẽãna. Dji poa 33ɗe, Jesuba idjaɓa dji nĩbabadarãba obadjiɗada piesta pascua ʉ̃taarebema cʉɗapõ Jerusaleʉ̃ne. Tẽãbe ne coɗacarea Jesuba jarasi: “Aɓa bãrã tãẽna ɓʉba mʉ̃ra beabida”. Dji nĩbabadarã bio quĩrãcuita acʉsiɗada, maʉ̃ bʉrʉ idisiɗada: “¿Caita?”. Jesuba panusida: “Dji ẽberã mʉ̃a diabʉrʉ paʉ̃, jãʉ̃gʉba mʉ̃ra beabida”. Ara maʉ̃da diasida maãrĩ paʉ̃da Juda Iscariotea. Judara piradrʉpeɗa wãsida.

Mãwãnacarea Jesura dji idisida, jeɗecasida paʉ̃da ãdjira dji nĩbabadarãa. Idjia jarasi: “Coɗadua naʉ̃ paʉ̃da, naʉ̃gʉra jara quĩrĩã ɓʉda mʉ̃ cacuada”. Wãyã dji idisida vino carea idjaɓa jeɗecasida. Jarasida: “Doɗadua naʉ̃ vinoda, naʉ̃ra jara quĩrĩã ɓʉda mʉ̃ oada. Jãʉ̃neba jũmarã ne cadjirua oɗara quĩrãdoaida, mʉ̃a wãrã arada jaraida mãrãra dji boro pananida mʉ̃me bajãne. Oɗadua poagaza mʉ̃ quĩrãnebaɗi carea”. Dji nĩbabadarã Jesuɗera waɗi ãbaa jʉrebadada jũma poaza quĩrãnebaɗi carea Jesuba jaraɗara. Jãʉ̃ ãbaa jʉre panʉ trʉ̃ jarabada “Jesu ne cobada diamasi”.

Tẽãbe ne coɗacarea dji nĩbabadarã ara naʉ̃da ãdjirãya beɗeasiɗada caidrʉ dji dromara ɓʉda dewaraʉ cãyãbara. Jesuba jarasida: “Ara maʉ̃ bãrãya quĩchaɗacada quĩcha droma, maʉ̃ cãyãbara quĩchaɗida caibea ɓʉ quĩrãca”.

Idjaɓa jarasida: “Mãrãra mʉ̃ djibiarã. Maʉ̃ bʉrʉ jũma mʉ̃ zezeba jara ɓʉra mʉ̃a jaraida. Cawaɗaẽ́ɗe wãya jiruãbẽrãɗi bajãne mʉ̃ zezemaa. Baribʉrʉ mãrãra nama panenida dji ẽberãrãba cawaɗamãrẽã mãrãra mʉ̃ ẽpẽbadarã dji quĩrĩã. Maʉ̃ bʉrʉ bio quĩrĩã ɓeaɗida ara bãdjiɗuba, mʉ̃a mãrãra quĩrĩã ɓaɗa quĩrãca”.

Jẽdaare baɗacare Jesuba dji idisida Jeowa wagaida dji ẽpẽbadarãra idjaɓa carebaida ãbaa necai trajaɗamãrẽã. Wãya dji idisida idji trʉ̃neba Jeowaba, biya quiruda ai carea. Mãwãnacareabʉrʉ Jesura dji nĩbabadarãya trʉ̃ãsiɗada trʉ̃ãbi bio bia quiruda Jeowa carea. Maʉ̃bebʉrʉ Olivo eyaɗaa wãsiɗada. Ara maʉ̃da dãrãẽ́ne jidaɗi carea Jesura.