¿Cãrẽda oɗida panʉ Ãcõrẽba bia unumãrẽã dadjirãba dji idi panʉne idjaɓa bia beɗea panʉne?

Beɗea naẽna ununa quĩrãca, Ãcõrẽba jũma religioʉ̃ra bia unuẽ́a. Baribʉrʉ dadjirãba ne zocãrã poya oɗida Ãcõrẽra ɓʉsriɗa ɓai carea dadjirãba o panʉneba. Maʉ̃ne, ¿cãrẽda oɗida panʉ Ãcõrẽba “jipa unumãrẽã” dadjirãba [wa, religioʉ̃rãba] dji idi panʉne idjaɓa bia beɗea panʉne? (Santiago 1:27, beɗea eɗaare). Acʉɗida Ãcõrẽ Beɗeaɗe jara ɓʉra.

1. ¿Sãma jara ɓʉda cãrẽda oɗida dji idiɗi carea Ãcõrẽra?

Ãcõrẽ Beɗeaba jara ɓʉda cãrẽda oɗida dji idiɗi carea Ãcõrẽra. Jesuba Ãcõrẽa jarasia: “Bʉ beɗeaba bʉra wãrãda cawabi ɓʉa” (Juaʉ̃ 17:17). Ʉ̃cʉrʉ religioʉ̃rãba ununacada dji wãrãda Ãcõrẽnebemada, Bibliaɗe. Maʉ̃ cãyãbara ãdjirãba o quĩrĩã panʉda drõãenabemada jaradiabada ɓaɗara. Baribʉrʉ Jeowaba quĩrĩãcada ẽberãrãba “obadaɗeba Ãcõrẽba obi ɓʉ beɗeara igarabadaa” (Leadua Marco 7:9). Baribʉrʉ idjira bio ɓʉsriɗa ɓaida dadjirãba ũrĩ panʉbʉrʉ idji beɗeada idjaɓa ĩjã o panʉbʉrʉ idjia jara ɓʉra.

2. ¿Sãwãbʉrʉ dji idiɗida idjaɓa bia beɗeaɗida Jeowaa?

Jeowaba dadjía oɗa bẽrã, quĩrĩã ɓʉda dadjirãba aɓabe idjíabʉrʉ dji idiɗida (Apocalipsi 4:11). Maʉ̃ carea dji idiɗaẽ́da Ãcõrẽ jʉwaba oɗaa quĩrãca ɓʉara (Leadua Isaías 42:8).

Dadjirãba dji idiɗida panʉa Jeowaba “bia unumãrẽã” (Romano 12:1). Jãʉ̃ra jãwã jara quĩrĩã ɓʉda dadjirãba ĩjãnida panʉa Jeowaba jara ɓʉ quĩrãca. Ne jara ɓʉ quĩrãca, ẽberãrãba bio quĩrĩã panʉbʉrʉ Jeowara ĩjãibaraida idjia jara ɓʉra; maʉ̃ne jaraɗida, quima edai naẽna mĩã cãĩnida, chirua cadjirua doɗacada, cigarrillo doɗacada idjaɓa beupeneɗacada.a

3. ¿Cãrẽã dji idiɗida panʉ Jeowaa ĩjã ɓea Ãcõrẽnebemame?

Domiaza ãbaa jʉre panʉne poya “bia beɗeaida Jeowaa [...] djabarãme” (Salmo 111:1, 2). Maʉ̃ carea trʉ̃ãbiɗeba beɗea bia beɗeabadaa Ãcõrẽa (Leadua Salmo 104:33). Jeowaba bio quĩrĩã ɓʉda dadjirãa. Idjia cawa ɓʉda ãbaa jʉre panʉne, jãʉ̃gʉba careba ɓʉda dadjirãra dãrã panani carea idjaɓa biara ĩjãni carea ara dadjirãya.

BIO CAWAƊIDA NAɄ̃ BEƊEAƊE

4. Jãʉ̃gʉ bacuru Ãcõrẽ quĩrãca oɗaa poya dji idiɗaẽ́da idjaɓa bia beɗeaɗaẽ́da

VIDEO: ¿Ãcõrẽba bia unubarida dji idiɗida idjaɓa bia beɗeaɗida bacuru Ãcõrẽ quĩrãca oɗaa? (3:26)

• ¿Naãrãeɗa cãrẽda mãwãsi Ãcõrẽ puruba dji idisiɗada Ãcõrẽra Ãcõrẽ jʉwa oɗaɗeba?

Ʉ̃cʉrʉ ẽberãrãba quĩcha panʉda ara caita panʉa Ãcõrẽme dji idibʉdaɗe bacuru Ãcõrẽ quĩrãca oɗaa. Baribʉrʉ jãʉ̃gʉ obʉdaɗe, ¿caita wãbʉdada Ãcõrẽme wa ãyã wãbʉdada? Leaɗapeɗa Exodo 20:4-6 idjaɓa Salmo 106:35, 36, beɗeaɗadua:

• ¿Cãrẽ Ãcõrẽ jʉwaba oɗaɗeba ẽberãrãba dji idi panʉda Ãcõrẽra?

• ¿Jeowaba cãrẽda quĩchabarida ẽberãrãba Ãcõrẽ quĩrãca oɗaa dji idiɗi carea?

• ¿Bʉa jãʉ̃gʉra sãwã unumʉda?

5. Aɓabe bʉrʉ Jeowaa dji idi panʉbʉrʉ idjaɓa bia beɗea panʉbʉrʉ ni aɓaʉba cũrũgaɗaẽ́a

VIDEO: Ẽdrʉ ɓʉda Ãcõrẽ wãrãneba (5:16)

Leaɗapeɗa Salmo 91:14, beɗeaɗadua:

• Dadjirãba Jeowaa aɓabe bʉrʉ dji idi panʉbʉrʉ idjaɓa bia beɗea panʉbʉrʉ, ¿idjia cãrẽda oida dadjirã carea?

6. Dji idiɗida idjaɓa bia beɗeaɗida Ãcõrẽa ãbaa jʉre panʉne

Dadjirãba jʉwa ʉ̃taa wa nũmepeɗa beɗeaɗi carea ãbaa jʉre panʉne capipiabi ɓaida Jeowara idjaɓa carebaɗida panʉa ara dadjirãya. Leaɗapeɗa Salmo 22:22, beɗeaɗadua:

• ¿Bʉa quĩrĩãbarida dadji djabarã beɗea panʉne ãbaa jʉreɗe wãbʉdaɗe?

• ¿Bʉa biɗa beɗea quĩrĩã ɓʉda ãbaa jʉreɗe wãbʉrʉɗe?

7. Jeowaba quĩrĩã ɓʉda dadjirãra beɗeaɗida dewararãme idjiɗeɗebemada

Ne zocãrã poya oɗida jaradiaɗi carea Ãcõrẽ Beɗeaba jara ɓʉra dewararãa. Leaɗapeɗa Salmo 9:1 idjaɓa 34:1, beɗeaɗadua:

• ¿Bʉa cãrẽda jara quĩrĩã ɓʉda Ãcõrẽ Beɗeaɗebemada cawaɗara?

JŨMA BEƊEAƊA

Capipiabi panʉda Ãcõrẽa idjíabʉrʉ dji idiɗida panʉa, bia beɗeaɗida panʉa Ãcõrẽa ãbaa jʉreɗe wãbʉdaɗe idjaɓa jaradiaɗida panʉ Ãcõrẽ Beɗeaɗebemada dewararãa.

Cawaɗara

• ¿Sãmaʉba jara ɓʉda cãrẽda oɗida panʉ dji idiɗi carea Ãcõrẽa idjia quĩrĩã ɓʉ quĩrãca?

• ¿Cãrẽãbʉrʉ aɓabe dji idiɗida idjaɓa bia beɗeaɗida Ãcõrẽa?

• ¿Cãrẽã ãbaa jʉreɗida dewararãme dji idiɗi carea idjaɓa bia beɗeaɗi carea Ãcõrẽa?

CAWADUA MÃSA

Leadua cãrẽ cãrẽã wẽrãba bia senti ɓasida amesiɗe bacuru Ãcõrẽ quĩrãca oɗara.

“Bacuru Ãcõrẽra oɗa quĩrãca mʉ̃a amesida” (Cartaba Jara ɓʉda, 2011, Julio 1)

Cawaida bʉa cãrẽda poya oida ãbaa jʉreɗe wãbʉrʉɗe jʉwa ʉ̃taa wapeɗa beɗeai carea.

“Bia beɗeaɗida Jeowaɗera ãbaa jʉreɗe wãbʉdaɗe” (Cartaba Jara ɓʉda, 2019, Enero)

Acʉdua reunioʉ̃ba sãwã carebasida cũdrada, idjimaarã zarea ɓasimĩna jãma wãi carea.

Jeowara bio sopua ɓʉda mʉ̃ carea (3:07)

Zocãrã baraa quĩchabadada curuso critianonebemada, baribʉrʉ ¿dji idiɗida Ãcõrẽa curusoɗeba?

“¿Cãrẽã Beɗea ɓeara Jeowaɗebemaba jʉ̃nacada curusora?” (Acʉdua internene)