¿Sãwã capipiabiɗida Jeowaa dadjia biya beɗeabʉdaba?

Jeowaba osida dadjirãa idjaɓa diasida regalo dadji beɗeabada. ¿Bio bia ɓʉda dadji beɗeaɗida? ¡Mãẽteara! (Leadua Santiago 1:26). Maʉ̃ bẽrã, ¿sãwãbʉrʉ so ɓʉsriɗabiɗida Jeowara dadji beɗeabʉdaɗe?

1. ¿Sãwãbʉrʉ oɗida panʉda jãʉ̃ Jeowaba diaɗara?

Ãcõrẽ Beɗeaba jara ɓʉ dadjirãa: “Maʉ̃ carea dji sobiabiɗadua. Idjaɓa dji carebaɗadua biara ĩjãni carea” (1 Tesalonica 5:11). ¿Bʉa cawa ɓʉda caida sobia ɓabida? ¿Bʉa cãrẽda oida idji so bia ɓai carea? Jaradua bʉa jũmasãbʉrʉ quĩrĩã ɓʉda. Idjaɓa bʉa poya jaraida idjia ne bia eroɓʉra. ¿Bʉa cawa ɓʉbʉrʉ cãrẽ textoba idjira carebaida? Zocãrã textora ɓʉda aɓabe edai careara. Bʉ beɗea ɓʉɗe quĩrãdoarãdua jãʉ̃ba poya carebaida ɓʉda dewararãa. Maʉ̃ bẽrã beɗeabʉrʉɗe necai beɗeaida idjaɓa bia beɗeaida (Proverbios 15:1).

2. ¿Cãrẽ beɗeadrʉ jaraɗaẽ́da?

Ãcõrẽ Beɗeaba jara ɓʉ: “Beɗea cadjiruara beɗearãnadua” (Leadua Epeso 4:29). Jãʉ̃ba jara ɓʉda dadji beɗea cadjiruara jaraɗaẽ́da idjaɓa jaraɗaẽ́da beɗeara dewaraa so biẽ́ sentimãrẽã. Djãrã nẽbʉrʉra sewara jaraɗaẽ́da (Leadua Proverbios 16:28).

3. ¿Cãrẽba carebaida bia beɗeaɗi carea dewaraʉɗe?

Beɗeabʉdaɗe acʉbi ɓʉda sãwã quĩcha panʉda idjaɓa sãwã senti panʉda (Luca 6:45). Maʉ̃gʉ bẽrã quĩchaɗida ne biadrʉ. Naʉ̃ba jara ɓʉda, quĩchaɗida jũma jipa ɓʉɗebemada, jũma cadjirua neẽ́ ɓʉɗebemada idjaɓa jũmarãba quĩrĩãbadaɗebemada (Pilipo 4:8). Jãʉ̃ oɗi carea, bio jʉrʉɗida sãʉ̃gʉda biara ɓʉda dadjia acʉɗi carea televisioʉ̃ne idjaɓa dadji bia siɗa bia jʉrʉɗida (Proverbios 13:20). Quĩchaɗida panʉa beɗeaɗi naẽna. Quĩchadua bʉa beɗeabʉrʉɗe sãwã sentiɗida dewararãa. Ãcõrẽ Beɗeaba jara ɓʉda: “Quĩchaẽ́ beɗeaibʉrʉ, jãʉ̃ra beɗeara necoba sui quĩrãca ɓʉda; baribʉrʉ jipa quĩcha beɗea beɗeaibʉrʉ, jãʉ̃ba sora biabibarida” (Proverbios 12:18).

BIO CAWAƊIDA NAɄ̃ BEƊEAƊE

4. Quĩrãcuita beɗeadua beɗeabʉrʉɗe

Eɗauɗe biẽ́ beɗeabadada, baribʉrʉ dãrã ɓaɗacarea quĩrũ bẽrã quĩchabadada (Santiago 3:2). Leaɗapeɗa Galata 5:22, 23, beɗeaɗadua:

• Bʉa bia beɗeai carea nama jaraɗa quĩrãca, ¿sãʉ̃gʉdrʉ bʉa Jeowara idida? ¿Sãwã carebaida jãʉ̃ beɗea biaba?

Leaɗapeɗa 1 Corinto 15:33, beɗeaɗadua:

• Ẽberãrã beɗea panʉne idjaɓa bʉa acʉ ɓʉ televisorɗe, bʉa ũrĩbʉrʉ ¿ãdji quĩrãca poya beɗeaida? ¿Sãwãbʉrʉ jãʉ̃ poya mãwãida?

Leaɗapeɗa Eclesiastés 3:1, 7, beɗeaɗadua:

• ¿Sãʉ̃bebʉrʉ chupea ũrĩda bʉa beɗea bia jarai careabʉrʉ?

5. Bia beɗeadua dewaraʉɗebema

VIDEO: “Djãrã carebaɗi carea” aɓabe beɗea biadrʉ beɗeaɗadua (4:07)

• ¿Cãrẽ sãwãyabʉrʉ naʉ̃ djababa idjira dewaraʉɗebema jipa beɗea quĩrĩã ɓasida?

• Jãʉ̃ oi cãrẽã, ¿cãrẽda osida?

Leaɗapeɗa Eclesiastés 7:16, beɗeaɗadua:

• ¿Cãrẽda quĩrãnebaɗida dewaraʉɗe jara quĩrĩã panʉne beɗea cadjiruara?

Leaɗapeɗa Eclesiastés 7:21, 22, beɗeaɗadua:

• Ʉ̃cʉrʉba biẽ́ beɗeabʉdaɗe bʉɗebemada, ¿dji textoba sãwã poya carebaida quĩrũẽ́ carea? ¿Cãrẽ cãrẽã?

6. Bʉ cuariarãme beɗeabʉrʉɗe bia beɗeadua

VIDEO: Dji cʉ̃ãgaba idjaɓa dji wayaaba jãʉ̃ba careba ɓʉda dadji cuariarã ãbaa panani carea (3:08)

• ¿Cãrẽba carebaida ibiya beɗeai carea bʉ cuariarãme?

Leaɗapeɗa Epeso 4:31, 32, beɗeaɗadua:

• ¿Sãwã beɗeaɗida dadji cuariarãme ãbaa bia panani carea?

Jeowaba jarasida idji warraa Jesu idjia senti ɓʉra. Leaɗapeɗa Mateo 17:5, beɗeaɗadua:

• ¿Bʉa sãwã oida Jeowa quĩrãca bʉ cuariarãme beɗeabʉrʉɗe?

JŨMA BEƊEAƊA

Bʉ beɗeara bio bia ɓʉda. Beɗeabʉrʉɗe quĩchaida, sãwãbʉrʉ jaraida, sãʉ̃bebʉrʉ jaraida idjaɓa cãrẽda jaraida.

Cawaɗara

• Bʉ beɗeabʉrʉɗe, ¿sãwã carebaida dewararãa?

• ¿Cãrẽ beɗeada jaraɗaẽ́da?

• ¿Cãrẽba carebaida ibiya beɗeaɗi carea?

CAWADUA MÃSA

¿Careba poya carebaida bia beɗeaɗi carea?

Beɗeaɗida ne cawa ɓea quĩrãca (8:04)

Cawadua cãrẽba poya carebaida idu ɓʉi carea beɗea cadjirua.

“¿Cãrẽa biẽ́ ɓʉda beɗea cadjirua jarai carea?” (Acʉdua internene)

Jʉrʉdua cãrẽneba poya carebaida dewaraʉɗebema nẽbʉrʉẽ́ carea.

¡Djãrã nẽbʉraɗe ɓearãdua! (2:36)

Leadua Jeowaba sãwã carebasida jãʉ̃ umaquĩrã aɓa idjia beɗea cadjirua idu ɓʉi carea.

“Mʉ̃a quĩchasida ne cadjirua igarai carea” (Cartaba Jara ɓʉda, 2013, Agosto 1)