Exodo

Ãcõrẽba mõgaraɗeba baido zebiɗa

17 Maʉ̃be israelerãra ẽjũã põãsa ewaraga ɓʉ Siʉ̃ abadaɗeba jũma wãbʉrʉsiɗaa. Wãnane Ãcõrẽba cawabibadjia sãma wãnida panʉda idjaɓa sãma cãĩnida panʉda. Maʉ̃ne Repidiʉ̃ abadama jũẽne wãsiɗaa. Baribʉrʉ mama baidora neẽ́ basía doɗi carea. 2 Maʉ̃ bẽrã ãdjirãba quĩrũbiɗeba Moiseda biẽ́ jarasiɗaa:

–Bʉa dairãa baidora diaida ɓʉa doɗi carea.–

Maʉ̃ne Moiseba ãdjirãa jarasia:

–¿Cãrẽ cãrẽã jãwã mʉ̃́a biẽ́ beɗea panʉ? ¿Ãcõrẽba sãwã oi cawaya jãwã panʉca?–

3 Baribʉrʉ israelerã opichia panʉ bẽrã quĩrũbiɗeba Moisea jara duanasia:

–¿Cãrẽ cãrẽã dairãra Egiptoɗeba ẽdrʉ enesi? Dairãra, dai warrarãra, idjaɓa dai animarã siɗa opichiaba jũma quininia.–

4 Maʉ̃ne Moiseba Ãcõrẽa quĩrã djuburiada nãwã iwiɗisia:

–Mʉ̃a naʉ̃ ẽberãrãra ¿sãwã oi? Mʉ̃a isabe baidoda diaẽ́bʉrʉ ãdjirãba mʉ̃ra mõgaraba taɓari beaɗia.–

5 Ãcõrẽba panusia:

–Israelerã duanʉmaʉba nocoɗaa wãdua. Israelerã bororãda bʉ ume ededua. Idjaɓa bʉ bacuru Egiptoɗe Nilo doɗe taweɗara bʉ jʉwaɗe ededua.* Maʉ̃be wãnadua Horeb eyaɗaa. 6 Mama mõgara waiɓʉa ɓʉda ununia. Mʉ̃ra ara maʉ̃ mõgara ʉ̃rʉ̃ ɓaya bʉ carebai carea. Bʉ bacuruba maʉ̃ mõgarara udua. Ara maʉ̃da baidora wea dogoya israelerãba doɗamãrẽã.–

Ara maʉ̃da Moiseba israelerã bororã quĩrãpita Ãcõrẽba jaraɗa quĩrãca osia. Maʉ̃ne baidora wea dogosia jũma israelerãba doɗamãrẽã.

7 Israelerã baido neẽ́ pananama Moiseba trʉ̃ ɓʉsia Masá idjaɓa Meribá. Idjia trʉ̃ ɓʉsia Meribá, israelerãba quĩrũbiɗeba biẽ́ beɗeasiɗa bẽrã. Idjaɓa trʉ̃ ɓʉsia Masá, Ãcõrẽba sãwã oi cawaya israelerãba nãwã jarasiɗa bẽrã:

–¿Ãcõrẽra dadjirã tãẽna ɓʉca wa neẽ́?–

Amalecitarã ume djõpeɗaɗa

8 Israelerãra waɗi Repidiʉ̃ne panasiɗaɗe amalecitarãda zeɗapeɗa ãdjirã ume djõni carea panasiɗaa. 9 Maʉ̃ bẽrã Moiseba idji carebabari Josueda trʉ̃peɗa jarasia:

–Ʉ̃cʉrʉ umaquĩrãrãda jʉrʉ pedua nu amalecitarã ume djõne wãni carea. Maʉ̃ne mʉ̃ra eya zaque boroɗe ɓaya. Ãcõrẽba ne ununaca obi ɓaɗa bacuruda mʉ̃ jʉwaɗe eroɓaya.–

10 Nurẽma Josuera idjia jʉrʉ peɗa ẽberãrã siɗa amalecitarã ume djõne wãsiɗaa Moiseba jaraɗa quĩrãca. Maʉ̃misa Moisera, Aaroʉ̃ra, Hur siɗa eya zaque boroɗaa wãsiɗaa. 11 Mama Moiseba idji jʉwara ʉ̃taa wa nũmesia. Idji jʉwa ʉ̃taa wa nũmʉne israelerãba amalecitarãra poyabʉda basía. Baribʉrʉ idji jʉwara sẽpeɗa eɗaa norraɓaribʉrʉɗe amalecitarãba israelerãra poyabʉda basía. 12 Maʉ̃ne Moise jʉwara bio norraɓari ɓʉ bẽrã Aaroʉ̃ba Hur ume mõgara waiɓʉada enesiɗaa Moisera maʉ̃ ʉ̃rʉ̃ chũmemãrẽã. Maʉ̃be Aaroʉ̃ba Hur biɗa idji jʉwara ʉ̃taa jira eropanesiɗaa, aɓaʉba jʉwa acʉare, dewarabemaba jʉwa araare. Mãwã Moiseba idji jʉwara ʉ̃taa jira eroɓasia aɓa ʉ̃mãdau ɓaebʉrʉɗaa. 13 Maʉ̃ne Josueba idjia edaɗa ẽberãrã ume amalecitarãra poyasiɗaa.

14 Maʉ̃be Ãcõrẽba Moisea jarasia:

–Bãrãba amalecitarã poyapeɗaɗara cartaɗe ɓʉdua israelerãba quĩrãdoarãnamãrẽã. Idjaɓa Josuéa jaradua mʉ̃a amalecitarãra naʉ̃ ẽjũãne jũma jõbida.–*

15 Moiseba mõgarada ʉ̃tʉ pã buesia Ãcõrẽba poyabiɗada quĩrãnebaɗi carea. Maʉ̃ mõgara ʉ̃tʉ pã bueɗara Moiseba trʉ̃ ɓʉsia “Ãcõrẽba dadjirãa poyabibaria.”* 16 Moiseba nãwã jarasia:

–Amalecitarãra Ãcõrẽ ume djõne zepeɗaɗa bẽrã iɗiba ʉ̃taa Ãcõrẽra ãdjirã ume djõ ɓaya.–*