1 Reye

Ãcõrẽba Jeroboaʉ̃ ãyã ɓʉi Ahíaba jaraɗa

14 Maʉ̃ ewariɗe Jeroboaʉ̃ warra Abíada bio cacua biẽ́ ɓesia. 2 Maʉ̃ carea Jeroboaʉ̃ba idji quimaa nãwã jarasia:

–Quĩrã awara djiodua ni aɓaʉba bʉra mʉ̃ quimada cawarãnamãrẽã. Maʉ̃be Silo puruɗaa wãdua. Ãcõrẽneba beɗeabari Ahíada mama ɓʉa. Idjiabʉrʉ mʉ̃ra naʉ̃ druaɗebema boroda ɓayaɗa asia.* 3 Idji itea paʉ̃da die, paʉ̃ poquea ɓʉda, idjaɓa urrajõda zoco zaque aɓa ededua. Idjía iwiɗiɗe wãdua dadji warrara sãwãi cawaya.–

4 Ara maʉ̃da Jeroboaʉ̃ba jaraɗa quĩrãca idji quimaba osia. Quĩrã awara djiopeɗa Silo puruɗaa wãsia. Maʉ̃ne Ahía deɗe jũẽsia.

Ahíaba bia unuca basía. Drõãda ɓʉ bẽrã dau towa ɓasia. 5 Baribʉrʉ naẽna Ãcõrẽba idjía nãwã jarasia:

–Jeroboaʉ̃ quimada bʉmaa zebʉrʉa idji warra bio cacua biẽ́ ɓʉɗebemada iwiɗi carea. Quĩrã awara djio ɓʉda jũẽya idjira cawarãmãrẽã. Idjía jaradua mʉ̃a jarabʉrʉ quĩrãca.–

6 Ahíaba Jeroboaʉ̃ quima idji deɗe jũẽbʉrʉda ũrĩsiɗe nãwã jarasia:

–Jeroboaʉ̃ quima, eɗa zedua. ¿Cãrẽ cãrẽã jãwã quĩrã awara djio ɓʉ? ¿Mʉ̃a bʉra cawarãmãrẽã jãwã ɓʉca? Ãcõrẽba mʉ̃́a jarabi ɓʉ carea bʉra sopuaya. 7 Bʉ quima Jeroboaʉ̃a nãwã jaraɗe wãdua: “Israelerã Ãcõrẽba nãwã jara ɓʉa: mʉ̃ puru Israelɗe mʉ̃a bʉdrʉ edapeɗa ãdjirã boroda ɓʉsia. 8 Mʉ̃a israelerã Daviɗeba yõbʉda boro jʉwaeɗabemada jãrĩpeɗa bʉ jʉwaeɗa ɓʉsia. Baribʉrʉ bʉa oẽ́ ɓʉa mʉ̃ nezoca Daviba o ɓaɗa quĩrãca. Jũma mʉ̃a jaraɗara idjia ĩjã obadjia. Soɗeba mʉ̃ra ẽpẽbadjia. Jũma idjia o ɓaɗara mʉ̃ quĩrãpita jipa ɓasia. 9 Baribʉrʉ jũma dji bororã bʉ naẽna ɓeaɗa cãyãbara bʉa cadjiruada wetara o ɓʉa. Mʉ̃da igarapeɗa bʉ itea jʉwaba oɗa ãcõrẽ oroɗeda obicuasia. Maʉ̃ba mʉ̃ra bio quĩrũbisia.

10 Maʉ̃ carea mʉ̃a Jeroboaʉ̃ ẽberãrãra biẽ́ ɓʉya. Idji ẽberãrãnebema dji umaquĩrãda mʉ̃a jũma quinibiya: nezoca ɓeada, nezocaẽ́ ɓea siɗa. Mʉ̃a idji ẽberãrãra aɓeɗa jũma jõbiya ãcaca ãyã ɓatabuebʉrʉ quĩrãca. 11 Idji ẽberãrã puruɗe beubʉdara usaba jũma coɗia. Idjaɓa puru jĩga beubʉdara ãgosoba jũma coɗia. Mʉ̃a mãwã jara ɓʉ bẽrã wãrãda mãwãya.

12 Jãʉ̃be diguiɗaa wãdua. Bʉ puruɗe jũẽbʉrʉɗe bʉ warrara beuya. 13 Jũma israelerãba idji carea aujĩã panʉne tʉɓariɗia. Jũma Jeroboaʉ̃ ẽberãrãnebemada aɓabe idjidrʉ tʉɓariɗia mʉ̃a aɓabe idjidrʉ bia unu ɓʉ bẽrã. 14 Mʉ̃a dewarada ɓʉya Israelɗebema boroda ɓamãrẽã. Maʉ̃ba jũma Jeroboaʉ̃ ẽberãrãra quenaya. Maʉ̃ra dãrãẽ́ne mãwãya.*

15 Mãwãnacarea mʉ̃a israelerãra cawa oya. Doba cha urebari quĩrãca ãdjirãra necai ɓeaɗaẽ́a. Chirua ẽũta edapeɗa ãyã ɓatabuebʉrʉ quĩrãca mʉ̃a israelerãra naʉ̃ drua bia quiru ãdji drõã naẽnabemarãa diaɗaɗebemada Euprate do wagaa tʉmʉ edeya. Mama ãdjirãra djãrã druaza ɓeaɗia. Mãwã cawa oya ãdjirãba ãcõrẽwẽrã Aseráda ãdji jʉwaba opeɗaɗa bẽrã. Maʉ̃ba mʉ̃ra bio quĩrũbisiɗaa. 16 Mʉ̃a ãdjirãra waa carebaẽ́a ãdji boro Jeroboaʉ̃ba cadjirua oɗa carea idjaɓa purua cadjirua obiɗa carea.”–

17 Maʉ̃be Jeroboaʉ̃ quimara Tirsa puruɗaa jẽda wãsia. Diguiɗa jũẽbʉrʉɗe idji warrara jaiɗasia. 18 Jũma israelerãba idji carea aujĩã duanʉne tʉɓarisiɗaa Ãcõrẽba idji nezoca Ahíaɗeba jaraɗa quĩrãca. Ahíara Ãcõrẽneba beɗeabari basía.

19 Jũma Israelɗebema boro Jeroboaʉ̃ba oɗa naʉ̃ cartaɗe ɓʉẽ́ ɓʉra, idji djõne wã ɓaɗaɗebemada, idjaɓa sãwã israelerãra pe eroɓaɗaɗebema siɗa dewara cartaɗe ɓʉ́ ɓʉa. Maʉ̃ carta trʉ̃ra “Israelɗebema bororãba opeɗaɗa” abadaa. 20 Jeroboaʉ̃ba 22 poa israelerãra pe eroɓasia. Maʉ̃be jaiɗasia. Idji cacuabari idji warra Nadáda Israelɗebema boroda ɓesia.

Juda druaɗebema boro Roboaʉ̃ba oɗa

21 Salomoʉ̃ warra Roboaʉ̃ 41 poa ɓʉɗe Juda druaɗebema boroda ɓesia. Idjia 17 poa Juda druaɗebemarãra pe eroɓasia. Jerusaleʉ̃ne ɓabadjia. (Jũma israelerã puru tãẽna Ãcõrẽba Jerusaleʉ̃da edasia idji de dromada ãdjirã tãẽna ɓamãrẽã.) Roboaʉ̃ papa Naamá abadada amonita wẽrã basía.

22 Roboaʉ̃ dji boro basiɗe Juda druaɗebemarãba Ãcõrẽ quĩrãpita cadjiruada o panesiɗaa. Mãwã ãdji drõã naẽnabemarãba opeɗaɗa cãyãbara ãdjirãba Ãcõrẽra wetara quĩrũbisiɗaa. 23 Eya boroza, jũma bacuru waiɓʉa nũmea edre biɗa ãdjirãba jʉwaba oɗa ãcõrẽda ɓʉcuasiɗaa bia beɗeaɗi carea. Mõgara waiɓʉada ʉ̃ta nũmʉcuasiɗaa idjaɓa ãdji jʉwaba oɗa ãcõrẽ Aseráda ʉ̃ta nũmʉcuasiɗaa. 24 Maʉ̃ awara Juda druaɗe jʉwaba oɗa ãcõrẽ ɓeama umaquĩrãrãda baridua ume cãĩbadjiɗaa. Aɓeɗa jũma cadjirua Ãcõrẽba quĩrĩãcada Juda druaɗebemarãba o panesiɗaa dewara puru ɓeaba naẽna opeɗaɗa quĩrãca. Maʉ̃ puru ɓeara Ãcõrẽba israelerã quĩrãpita jũma ãyã jʉrecuasia.

25 Poa juesuma Roboaʉ̃ Juda druaɗebema boroda ɓeɗacarea Egiptoɗebema boro Sisáda Jerusaleʉ̃naa djõne wãsia. 26 Poyapeɗa nebia Ãcõrẽ de dromane ɓeada, Roboaʉ̃ de dromane ɓea siɗa jũma jãrĩ edesia. Salomoʉ̃ba oro oɗa djõi careabema jũãtrʉbada siɗa jũma jãrĩ edesia. 27 Maʉ̃ carea Juda druaɗebema boro Roboaʉ̃ba bronceɗeda obicuasia. Maʉ̃gʉra idji wagabada bororãa diacuasia. Ãdjirãba idji de dromane eɗa wãbadara wagabadjiɗaa. 28 Roboaʉ̃ Ãcõrẽ de dromanaa wãbʉrʉza idji wagabadarãba maʉ̃ djõi careabema jũãtrʉbadara jʉwaɗe edebadjiɗaa. Roboaʉ̃ jẽda zeɗacarea maʉ̃ jũãtrʉbadara ãdji duanabada deɗe waga ɓʉbadjiɗaa.

29 Jũma Roboaʉ̃ba oɗa naʉ̃ cartaɗe ɓʉẽ́ ɓʉra, idjia Juda druaɗebemarã pe eroɓaɗaɗebema siɗa dewara cartaɗe ɓʉ́ ɓʉa. Maʉ̃ carta trʉ̃ra “Juda druaɗebema bororãba opeɗaɗa” abadaa. 30 Roboaʉ̃ ewariɗe idji druaɗebemarãra Jeroboaʉ̃ druaɗebemarã ume ara cadrʉa djõbadjiɗaa. 31 Roboaʉ̃ jaiɗasiɗe Davi puru abadaɗe tʉɓarisiɗaa idji drõã naẽnabemarã tʉɓaripeɗaɗama. Roboaʉ̃ cacuabari idji warra Abiaʉ̃da Juda druaɗebema boroda ɓesia.* (Roboaʉ̃ papa Naamá abadada amonita wẽrã basía.)