1 Cronica

22 Maʉ̃be Daviba jarasia:

–Naʉ̃ eyaɗe dadjirã Boro Ãcõrẽ de dromada, dadji israelerãba animarã babue diabada siɗa oɗia.–

Ãcõrẽ de droma oi carea Daviba jʉrʉ peɗa

2 Daviba ãĩbemarã Israel druaɗe panabadada ãbaa jʉrebisia. Maʉ̃be Ãcõrẽ de droma oi carea ʉ̃cʉrʉ ɓʉcuasia mõgara toaweɗamãrẽã. 3 Maʉ̃ awara jiorroda waiɓʉa jʉrʉ pesia dji eɗa wãbadara cachiɗi carea idjaɓa jira ɓʉɗi carea. Bronce siɗa jʉrʉ pesia. Waiɓʉa edaɗa bẽrã dji zʉgʉara poya zaɗaẽ́ basía. 4 Maʉ̃ awara dji biara ɓʉ bacuru Libano druaɗebemada waiɓʉa jʉrʉ pesia.* Maʉ̃ra poya juachaɗaẽ́ basía Sidoʉ̃ puruɗebemarãba, Tiro puruɗebemarã biɗa zocãrã enepeɗaɗa bẽrã.* 5 Daviba mãwã jʉrʉ pesia nãwã crĩcha ɓaɗa bẽrã:

–Mʉ̃ warra Salomoʉ̃ra waɗibiɗa cũdrada ɓʉ bẽrã dera o adua ɓʉa. Baribʉrʉ Ãcõrẽ de dromara dji waiɓʉara ɓʉda idjaɓa dji biara quiruda ɓaida ɓʉa jũma naʉ̃ ẽjũãne trʉ̃ ɓʉga ɓamãrẽã. Maʉ̃ bẽrã mʉ̃ warra Salomoʉ̃ba poya omãrẽã mʉ̃a jũma jʉrʉ peya.–

Maʉ̃ carea Davi jaiɗai naẽna jũma jʉrʉ pesia. 6 Maʉ̃ ewariɗe Daviba idji warra Salomoʉ̃ra trʉ̃peɗa jarasia israelerã Ãcõrẽ de dromada omãrẽã. 7 Nãwã jarasia:

–Warra, mʉ̃ Boro Ãcõrẽ itea mʉ̃a de dromada oida crĩcha ɓasia. 8 Baribʉrʉ idjia mʉ̃́a nãwã jarasia: “Bʉra dewara puru ɓea ume ɓarima zocãrã djõpeɗa ẽberãrãda quenasia. Mʉ̃ quĩrãpita naʉ̃ ẽjũãne zocãrã quenana bẽrã bʉa mʉ̃ itea de dromara ocara ɓʉa. 9 Baribʉrʉ bʉa warrada djõ quĩrĩãcada unuya. Mʉ̃a idjira jũma idji dji quĩrũ ume necai ɓʉya. Maʉ̃ bẽrã idji trʉ̃ra Salomoʉ̃ aɗia.* Idjira israelerã boroda ɓʉmisa mʉ̃a israelerãra jũma necai ɓʉya. 10 Idjiabʉrʉ mʉ̃ itea de dromada oya. Idjira mʉ̃ warra baya maʉ̃ne mʉ̃ra idji Zeza baya. Idji ewariɗeba ʉ̃taa mʉ̃a idjida, idjiɗeba yõbʉdarã siɗa israelerã bororãda ɓʉya.”

11 Maʉ̃ bẽrã warra, mʉ̃a quĩrĩã ɓʉa Ãcõrẽra bʉ ume ɓaida idji de dromara omãrẽã idjia jaraɗa quĩrãca. 12 Idjaɓa mʉ̃a quĩrĩã ɓʉa Ãcõrẽba necawaada, crĩcha cawaa siɗa bʉ́a diaida. Mãwã bʉa israelerã pe eroɓʉɗe idji leyra jũma ariɗe ĩjã oya. 13 Ãcõrẽba Moiseɗeba israelerãa ley diaɗara bʉa quĩrãcuita o ɓaibʉrʉ bʉa obʉrʉra jũma bia odjaya. Ʉɓʉa ɓapeɗa sozarra ɓadua. Ne wayarãdua. Jẽda crĩcharãdua.

14 Mʉ̃a bio traja ɓʉɗeba oroda 7 miyoʉ̃ 500 mil libra idjaɓa paratada 75 miyoʉ̃ libra jʉrʉ pesia bʉa Ãcõrẽ de dromada omãrẽã. Bronceda, jiorro siɗa waiɓʉa jʉrʉ pesia. Dji zʉgʉara dadjia poya zaɗaẽ́a. Maʉ̃ awara mõgara toaweɗada, bacuru ʉrraɗa siɗa jʉrʉ pesia, baribʉrʉ maʉ̃ auɗu bʉa jʉrʉ peida ɓʉa.

15 Bʉa ne o cawa ɓeada zocãrã eroɓʉa: mõgara toawe cawa ɓeada, mõgara de o cawa ɓeada, bacuru de o cawa ɓea siɗa. 16 Maʉ̃ awara oroɗebema ne o cawa ɓeada, parataɗebema ne o cawa ɓeada, bronceɗebema ne o cawa ɓeada, jiorroɗebema ne o cawa ɓea siɗa zocãrã eroɓʉa. Jãʉ̃be jʉwa ɓʉdua Ãcõrẽ de dromara oi carea. Ãcõrẽra bʉ ume ɓaya.–

17 Maʉ̃be Daviba Israelɗebema dji droma ɓeaa jarasia idji warrara carebaɗamãrẽã. 18 Nãwã jarasia:

–Dadji Ãcõrẽra bãrã ume ɓʉa. Ara maʉ̃ Ãcõrẽba bãrãra necai ɓʉsia dewara puru ɓeara mʉ̃ jʉwaeɗa ɓʉɗa bẽrã. Jũma ãdjirãra Ãcõrẽ jʉwaeɗa panʉa idjaɓa dadji israelerã jʉwaeɗa panʉa. 19 Maʉ̃ bẽrã soɗeba, jaureɗeba biɗa bãrã Ãcõrẽra jʉrʉɗadua. Jʉwa ɓʉɗadua idji de droma oɗi carea. Opeɗaɗacarea idji baurudera, ne jũma idji deɗe ɓaida ɓʉ siɗa eɗa ɓʉɗadua.–