Luca
Jesuba ẽberã ogoro ɓʉ biabiɗa
14 Ʉ̃nãũbada ewariɗe Jesura pariseo dji droma deɗe ne coɗe wãsia. Maʉ̃ne dewara pariseorãba bio acʉ panasiɗaa idjia biẽ́ oi cawaya. 2 Jesu caita ẽberã ogoro ɓʉda ɓasia. 3 Jesuba judiorã ley jaradiabadarãa, pariseorãa biɗa nãwã iwiɗisia:
–¿Bãrãmaa bia ɓʉca ʉ̃nãũbada ewariɗe cacua biẽ́ ɓeara biabida?–
4 Baribʉrʉ ãdjirãba ni cãrẽ siɗa jaraɗaẽ́ basía. Maʉ̃ carea Jesuba dji cacua biẽ́ ɓʉra jidapeɗa biabipeɗa diguiɗaa wãbisia. 5 Maʉ̃be Jesuba ãdjía jarasia:
–Ʉ̃nãũbada ewariɗe bãrã warrada wa pacada baido juebada uriaɗe ɓaesira ¿ara maʉ̃da erreɓari ẽdrʉ edaɗaẽ́ca?–*
6 Baribʉrʉ ãdjirãba ni cãrẽ siɗa panunaẽ́ basía.
Eɗaara ɓaiɗebema
7 Jesuba unusia ne coɗe zepeɗaɗarãda bugue dji droma ɓea careabemane chũmebʉdada. Maʉ̃ carea Jesuba ne jara ɓʉɗeba ãdjía nãwã jarasia:
8 –Ẽberãba quima edabʉrʉɗe bʉ́a ɓʉsriɗa ne coɗe wãmãrẽã jaraibʉrʉ, dji droma chũmebadama chũmerãdua. Ãĩbẽrã bʉ cãyãbara dji dromaara ɓʉda jũẽisicada. 9 Mãwãra djibariba bʉ́a jaraya: “Ãyã wãdua. Za ɓʉ ẽberãda nama chũmeya.” Mãwã obʉrʉɗe bʉra bio quĩrã peraya dji eɗaara ɓea ume chũmei bẽrã.
10 Maʉ̃ bẽrã bʉda eɗoɗibʉrʉ dji eɗaara ɓeama chũmedua. Mãwãra bʉ eɗoɗaba unubʉrʉɗe nocoɗaa trʉ̃peɗa jaraya: “Zedua, nama dji dromarã ume chũmedua.” Mãwã bʉ eɗoɗaba jũma dji chũmea quĩrãpita bʉra dji dromada unubiya. 11 Bariduada dji dromaara ɓa quĩrĩã ɓʉbʉrʉ Ãcõrẽba eɗaara ɓʉya. Aɓaʉba ara idjida eɗaara ɓʉibʉrʉ Ãcõrẽba dji dromaara ɓʉya.–
12 Maʉ̃be Jesuba idji eɗoɗaa nãwã jarasia:
–Bʉa ẽberãrã ne coɗe trʉ̃bʉrʉɗe bʉ dji biarãda, bʉ djabarãda, bʉ ẽberãrã siɗa trʉ̃rãdua. Ne bara ɓea bʉ caita panabada siɗa trʉ̃rãdua. Ãdjirãda trʉ̃ibʉrʉ dewara ewariɗe ãdjia ẽberãrã trʉ̃bʉdaɗe bʉ siɗa trʉ̃nia. Mãwã bʉa oɗabari ne edaya. 13 Maʉ̃ bẽrã bʉa ẽberãrã trʉ̃bʉrʉɗe biara dji ne neẽ́ ɓeada, dji nʉcanʉca ɓeada, jĩrũ biẽ́ ɓeada, dauɓerrea ɓea siɗa trʉ̃cuadua. 14 Mãwãbʉrʉ wãrãda bʉra bio bia ɓaya. Ãdjia ni cãrẽ siɗa bʉ́a poya diaɗaẽ́ bẽrã, dji jipa ɓea ʉ̃rẽbabʉda ewariɗe Ãcõrẽba bʉ́a nebiada diaya.–
Ne cobada waiɓʉaɗeba ne jara ɓʉ
15 Jesu ume chũpanʉba maʉ̃ ũrĩsiɗaɗe aɓaʉba jarasia:
–Ãcõrẽ puruɗe ne cobʉda ẽberãra bio bia ɓeaɗia.–
16 Maʉ̃ carea Jesuba idjía jarasia:
–Ewari aɓa ẽberãba ãbaa ne coɗi waiɓʉada obʉrʉ bẽrã zocãrãa jarasia ãbaa ne coɗida. 17 Djico wiboɗoɗe djibariba idji nezocaa nãwã jaraɗe wãbisia: “Zeɗadua, djicora wisia.”
18 Baribʉrʉ ẽberãrãba wãna amaaba jarasiɗaa jʉwa tãbʉra panʉda. Aɓaʉba jarasia: “Aretewa mʉ̃a ẽjũãda nẽdosia. Maʉ̃da acʉɗe wãida ɓʉ bẽrã poya wãẽ́a. Mʉ̃ djuburia maʉ̃ carea biẽ́ crĩcharãdua.” 19 Dewaraba jarasia: “Mʉ̃a aretewa pacada die nẽdoɗa bẽrã poya wãẽ́a. Maʉ̃ pacada acʉɗe wãbʉrʉa wãrãda bia ɓea cawaya. Mʉ̃ djuburia maʉ̃ carea biẽ́ crĩcharãdua.” 20 Maʉ̃ne dewaraba jarasia: “Mʉ̃ra aretewa quima edaɗa bẽrã poya wãẽ́a.”
21 Dji nezocara jẽda wãpeɗa ãdjia jarapeɗaɗara de djibaría jarasia. Maʉ̃ carea djibarira bio quĩrũpeɗa idji nezocaa jarasia: “Puruɗaa isabe wãdua. Maʉ̃be dji ne neẽ́ ɓeada, dji jĩrũ biẽ́ ɓeada, dji dauɓerrea ɓeada, dji nʉcanʉca ɓea siɗa jũma zebicuadua.”
22 Dji nezocaba mãwã oɗacarea jarasia: “Bʉa jaraɗa quĩrãca mʉ̃a osia, mãwãmĩna waɗi dera bari coɓʉa.”
23 Maʉ̃ carea de djibariba idji nezocaa waya jarasia: “Puru jĩga o ɓeaza wãdua. Ẽberãrãda unusira isabe zebicuadua mʉ̃ dera bio bira coɓemãrẽã. 24 Mʉ̃a jaraya: mʉ̃a naãrã trʉ̃cuaɗarãba mʉ̃a waiɓʉa djubiɗara ni maãrĩ biɗa coɗaẽ́a.”–
Jesu ẽpẽira zarea ɓʉa
25 Ẽberãrãda Jesu caiɗu zocãrã nĩbabadjiɗaa. Maʉ̃ carea Jesuba ãdjimaa acʉpeɗa nãwã jarasia:
Aɓaʉba mʉ̃da ẽpẽ quĩrĩã ɓʉbʉrʉ, naãrã bio crĩchaida ɓʉa. Idji djibarirãda, quimada, warrarãda, djabarãda, djabawẽrãrãda, wa idji zocai ɓaida mʉ̃ cãyãbara biara quĩrĩã ɓʉbʉrʉ, poya mʉ̃ ume nĩbaẽ́a. 27 Bia mĩga ɓai carea ɓʉẽ́bʉrʉ, poya mʉ̃ ume nĩbaẽ́a.*
28 Aɓaʉba de waiɓʉada o quĩrĩã ɓʉbʉrʉ, naãrã quĩrãcuita crĩchaida ɓʉa idjia eroɓʉ parataba jũma pãrãi cawaya. 29 Ãĩbẽrã de jĩrũ jouɗacarea cawaisicada poya pãrãẽ́da. Dewararãba maʉ̃ ununapeɗa nãwã ipiɗa jaraɗia: 30 “¿Jãʉ̃ acheba aɓa poya oi quĩrãca naʉ̃ dera jãwã jʉwa osica?”
31 Aɓaʉ druaɗebema boroba sordaorãda die mil eroɓʉbʉrʉ, maʉ̃ne dewara druaɗebema boroda veinte mil sordaorã bara idji ume djõne zeibʉrʉ, djõni naẽna ¿idjia quĩrãcuita crĩchaẽ́ca poyai cawaya? 32 Idjia poyaẽ́da cawasira dewarabema waɗi tʉmʉ ɓʉɗe ¿ʉ̃cʉrʉ diabueẽ́ca idji ume beɗeaɗe wãnamãrẽã?
33 Ara maʉ̃ quĩrãca mʉ̃ ẽpẽni naẽna bãrãba bio crĩchaɗapeɗa ne jũma igaraɗi carea ɓeaɗaẽ́bʉrʉ mʉ̃ ume poya nĩbaɗaẽ́a.
Tãda cʉyaa jõibʉrʉ
34 Wãrãda tãra bio bia ɓʉa, baribʉrʉ cʉyaa jõibʉrʉ ¿sãwã wayacusa cʉya ɓei? 35 Maʉ̃ tãra egoroɗe jĩãpoi carea ni animarã ãcaca ʉ̃rʉ̃ ɓʉi carea aɓeɗa biẽ́ ɓʉa. Biara ɓʉa ɓatabueɗida. ¡Dji cʉwʉrʉ bara ɓʉba quĩrãcuita ũrĩdua!–