Mateo
Djãrã biẽ́ jarabadaɗebema
7 Djãrãra biẽ́ jararãnadua Ãcõrẽba bãrã biẽ́ jararãmãrẽã. 2 Bãrãba djãrã biẽ́ jarabʉda quĩrãca Ãcõrẽba bãrãra biẽ́ jaraya. 3 ¿Cãrẽ cãrẽã nejarra djãrã dauɗe ɓʉda acʉbada? ¿Sãwãẽrã bacuru waiɓʉa bãdji dauɗe ɓʉda acʉɗaca? 4 Bacuru waiɓʉa bãdji dauɗe ɓʉda ununaẽ́ panʉbʉrʉ ¿sãwã djãrãa nãwã jaraɗi? “Nejarra bʉ dauɗe ɓʉra mʉ̃a auɓariya.” 5 ¡Bãrãba jarabada quĩrãca oɗacaa! Naãrã bacuru waiɓʉa bãdji dauɗe ɓʉda auɓariɗadua. Mãwã poya ununia nejarra djãrã dauɗe ɓʉra auɓariɗi carea. Ara maʉ̃ quĩrãca bʉa cadjirua o ɓʉra naãrã idu ɓʉdua. Maʉ̃bebʉrʉ djãrãra poya carebaya.
6 Ãcõrẽ iteabemada usaa diarãnadua bãrã carãmãrẽã. Bãrã neta nẽbʉa queɗeada chinaa diarãnadua ʉ̃rʉ̃ tʉgarãmãrẽã.*
Ãcõrẽa iwiɗibadaɗebema
7 Bãrãba neẽ́ panʉra Ãcõrẽa iwiɗi pananadua; maʉ̃ne idjia bãrãa diaya. Idjia diamãrẽã jʉrʉ pananadua; maʉ̃ne ununia. Deɗe eɗa wãbadamaʉba trʉ̃nadua; maʉ̃ne dji eɗa wãbadara ewaya diai carea. 8 Dji iwiɗi ɓʉba edaya. Dji jʉrʉ ɓʉba unuya. Dji trʉ̃ ɓʉ itea deɗe eɗa wãbadara ewaya ne diai carea. 9 Warraba paʉ̃ iwiɗibʉrʉɗe ¿dji zezaba mõgarada diaica? 10 Warraba ɓeda iwiɗibʉrʉɗe ¿dji zezaba damada diaica? 11 Bãrã dji cadjirua ɓeaba bãrã warrarãa ne biada dia cawa panʉbʉrʉ, ¿bãrã Zeza bajãne ɓʉba dji iwiɗi panʉ́a ne biada diaẽ́ca? 12 Bãrãba quĩrĩã panʉa djãrãba ne jũmane bãrãra bia oɗida. Ara maʉ̃ quĩrãca djãrãra bia oɗadua. Ãcõrẽba Moisea diaɗa leyda idjaɓa Ãcõrẽneba beɗeabadarãba ɓʉpeɗaɗa siɗa ara maʉ̃ crĩchaɗeba ze ɓʉa.
Eɗa wãbada pẽsua ɓʉ
13 7:13-14 Bãrãra dji eɗa wãbada pẽsua ɓʉɗe wãnadua. Tʉbʉ uruaɗe eɗa wãbadara jeɗea ɓʉa. Dji o siɗa jeɗea ɓʉ bẽrã wãicha ɓʉa. Mama zocãrã eɗa wãbadaa. Baribʉrʉ Ãcõrẽ ume ewariza zocai ɓai carea dji eɗa wãbadara pẽsua ɓʉa. Dji oɗe wãcara ɓʉ bẽrã zarea ɓʉa wãi carea. Maʉ̃ ora zocãrãba ununacaa.
Bacurura dji nejõneba cawabadaa
15 Quĩrãcuita ɓeaɗadua. Ʉ̃cʉrʉba sewaɗeba Ãcõrẽneba beɗea panʉana abadaa. Ãdjirãba dji biarã quĩrãca jaradiabadaa baribʉrʉ mãwã panʉa ẽberãrãba Ãcõrẽ beɗea igaraɗamãrẽã. 16 7:16-17 Ãdjia o panʉneba bãrãba cawaɗia dji wãrã arada wa dji wãrãẽ́da. Bacuru biaba nejõ biada zaubaria baribʉrʉ bacuru cadjiruaba nejõ cadjiruada zaubaria. ¿Ʉrʉba uvada zaubarica? ¿Wa jũĩchichiba higojõda zaubarica? 18 Bacuru biaba nejõ cadjiruada zaucaa idjaɓa bacuru cadjiruaba nejõ biada zaucaa. 19 Bacuru bia zaucara tutaɗapeɗa babuebadaa. 20 Ara maʉ̃ quĩrãca bãrãba Ãcõrẽneba beɗeabadarãda dji wãrã arada wa dji wãrãẽ́da cawaɗia ãdjirãba o panʉneba.
Jesu trʉ̃neba ne o ɓeara ʉ̃cʉrʉ idjiɗerãẽ́a
21 Ẽberãrãba mʉ̃ra ãdji boroaɗa abadamĩna jũmarãda Ãcõrẽ puruɗe ɓeaɗaẽ́a. Aɓabe mʉ̃ Zeza bajãne ɓʉba quĩrĩã ɓʉ o ɓeadrʉ idji puruɗe panania. 22 Idjia cawa oi ewariɗe zocãrãba mʉ̃́a jaraɗia: “Dai Boro, dai Boro, daira bʉɗeba beɗeasiɗaa, bʉ trʉ̃neba jairãda ãyã jʉretasiɗaa, idjaɓa bʉ trʉ̃neba ne ununaca waiɓʉada osiɗaa.” 23 Maʉ̃ne mʉ̃a ebuɗa jaraya: “Cadjirua obadarã, ãyã wãnadua. Mʉ̃a bãrãra unucaa.”
De uménebema
24 Maʉ̃ carea bariduaba mʉ̃ beɗeada ũrĩpeɗa ĩjã oibʉrʉ, naʉ̃ quĩrãca ɓaya: ẽberã crĩcha cawa ɓʉba idji dera mõgara ʉ̃rʉ̃ osia. 25 Maʉ̃ne cue ze nũmesia, nãũrãra dji cãbãyã puá nũmesia, do siɗa ze nũmesia, baribʉrʉ idji dera cora wãẽ́ basía mõgara ʉ̃rʉ̃ oɗa bẽrã. 26 Baribʉrʉ mʉ̃ beɗea ũrĩpeɗa ĩjã oẽ́bʉrʉ, naʉ̃ quĩrãca ɓaya: ẽberã crĩcha neẽ́ ɓʉba idji dera ĩbʉɗe osia. 27 Maʉ̃ne cue ze nũmesia, nãũrãra dji cãbãyã puá nũmesia, do siɗa ze nũmesia. Maʉ̃ba idji dera cora wãpeɗa aɓeɗa jũma ãrĩsia.–
28 Jesuba jũma jaradiaɗacarea ẽberãrãba cawa crĩchaɗaẽ́ basía. 29 Judiorã ley jaradiabadarã quĩrãca jaradiaẽ́ basía. Ãtebʉrʉ bio cawa ɓʉɗeba ebuɗa jaradia ɓasia.