Joná

Joná Ãcõrẽnebemada mĩrũ wãna

1 Ẽberãda ɓasia Joná abadada. Maʉ̃ Jonára Amitai warra basía.* Ewari aɓa Ãcõrẽba Jonáa jarasia:

2 –Mʉ̃a quĩrĩã ɓʉa bʉra Ninive puru dromanaa wãida. Mʉ̃a unu ɓʉa maʉ̃ puruɗebemarãba jũmawãyã cadjiruada o panʉda. Maʉ̃ bẽrã ãdjirãa jaradua mʉ̃a cawa oida.–

3 Baribʉrʉ Ãcõrẽba jara ɓʉ ĩjã o amaaba Jonára Ãcõrẽnebemada mĩrũ wãsia. Wãne barco wiɓaribada puru Jope abadama jũẽsia. Mama barcoda unusia Tarsi druaɗaa wãi carea ɓʉda.* Parata diapeɗa barcoɗe ɓadosia Ãcõrẽnebemada tʉmʉ mĩrũ wãi carea.

4 Baribʉrʉ mãcua tʉmʉ wãnaẽ́ne Ãcõrẽba nãũrãda dji cãbãyã puábisia. Maʉ̃ba pusara quĩrũ nũmepeɗa baidora barcoɗe eɗa wã nũmesia. Barcora toɗogozoaica nũmesia.

5 Maʉ̃ bẽrã barco edebʉdarãba ne wayaaba ãdjiza ãdji ãcõrẽa beɗea djuburia duanesiɗaa. Maʉ̃ awara barcora wẽsaara ũmemãrẽã ãdji netatara jũma daiɗu ɓatacuasiɗaa. Maʉ̃misa Jonára barcoɗe eɗa wãpeɗa bio cãĩ ɓasia. 6 Baribʉrʉ barcoɗebema boroba Jonára cãĩ ɓʉda unune wãsia. Maʉ̃ne jarasia:

–Bʉra ¿cãrẽ cãrẽã jãwã cãĩ taɓʉ? ¡Piraɓaripeɗa bʉdji Ãcõrẽa iwiɗidua! Idjia careba quĩrĩãibʉrʉ ãĩbẽrã dadjirãra ẽdrʉ ɓʉisicada.–

7 Joná ʉ̃ta zeɗacarea barco edebʉdarãba ãdjiza jara duanesiɗaa:

–Ne jemenenadrʉ cawaɗi carea caiɗeba jãwã naʉ̃ minijĩchiaɗe panʉda.–

Ara maʉ̃da ne jemenesiɗaa cawaɗi carea. Maʉ̃ne cawasiɗaa Jonádrʉ beɗeaɗe ɓʉda. 8 Maʉ̃ carea ãdjia jarasiɗaa:

–Daia jaradua bʉa cãrẽda osida jãwã dadjirãra naʉ̃ minijĩchiaɗe panesiɗara. ¿Bʉa cãrẽda obari? ¿Sãmaʉba zebʉrʉ? ¿Bʉra sãmabema? ¿Sãʉ̃gʉ ẽberãrãnebema?–

9 Jonába panusia:

–Mʉ̃ra hebreoda jãwã ɓʉa. Mʉ̃a bajãnebema Ãcõrẽa bia beɗeabaria. Idjia pusara, naʉ̃ ẽjũã siɗa osia.–

10 Maʉ̃ awara jarasia idjira Ãcõrẽnebemada mĩrũ wãbʉrʉda. Maʉ̃ cawasiɗaɗe ãdjirãra bio ne wayasiɗaa. Maʉ̃ carea ãdjia iwiɗisiɗaa:

–¿Bʉa cãrẽ cãrẽã jãwã osi?–

11 Maʉ̃misa pusara auɗuara quĩrũbʉrʉ bẽrã ãdjia iwiɗisiɗaa:

–¿Jãʉ̃be bʉra sãwã oɗi pusa quĩrũbira tumabiɗi carea?–

12 Jonába panusia:

–Mʉ̃ra daiɗu ɓatabueɗadua. Mãwãbʉrʉ pusara tumaya. Mʉ̃a cawa ɓʉa mʉ̃drʉ beɗeaɗe ɓʉda naʉ̃ pusa jãcua quĩrũ nũmʉ carea.–

13 Baribʉrʉ barco edebʉdarãba auɗuara wisiɗaa doyaa wãni carea. Mãwãmĩna poyaɗaẽ́ basía, pusara wetara quĩrũna bẽrã. 14 Maʉ̃ carea Ãcõrẽa nãwã iwiɗisiɗaa:

–Ãcõrẽ, naʉ̃ ẽberã beabʉda carea daira beubirãdua. Idjida beɗea neẽ́ ɓʉda beaɗibʉrʉ, daira beɗeaɗe ɓʉrãdua. Wãrãda bʉabʉrʉ ara bʉdjia crĩcha ɓʉ quĩrãca o ɓʉa.–

15 Mãwã jaraɗapeɗa Jonára daiɗu ɓatabuesiɗaa. Ara maʉ̃da pusara tumasia. 16 Maʉ̃ unusiɗaɗe barco edebʉdarãba Ãcõrẽ wayaaɗeba animarãda babue diasiɗaa. Maʉ̃ awara wãrãneba jarasiɗaa idjira ẽpẽnida.

17 Maʉ̃ne Ãcõrẽba ɓeda waiɓʉada diabuesia Joná mĩmãrẽã. Maʉ̃ ɓeda ɓiteɗa Jonára ewari ũbea ɓasia.