Mateo

Chĩdauɗeba cawa jarabadaba Jesu acʉɗe zepeɗaɗa

2 Jesu Beleʉ̃ puruɗe Judea druaɗe tosiɗaɗe Herode dji Droma abadada dji boro basía.* Maʉ̃ ewariɗe ʉ̃cʉrʉ ẽberãrãda ʉ̃mãdau odjabariare ɓʉ druaɗeba Jerusaleʉ̃ puruɗe jũẽsiɗaa. Maʉ̃gʉrãba chĩdau acʉ panʉneba ne cawabadjiɗaa. 2 Maʉ̃ne ãdjia iwiɗisiɗaa:

–Naʉ̃ druaɗe judiorã boro bai warrada tosia. Idjira ¿sãma ɓʉ? Daiba ʉ̃mãdau odjabariare ɓʉ druaɗeba chĩdau idjiɗebemada unusiɗaa.* Nama ze panʉa idjía bia beɗeaɗi carea.–

3 Maʉ̃ ũrĩsiɗe Herodera biẽ́ ɓesia aɓaʉda idji cacuabari ɓei bẽrã. Idjaɓa Herodeba sãwã oida cawaɗaẽ́ panʉ bẽrã jũma Jerusaleʉ̃nebemarã siɗa biẽ́ panesiɗaa. 4 Maʉ̃ne Herodeba jũma sacerdote bororãda, judiorã ley jaradiabada siɗa trʉ̃cuapeɗa iwiɗisia:

–Ãcõrẽba ẽdrʉ edabari diai jaraɗara ¿sãmabʉrʉ toida ɓʉ?–*

5 Ãdjirãba panusiɗaa:

–Beleʉ̃ puruɗe naʉ̃ Judea druaɗe toida ɓʉa. Maʉ̃nebemada Ãcõrẽneba beɗeabariba nãwã jarasia:

6 Beleʉ̃ purura Judaɗebema puru droma ɓea tãẽna dji eɗaara ɓʉẽ́a.

Maʉ̃ puruɗeba dji boroda aɓa zeya.

Maʉ̃ boroba mʉ̃ puru Israelera bia pe eroɓaya.–*

7 Maʉ̃be Herodeba chĩdauɗeba cawa jarabadarãra mẽrã trʉ̃cuasia. Dji warra toɗa ewari cawai carea ãdjía iwiɗisia dji chĩdaura sãʉ̃beɗa odjasida. Maʉ̃ne dji ewarira jarasiɗaa. 8 Ãdjira Beleʉ̃naa wãbibʉrʉɗe Herodeba jarasia:

–Jãma wãnapeɗa dji warra zaquera bio quĩrãcuita iwiɗi wãnadua. Unusiɗara mʉ̃́a jaraɗe zeɗadua mʉ̃ siɗa idjimaa bia beɗeaɗe wãi carea.–

9 2:9-10 Herodeba mãwã jaraɗacarea ãdjira wãsiɗaa. Maʉ̃be chĩdau ʉ̃mãdau odjabariare unupeɗaɗara wayacusa unusiɗaa. Unusiɗaɗe bio ɓʉsriɗasiɗaa. Dji chĩdaura ãdji na wãsia aɓa dji warra zaque ɓʉma piqui nũmebʉrʉɗaa. 11 Deɗe eɗa wãbʉdaɗe warra zaquera dji papa Maria ume ɓʉda unusiɗaa. Ara maʉ̃da chĩrãboroɗe copanenapeɗa warra zaquea bia beɗeasiɗaa. Maʉ̃be ãdjiza baurudeda ewaɗapeɗa warra zaquea oroda, incienso querada, mirra quera siɗa diasiɗaa. 12 Mãwãnacarea Ãcõrẽba ãdjirãa cãĩmocaraɗeba cawabisia Herodemaa jẽda wãrãnamãrẽã. Maʉ̃ bẽrã dewara óareba ãdji druaɗaa wãsiɗaa.

Egipto druaɗaa mĩrũ wãpeɗaɗa

13 Ãdji wãpeɗaɗacarea Ãcõrẽ nezoca bajãnebemada cãĩmocaraɗeba zepeɗa Josea jarasia:

–Herodeba bʉ warra zaquera jʉrʉ ɓʉa beai carea. Maʉ̃ba piradrʉpeɗa bʉ warra zaquera, dji papa siɗa edapeɗa Egipto druaɗaa wãnadua. Mama ɓedua aɓa mʉ̃a jarabʉrʉɗaa.–

14 Ara maʉ̃da Josera diamasi piradrʉpeɗa warra zaquera, dji papa siɗa edapeɗa Egiptoɗaa edesia. 15 Ãdjira mama panesiɗaa aɓa Herode beubʉrʉɗaa. Maʉ̃gʉra mãwãsia Ãcõrẽba jaraɗa quĩrãca. Idjiɗeba beɗeabariba nãwã jarasia: “Mʉ̃a mʉ̃ warrara trʉ̃sia Egiptoɗeba zemãrẽã.”*

Herodeba Beleʉ̃nebema warrarã quenabiɗa

16 Herodeba cawasia chĩdauɗeba cawa jarabadarãba idjira cũrũgasiɗada. Maʉ̃ carea bio quĩrũpeɗa Beleʉ̃nebema warra zaquerã poa uméneba eɗaa queɗeada jũma quenabisia. Ara caitabema siɗa quenabisia. Mãwã osia chĩdauɗeba cawa jarabadarãba chĩdau unupeɗaɗa ewarira idjía jarapeɗaɗa bẽrã. 17 Mãwã jũmarãda sopuasiɗaa Ãcõrẽneba beɗeabari Jeremiaba jaraɗa quĩrãca. Nãwã jarasia:

18 Ramá puruɗe ũrĩsiɗaa aega jĩã ɓʉda, sopua jĩã ɓʉda, idjaɓa aujĩã ɓʉda.

Raquelera idji warrarã carea jĩã ɓʉda mãwã ɓasia.

Idji sobiabiɗira quĩrĩãẽ́ basía idji warrarã neẽ́ ɓeɗa bẽrã.*

Jose Egiptoɗeba jẽda zeɗa

19 Herode beusiɗe Josera waɗi Egiptoɗe ɓasia. Maʉ̃ne bajãnebema nezocada idjimaa cãĩmocaraɗeba zesia. 20 Maʉ̃ nezocaba idjía jarasia:

–Bʉ warra zaque bea quĩrĩã ɓeaɗara beusiɗaa. Maʉ̃ bẽrã piradrʉpeɗa warra zaquera, dji papa siɗa wayacusa Israelɗaa ededua.–

21 Ara maʉ̃da Josera piradrʉpeɗa idji warra zaquera dji papa siɗa Israelɗaa edesia. 22 Baribʉrʉ Joseba ũrĩsia Arquelaoda idji zeza Herode cacuabari Judea druaɗebema boroda ɓesida. Maʉ̃ carea mamaa wãida wayasia. Baribʉrʉ Ãcõrẽba idjía cãĩmocaraɗeba jaraɗa bẽrã Galilea druaɗaa wãsia. 23 Mama puru Nazare abadaɗe ɓesia. Maʉ̃gʉra mãwãsia Ãcõrẽneba beɗeabadarãba nãwã jarapeɗaɗa quĩrãca: “Idjira Nazareɗebemaana aɗia.”*