Mateo

Pariseorãba Jesua ne ununaca obi panana

Marco 8:11-13; Luca 12:54-56

16 Mãwãnacarea ʉ̃cʉrʉ pariseorãda, saduceorã siɗa Jesumaa zesiɗaa. Idjira Ãcõrẽneba zeẽ́ ɓʉda unubiɗida crĩchasiɗaa. Maʉ̃ carea idjía iwiɗisiɗaa ne ununacada omãrẽã. 2 Maʉ̃ne Jesuba panusia:

–Queubʉrʉɗe ʉ̃mãdau ɓaebariare bajãda purea nũmʉbʉrʉ, bãrãba jarabadaa nurẽma ewari biaida. 3 Idjaɓa diapeɗa ʉ̃mãdau odjabariare bajãra purea nũmʉbʉrʉ idjaɓa towa nũmʉbʉrʉ, bãrãba jarabadaa ewari cadjiruaida. Bãrã dji biaca ɓearãba ewari quĩrãra cawa panʉmĩna Ãcõrẽba naʉ̃ ewariɗe o ɓʉra cawaɗacaa. 4 Bãrã dji cadjiruarãba Ãcõrẽra ĩjã ama panʉa. Mʉ̃ra bajãneba ze ɓʉda cawaɗi carea quĩrĩã panʉa mʉ̃a ne ununacada oida. Baribʉrʉ mʉ̃a ne ununacada oẽ́a. Bãrãba aɓabe Ãcõrẽneba beɗeabari Joná mãwãna quĩrãca ununia.–*

Maʉ̃be Jesura ãdjirã amepeɗa wãsia.

Pariseorã harina ẽsãbibari

Marco 8:14-21

5 Amene droma chãnapeɗa Jesu ume nĩbabadarãba cawasiɗaa paʉ̃da quĩrãdoasiɗada. 6 Maʉ̃ne Jesuba jarasia:

–Pariseorã harina ẽsãbibarida, saduceorãne siɗa quĩrãcuitaɗadua.–

7 Jesu ume nĩbabadarãra ãduɓa nãwã beɗeasiɗaa:

–Idjia mãwã jarasia dadjirãba paʉ̃da enepeɗaɗaẽ́ bẽrã.–

8 Jesuba cawa ɓasia cãrẽnebemada beɗea panʉda. Maʉ̃ carea jarasia:

–¿Cãrẽ cãrẽã paʉ̃ra neẽ́ana a panʉ? Bãrãba Ãcõrẽra ĩjãnaẽ́ca ɓʉa. 9 ¿Mʉ̃a oɗara bãrãba unusiɗamĩna cawaɗaẽ́ basica? ¿Quĩrãdoasiɗaca paʉ̃ juesumaneba mʉ̃a ẽberãrãra mil juesuma ne cobiɗada?* ¿Quĩrãdoasiɗaca bãrãba dji aɗubaɗa jʉrʉ pesiɗaɗe jamara jũmasãwã birasiɗada? 10 ¿Idjaɓa quĩrãdoasiɗaca paʉ̃ siete panʉneba mʉ̃a ẽberãrãra mil quĩmãrẽ ne cobiɗada?* ¿Quĩrãdoasiɗaca bãrãba dji aɗubaɗa jʉrʉ pesiɗaɗe jamara jũmasãwã birasiɗada? 11 ¿Sãwãẽrã cawaɗaẽ́ mʉ̃a paʉ̃nebemada beɗeaẽ́ ɓʉda? Mʉ̃a jarasia pariseorã harina ẽsãbibarida, saduceorãne siɗa quĩrãcuitaɗamãrẽã.–

12 Maʉ̃bebʉrʉ cawasiɗaa Jesuba harina ẽsãbibariɗebemada jaraẽ́ ɓasida, ãtebʉrʉ pariseorãba, saduceorãba jaradiabadaɗebemada quĩrãcuitaɗamãrẽã jara ɓasia.

Pedroba Jesuɗebema jaraɗa

Marco 8:27-30; Luca 9:18-21

13 Mãwãnacarea Jesura idji ume nĩbabadarã siɗa Cesarea-Pilipo druaɗe jũẽne wãsiɗaa. Maʉ̃ne Jesuba ãdjía iwiɗisia:

–Mʉ̃, Naʉ̃ Djara Edaɗara ¿ẽberãrãba caida crĩcha panʉ?–

14 Ãdjirãba jarasiɗaa:

–Ʉ̃cʉrʉba jara panʉa bʉra Borocuebari Juaʉ̃da. Dewararãba jara panʉa bʉra Elíada. Dewararãba jara panʉa bʉra Jeremiada wa Ãcõrẽneba beɗeabarida.–

15 Maʉ̃ne Jesuba iwiɗisia:

–Baribʉrʉ bãrãba mʉ̃ra ¿caida crĩcha panʉ?–

16 Simoʉ̃ Pedroba panusia:

–Bʉra Ãcõrẽba ẽdrʉ edabari diai jaraɗaa, Ãcõrẽ zocai ɓʉ Warraa.–

17 Jesuba jarasia:

–Bʉra bio bia ɓʉa, Simoʉ̃, Joná warra. Ni aɓaʉ ẽberãba bʉ́a maʉ̃gʉra cawabiɗaẽ́ basía, ãtebʉrʉ mʉ̃ Zeza bajãne ɓʉba cawabisia. 18 Mʉ̃a jaraya: bʉra Pedroa. Mʉ̃a naʉ̃ mõgara ʉ̃rʉ̃ mʉ̃ puruda oya.* Ni beu biɗa mʉ̃ purura poyaẽ́a. 19 Puruɗebema yave diabʉrʉ quĩrãca mʉ̃a bʉra Ãcõrẽba pe eroɓʉɗebemarã tãẽna dji dromada ɓʉya.* Bʉa naʉ̃ ẽjũãne iduaribiẽ́ra Ãcõrẽ bajãne ɓʉ biɗa iduaribiẽ́a. Idjaɓa bʉa naʉ̃ ẽjũãne iduaribi ɓʉra Ãcõrẽ bajãne ɓʉ biɗa iduaribiya.–

20 Maʉ̃be Jesuba idji ume nĩbabadarãa bio jara ɓʉsia ni aɓaʉa jararãnamãrẽã idjira Ãcõrẽba ẽdrʉ edabari diai jaraɗada.

Jesuba idji beaɗiɗebema jaraɗa

Marco 8:31 –9:1; Luca 9:22-27

21 Maʉ̃ ewariɗeba ʉ̃taa Jesuba idji ume nĩbabadarãa jarabadjia idjira Jerusaleʉ̃ne bia mĩgaida ɓʉda. Nãwã jarasia:

–Mʉ̃ra puruɗebema bororã jʉwaeɗa, sacerdote bororã jʉwaeɗa, judiorã ley jaradiabadarã jʉwaeɗa biɗa bia mĩgaya. Mʉ̃ra beabiɗia baribʉrʉ ewari ũbeaɗe ʉ̃rẽbaya.–

22 Mãwã jaraɗa carea Pedroba Jesura jĩgabe edepeɗa quẽã ɓʉ quĩrãca jarasia:

–Mʉ̃ Boro, mãwã beɗearãdua. Ãcõrẽba bʉra idu mãwãbiẽ́a.–

23 Baribʉrʉ Jesuba jẽda acʉpeɗa Pedroa jarasia:

–Satana, mʉ̃ caitabemada ãyã wãdua. Mʉ̃a oida ɓʉra bʉa obi ama ɓʉa. Bʉa Ãcõrẽ quĩrãca crĩchaẽ́ ɓʉa. Ãtebʉrʉ ẽberã quĩrãca crĩcha ɓʉa.–

24 Maʉ̃be Jesuba idji ume nĩbabadarãa jarasia:

–Aɓaʉba mʉ̃da ẽpẽ quĩrĩã ɓʉbʉrʉ, idjia o quĩrĩã ɓʉra igarapeɗa bia mĩgai carea ɓaida ɓʉa.* Maʉ̃be mʉ̃ra ẽpẽida ɓʉa. 25 Aɓaʉba naʉ̃ ẽjũãne bia ɓaida jʉrʉ ɓaibʉrʉ, jĩrũare bia ɓaẽ́a. Baribʉrʉ aɓaʉda mʉ̃ carea beuibʉrʉ, Ãcõrẽ ume ewariza zocai ɓaya. 26 Ẽberãda naʉ̃ ẽjũãne ne jũma eroɓʉɗe beuibʉrʉ, ¿idjia eroɓʉba carebaica? Beu amaaba idjia eroɓʉɗebemada ¿jũmasãwã poya diai? 27 Wãrãda mʉ̃, Naʉ̃ Djara Edaɗara bajãnebema nezocarã ume zeya mʉ̃ Zeza ʉɓʉaɗeba cawa oi carea. Maʉ̃ne bia opeɗaɗara mʉ̃a bia ɓʉya idjaɓa cadjirua opeɗaɗara biẽ́ ɓʉya. 28 Mʉ̃a wãrãda jaraya: ʉ̃cʉrʉ nama panʉ beuɗi naẽna ebuɗa ununia mʉ̃, Naʉ̃ Djara Edaɗara jũmarã Boro bai carea zebʉrʉda.–*