Mateo
Die awẽrãrãnebema ne jara ɓʉ
25 Bajãne Ɓʉba ẽberãrã pe eroɓʉra naʉ̃ quĩrãca ɓaya: awẽrãrãda die panasiɗaa. Ãdjiza ĩbĩrãda edaɗapeɗa quima edaya ɓʉ umaquĩrãda audiaɓariɗe wãsiɗaa. 2 Maʉ̃ awẽrãra juesuma crĩcha cawa panasiɗaa. Baribʉrʉ juesuma crĩcha neẽ́ panasiɗaa. 3 Dji crĩcha neẽ́ panʉba ãdji ĩbĩrãra edesiɗaa baribʉrʉ olivo dragada edeɗaẽ́ basía dãrã coa eroɓeaɗi carea. 4 Maʉ̃ne dji crĩcha cawa panʉba ãdji ĩbĩrãra edesiɗaa, idjaɓa olivo draga siɗa auɗu edesiɗaa. 5 Dji quima edaya ɓʉ umaquĩrãra dãrãna bẽrã jũmarãda daupeaɗapeɗa cãĩsiɗaa.
6 Maʉ̃ne ariquẽtra beɗeada jĩgua ũrĩsiɗaa: “¡Dji quima edaya ɓʉ umaquĩrãra zebʉrʉa! ¡Idjira audiaɓariɗe wãnadua!” 7 Ara maʉ̃da jũma maʉ̃ awẽrãra piradrʉsiɗaa ãdji ĩbĩrã biara uruabiɗi carea. 8 Maʉ̃ne dji crĩcha neẽ́ panʉba dji crĩcha cawa panʉ́a jarasiɗaa: “Dai ĩbĩrãra quicuaboɗoɗaa. Bãrã olivo dragaɗebemada diaɗadua.” 9 Baribʉrʉ dji crĩcha cawa panʉba panusiɗaa: “Daiba bãrãa diaɗibʉrʉ ni aɓaʉ itea araẽ́a. Biara ɓʉa bãrã itea nẽdoɗe wãnida.” 10 Ara maʉ̃da olivo dragara nẽdoɗe wãsiɗaa. Maʉ̃misa dji quima edaya ɓʉ umaquĩrãra jũẽsia. Maʉ̃be dji crĩcha cawa panʉra idji ume dji ɓʉsriɗa o panʉmaa eɗa wãsiɗaa. Ara maʉ̃da nezocaba eɗa wãbadara jũãtrʉ ɓʉsia.
11 Mãwãnacarea dji olivo draga nẽdoɗe wã pananara jẽda zeɗapeɗa jarasiɗaa: “Dai boro, dai boro, daira idu eɗa wãbidua.” 12 Baribʉrʉ dji quima edabʉrʉ umaquĩrãba jarasia: “Wãrã arada mʉ̃a jaraya: mʉ̃a bãrãra unucaa.”–
13 Maʉ̃be Jesuba jarasia:
–Maʉ̃ carea bãrãra dau ʉɓʉa ɓeaɗadua. Mʉ̃, Naʉ̃ Djara Edaɗa zei ewarira, dji hora siɗa adua panʉa.*
Parataɗeba ne jara ɓʉ
14 Bajãne Ɓʉba ẽberãrã pe eroɓʉra naʉ̃ quĩrãca ɓʉa: ẽberãda dewara druaɗaa wãi carea ɓasia. Maʉ̃ carea idji nezocarãda trʉ̃cuapeɗa idji paratara ãdjiza diasia ne o panʉneba waribiɗamãrẽã. 15 Ãdjiza poya waribiɗida crĩchaɗa quĩrãca diasia. Aɓaʉa paratada mil juesuma diasia. Dewarabemaa mil umé diasia. Dewaraa mil aɓa diasia. Maʉ̃bebʉrʉ wãsia.
16 Dji mil juesuma edaɗara maʉ̃ parata waribi carea trajaɗe wãsia. Mãwã idjia dewara mil juesuma edasia. 17 Ara maʉ̃ quĩrãca dji mil umé edaɗaba dewara mil umé edasia. 18 Baribʉrʉ dji mil aɓa edaɗaba maʉ̃ paratara egoroɗe jou ɓʉsia.
19 Dãrãbʉrʉɗe ãdji borora jẽda zesia. Maʉ̃be idjia parata amenanebemada idji nezocarãa iwiɗisia. 20 Dji mil juesuma edaɗara zepeɗa dewara mil juesuma enepeɗa jarasia: “Mʉ̃ boro, bʉa mil juesuma diaɗaɗeba mʉ̃a dewara mil juesuma enesia.” 21 Dji boroba jarasia: “Bia ɓʉa, nezoca bia, bʉa jipa obaria. Mʉ̃a maãrĩ diaɗara bʉa ariɗe oɗa bẽrã mʉ̃a waiɓʉara bʉ jʉwaeɗa ɓʉya. Eɗa zedua mʉ̃ ume ɓʉsriɗa panani carea.”
22 Maʉ̃be dji mil umé edaɗara zepeɗa jarasia: “Mʉ̃ boro, bʉa mil umé diaɗaɗeba mʉ̃a dewara mil umé enesia.” 23 Dji boroba jarasia: “Bia ɓʉa, nezoca bia, bʉa jipa obaria. Mʉ̃a maãrĩ diaɗara bʉa ariɗe oɗa bẽrã mʉ̃a bʉ́a waiɓʉara bʉ jʉwaeɗa ɓʉya. Eɗa zedua mʉ̃ ume ɓʉsriɗa panani carea.”
24 Baribʉrʉ dji mil aɓa edaɗara zepeɗa jarasia: “Mʉ̃ boro, mʉ̃a cawa ɓʉa bʉa djãrãra quĩrã djuburiacada parata edai carea. Maʉ̃ awara djãrãba upeɗaɗara ewabaria. 25 Maʉ̃ carea mʉ̃ra ne wayasia. Bʉ parata aduabue amaaba egoroɗe jou ɓʉsia. Baribʉrʉ nama eroɓʉa.” 26 Maʉ̃ne dji boroba jarasia: “¡Nezoca cadjirua, bʉra djuburia taɓʉa! Bʉa wãrãda cawa ɓasia mʉ̃a djãrãneda edabarida idjaɓa djãrãba upeɗaɗara ewabarida. 27 Maʉ̃ bẽrã bʉa mʉ̃ paratara dji parata wagabada deɗe ɓʉida ɓasia. Mãwã oɗabara mʉ̃ zebʉrʉɗe mʉ̃ parata edabʉrʉ awara dji eabaɗa siɗa edacasia.”
28 Maʉ̃be dji boroba jarasia: “Idjia parata mil aɓa eroɓʉra jãrĩnapeɗa dji die mil eroɓʉ́a diaɗadua. 29 Mʉ̃a diaɗa auɗu aɓaʉba eneibʉrʉ mʉ̃a maʉ̃ ẽberãa auɗuara diaya. Baribʉrʉ mʉ̃a diaɗa auɗu eneẽ́bʉrʉ, mʉ̃a maãrĩ diaɗa siɗa jũma jãrĩya. 30 Jãʉ̃ nezoca djuburia taɓʉra dajada pãĩmane ɓatabueɗadua. Mama ɓeara aujĩã panania idjaɓa puaba quiɗa ĩchia panania.”
Jũmarã cawa oiɗebema
31 Mʉ̃, Naʉ̃ Djara Edaɗara jũma bajãnebema nezocarã ume ʉɓʉa bara zebʉrʉɗe, mʉ̃ bugue quĩrãwãrẽã ɓʉɗe chũmeya cawa oi carea. 32 Maʉ̃ne druazabema ẽberãrãda mʉ̃ quĩrãpita zeɗia. Maʉ̃gʉrãra mʉ̃a awara awara ɓʉya oveja wagabariba idji ovejara chiwatu ume ãbaa pananada awara ɓʉbari quĩrãca. 33 Dji oveja quĩrãca ɓeada mʉ̃ jʉwa araare ɓʉya. Dji chiwatu quĩrãca ɓeada mʉ̃ jʉwa acʉare ɓʉya. 34 Maʉ̃be mʉ̃, dji Boroba jʉwa araare duanʉrãa nãwã jaraya:
“Bãrã, mʉ̃ Zezaba bia ɓʉcuaɗarã, zeɗadua. Idji puruɗe bia pananadua. Naʉ̃ ẽjũã oɗa ewariɗeba ʉ̃taa maʉ̃ purura bãrã itea o ɓʉcãrĩa. 35 25:35-36 Mʉ̃ jarra ɓasiɗe bãrãba ne cobisiɗaa; mʉ̃ opichia ɓasiɗe baido dawasiɗaa; mʉ̃ra drua ãĩbema quĩrãca pʉrrʉa nĩbasiɗe bãrã deɗe bia edasiɗaa; mʉ̃a cacuaɗe jʉ̃i carea neẽ́ ɓasiɗe mʉ̃́a diasiɗaa; mʉ̃ cacua biẽ́ ɓasiɗe acʉɗe zesiɗaa; idjaɓa mʉ̃ra preso ɓasiɗe acʉɗe zesiɗaa.”
37 Maʉ̃ne dji jipa ɓeaba iwiɗiɗia: “Dai Boro, ¿sãʉ̃be bʉra jarra ɓasi? ¿Sãʉ̃be daiba bʉra ne cobisiɗa? ¿Sãʉ̃be bʉra opichia ɓasi? ¿Sãʉ̃be daiba bʉra baido dawasiɗa? 38 ¿Sãʉ̃be bʉra drua ãĩbema quĩrãca pʉrrʉa nĩbasi? ¿Sãʉ̃be dai deɗe bʉra bia edasiɗa? ¿Sãʉ̃be daiba bʉ cacuaɗe jʉ̃mãrẽã diasiɗa? 39 ¿Sãʉ̃be bʉra cacua biẽ́ ɓʉɗe wa preso ɓʉɗe daiba acʉɗe wãsiɗa?”
40 Maʉ̃ne mʉ̃a panuya: “Wãrã arada mʉ̃a jaraya: bãrãba mʉ̃ djabarã dji eɗaara queɗeada carebasiɗaɗe mʉ̃da carebasiɗaa.”
41 Maʉ̃be mʉ̃ jʉwa acʉare duanʉrãa jaraya: “Bãrã, Ãcõrẽba biẽ́ ɓʉɗarã, mʉ̃ caitabemada ãyã wãnadua tʉbʉ urua quicaɗaa. Maʉ̃gʉra Ãcõrẽba coa ɓʉsia diauruda, idji nezocarã siɗa cawa oi carea. 42 25:42-43 Mʉ̃ jarra ɓasiɗe bãrãba ne cobiɗaẽ́ basía; mʉ̃ opichia ɓasiɗe baido dawaɗaẽ́ basía; drua ãĩbema quĩrãca pʉrrʉa nĩbasiɗe bia edaɗaẽ́ basía; mʉ̃a cacuaɗe jʉ̃i carea neẽ́ ɓasiɗe bãrãba diaɗaẽ́ basía; mʉ̃ cacua biẽ́ ɓasiɗe, preso ɓasiɗe biɗa bãrãba mʉ̃ra acʉɗe zeɗaẽ́ basía.”
44 Maʉ̃ne ãdjirãba iwiɗiɗia: “Dai Boro, daiba bʉra jarra ɓʉda, opichia ɓʉda, drua ãĩbema quĩrãca pʉrrʉa nĩda, cacuaɗe jʉ̃i carea neẽ́ ɓʉda, cacua biẽ́ ɓʉda, wa preso ɓʉda ununaca basía. ¿Sãʉ̃be bʉra carebaɗaẽ́ basi?”
45 Maʉ̃ne mʉ̃a panuya: “Wãrã arada mʉ̃a jaraya: bãrãba dji eɗaara queɗeada carebaɗaẽ́ basiɗe mʉ̃da carebaɗaẽ́ basía.” 46 Maʉ̃be Ãcõrẽba ãdjirãra tʉbʉ urua quicaɗaa ɓatacuaya, baribʉrʉ dji jipa ɓeara idji ume ewariza zocai ɓeaɗamãrẽã edeya.–