Luca

Wẽrãrãba Jesu careba panana

8 Mãwãnacarea Jesura puru waiɓʉa ɓeaza idjaɓa puru zaque ɓeaza wãsia. Maʉ̃ne jarabadjia Ãcõrẽra ãdji Boro bai carea zebʉrʉda. Maʉ̃ beɗea bia jaradia nĩne idjia doce edaɗarãda idji ume nĩbabadjiɗaa. 2 Maʉ̃ awara wẽrãrãda idji ume nĩbabadjiɗaa. Maʉ̃ wẽrãrã ʉ̃cʉrʉ cacua biẽ́ ɓeaɗada Jesuba biabisia idjaɓa ʉ̃cʉrʉ jai bara ɓeaɗada Jesuba dji jaira ãyã jʉretasia. Aɓa Maria Magdalena basía.* Jesuba idji cacuaɗebemada jairãda siete ãyã jʉretasia. 3 Cuza quima Juana siɗa ɓasia. Cuzaba Herode deɗebemada jũma cawa obadjia.* Susana siɗa ɓasia. Maʉ̃ awara dewara wẽrãrãda zocãrã panasiɗaa. Ãdjirãba Jesu carebaɗi carea ne diabadjiɗaa.

Pea poɗaɗebema ne jara ɓʉ

Mateo 13:1-9; Marco 4:1-9

4 Zocãrã ẽberãrã puruzabemada Jesumaa zesiɗaa. Maʉ̃ne ne jara ɓʉɗeba Jesuba ãdjirãa nãwã jaradiasia:

5 –Ẽberãda idji ẽjũãne ne poɗe wãsia. Mãwã po nĩne ʉ̃cʉrʉ tara oɗe ɓaecuasia. Maʉ̃ bẽrã ẽberãrãba ʉ̃rʉ̃ tʉgasiɗaa idjaɓa ĩbanaba mĩcuasiɗaa. 6 Ʉ̃cʉrʉ tara mõgara ʉ̃rʉ̃ egoro nãũcha ɓʉɗe ɓaecuasia. Tununacarea mãcua baido neẽ́ ɓʉ bẽrã jũma purrubasia. 7 Ʉ̃cʉrʉ tara ẽjũã ʉrʉiɗa ɓʉɗe ɓaecuasia. Tununacarea jʉ̃cara ʉrʉ bara ɓʉba bʉrá quenasia. 8 Baribʉrʉ ʉ̃cʉrʉ tara ẽjũã biaɗe ɓaecuasia. Maʉ̃ tara bia wariɗapeɗa bio zausiɗaa.–*

Mãwã jarapeɗa Jesuba jĩgua jarasia:

–Dji cʉwʉrʉ bara ɓʉba quĩrãcuita ũrĩdua.–

Pea poɗaɗebema Jesuba cawa jaraɗa

Mateo 13:10-23; Marco 4:10-20

9 Maʉ̃ carea Jesu ume nĩbabadarãba idjía iwiɗisiɗaa:

–Bʉa mãwã ne jara ɓʉɗeba jaradiaɗaba ¿cãrẽda jara ɓʉ?–

10 Jesuba panusia:

–Ãcõrẽba ẽberãrã pe eroɓʉɗebemada jũmarãa cawabiẽ́ ɓʉmĩna bãrãa cawabi ɓʉa. Baribʉrʉ dewararãa mʉ̃a ne jara ɓʉɗeba beɗea ɓʉa Ãcõrẽ cartaɗe jara ɓʉra mãwãmãrẽã. Nãwã jara ɓʉa:

Naʉ̃ ẽberãrãba ũrĩ panʉmĩna cawaɗaẽ́a. Unu panʉmĩna cawaɗaẽ́a.*

11 Mʉ̃a ne jara ɓʉɗeba jaraɗara naʉ̃gʉa: dji tara Ãcõrẽ beɗeaa. 12 Ta oɗe ɓaeɗaba naʉ̃da jara ɓʉa: ʉ̃cʉrʉ ẽberãrãba Ãcõrẽ beɗeada ũrĩnapeɗa diauruba maʉ̃ beɗea ãdji soɗe jũẽnara quĩrãdoabibaria ĩjãrãnamãrẽã. Mãwã ãdjirãra cadjiruaɗebemada ẽdrʉɗacaa. 13 Ta mõgara ʉ̃rʉ̃ egoro nãũcha ɓʉɗe ɓaeɗaba naʉ̃da jara ɓʉa: ʉ̃cʉrʉ ẽberãrãba Ãcõrẽ beɗeada bio ɓʉsriɗa edabadaa baribʉrʉ bio carra jidaɗaca bẽrã soɗeba ĩjãnacaa. Maʉ̃ bẽrã dãrãẽ́ne bia mĩgabʉdaɗe idu ɓʉbadaa. 14 Ta ẽjũã ʉrʉiɗa ɓʉɗe ɓaeɗaba naʉ̃da jara ɓʉa: ʉ̃cʉrʉ ẽberãrãba Ãcõrẽ beɗeada ũrĩnapeɗa naʉ̃ ẽjũãne sãwã bia ɓeaɗida, ne jũma eroɓeaɗida, sãwã ɓʉsriɗaɗi siɗa biara crĩchabadaa. Maʉ̃ bẽrã ãdjia ũrĩpeɗaɗara igaraɗapeɗa wariɗacaa. 15 Baribʉrʉ ta ẽjũã biaɗe ɓaeɗaba naʉ̃da jara ɓʉa: so jipa ɓeaba idjaɓa crĩcha bia ɓeaba Ãcõrẽ beɗeara ũrĩnapeɗa wãrãda ĩjãbadaa. Ãdjia ĩjã panʉra idu ɓʉɗaca bẽrã ne biada obadaa.

Ĩbĩrãnebema ne jara ɓʉ

Mateo 5:14-15; Marco 4:21-25

16 Ni aɓaʉba ĩbĩrãda coaɗapeɗa mẽrã nũmʉnacaa wa epeɗeco droma edre ɓʉɗacaa.* Ãtebʉrʉ ʉ̃tʉ dji ĩbĩrã ɓʉbadaɗe nũmʉbadaa dji deɗe eɗa zebʉdarãba ʉ̃naa ununamãrẽã. 17 Ara maʉ̃ quĩrãca ne jũma ebuɗa ɓʉẽ́ra mẽrã ɓeẽ́a. Dadjia cawaɗaẽ́ panʉra Ãcõrẽba ebuɗa cawabiya. 18 Maʉ̃ bẽrã bio quĩrãcuita ũrĩ pananadua. Aɓaʉba wãrãda cawaibʉrʉ, Ãcõrẽba auɗuara cawabiya. Baribʉrʉ adua ɓʉba cawa ɓʉda crĩchaibʉrʉ idjia crĩcha ɓʉ siɗa Ãcõrẽba jãrĩya.

Jesu ẽberãrã idjimaa zepeɗaɗa

Mateo 12:46-50; Marco 3:31-35

19 Ewari aɓa Jesu papaba, idji djabarã biɗa idjira acʉɗe wãsiɗaa. Baribʉrʉ poya araa jũẽnaẽ́ basía ẽberãrãda zocãrã duanʉ bẽrã. 20 Maʉ̃ carea ʉ̃cʉrʉba idjía jarasiɗaa:

–Bʉ papara, bʉ djabarã siɗa dajadaare panʉa. Ãdjia bʉ acʉɗe ze panʉa.–

21 Jesuba jarasia:

–Ãcõrẽ beɗea ũrĩnapeɗa ĩjã ɓeada mʉ̃ papaa idjaɓa mʉ̃ djabarãa.–

Jesuba amene bogozoara tumabiɗa

Mateo 8:23-27; Marco 4:35-41

22 Ewari aɓa Jesuba idji ume nĩbabadarãa nãwã jarasia:

–Amene wa quĩrãrẽ wãnadrʉ.–

Ara maʉ̃da jãbaɗe ɓadoɗapeɗa wãsiɗaa. 23 Chãbʉdaɗe Jesura cãĩ ɓasia. Mãwã ɓʉɗe nãũrãda dji cãbãyã puá nũmesia. Maʉ̃ bẽrã jãbara baidoba biru ɓaeboɗosia. Aɓeɗa minijĩchiaɗe panasiɗaa. 24 Maʉ̃ carea Jesura ʉ̃rʉ̃manapeɗa nãwã jarasiɗaa:

–¡Jaradiabari, Jaradiabari, dadjirãra ɓarruboɗoɗaa!–

Jesura piraɓaripeɗa nãũrãa, baido bogozoa biɗa jarasia tumanamãrẽã. Ara maʉ̃da jũma tuma nũmesia. 25 Maʉ̃be idji ume nĩbabadarãa nãwã jarasia:

–Bãrãba ĩjã panʉra ¿sãwãsi?–

Baribʉrʉ idji ume nĩbabadarãba ne wayaaba cawa crĩchaɗaẽ́ basía. Ara ãdjiduɓa iwiɗi duanesiɗaa:

–¿Naʉ̃gʉra caida jãwã ɓʉ? Idji beɗeara nãũrãba, baido bogozoa biɗa ĩjãbadaa.–*

Jesuba jai zocãrã ãyã jʉretaɗa

Mateo 8:28-34; Marco 5:1-20

26 Amene chãnapeɗa Gerasa druaɗe jũẽsiɗaa.* Gerasara Galilea amene wa quĩrãrẽ ɓʉa. 27 Jesu drua ɓadobʉrʉɗe ẽberã maʉ̃ puruɗebemada idjimaa zesia. Maʉ̃ ẽberãra jai bara ɓʉda dãrãbʉrʉ basía. Idjia cacuaɗe ni cãrẽ siɗa jʉ̃ca basía. Deɗe biɗa ɓaca basía, ãtebʉrʉ beuɗarã tʉɓaribada uriaɗe ɓabadjia. 28 Idjia Jesu unusiɗe ɓiasia. Maʉ̃be Jesu quĩrãpita chĩrãboroɗe coɓepeɗa jĩgua jarasia:

–Jesu, Ãcõrẽ dji Dromaara ɓʉ Warra, ¿cãrẽ cãrẽã mʉ̃ra mĩã sẽ ɓʉ? ¡Mʉ̃ djuburia mʉ̃ra biẽ́ ɓʉrãdua!–

29 Jaiba mãwã jarasia Jesuba maʉ̃ ẽberã cacuaɗebemada ẽdrʉmãrẽã jaraɗa bẽrã. Dãrãbʉrʉ basía maʉ̃ jaiba ẽberãra biẽ́ o eroɓʉda. Dewararãba dji ẽberãra carenaba jʉ̃napeɗa quĩrãcuita wagabadjiɗamĩna carenara tucuapeɗa ẽberã neẽ́maa jaiba edebadjia. 30 Maʉ̃ne Jesuba idjía iwiɗisia:

–¿Bʉra casa trʉ̃ jarabada?–

Idjia panusia:

–Mʉ̃ra Cãbana abadaa.–*

Idjia mãwã jarasia ãdjira ẽberã cacuaɗe bio cãbana panʉ bẽrã. 31 Maʉ̃ne ãdjia Jesua beɗea djuburiasiɗaa uria dau cʉre ɓʉɗaa diabuerãmãrẽã.* 32 Mãwã panʉne ãdji caita eya zaqueɗe chinada zocãrã ne co duanasiɗaa. Maʉ̃ carea jairãba Jesua beɗea djuburiasiɗaa maʉ̃ china cacuaɗe idu eɗa wãbimãrẽã. Maʉ̃ne Jesuba iduaribisia. 33 Ara maʉ̃da jairãra ẽberã cacuaɗebemada ẽdrʉɗapeɗa china cacuaɗe eɗa wãcuasiɗaa. Maʉ̃be cawaẽ́ne chinara pirapoɗapeɗa perawaɗeba daiɗu tẽũcuaɗapeɗa nãbʉrʉ quinisiɗaa.

34 Maʉ̃ unusiɗaɗe dji china waga pananara daupera pira wãsiɗaa. Ãdjia unupeɗaɗara puruɗe ɓeaa, puru jĩga ɓeaa biɗa nẽbʉrʉsiɗaa. 35 Ẽberãrãba acʉɗe zesiɗaɗe dji ẽberã jai zocãrã eroɓaɗara Jesu caita chũmʉda unusiɗaa. Quĩrã ɓapeɗa cacuaɗe jʉ̃badara jʉ̃ ɓasia. Maʉ̃ carea ẽberãrãra dauperasiɗaa. 36 Dji unupeɗaɗaba nẽbʉrʉsiɗaa sãwãbʉrʉ idjira biasida. 37 Maʉ̃ba jũma Gerasaɗebemarãra ne wayaɗapeɗa Jesua beɗea djuburiasiɗaa ãdji druaɗebemada ãyã wãmãrẽã. Ara maʉ̃da Jesura wayacusa jãbaɗe ɓadopeɗa Galileaɗaa wãsia. 38 Wãi naẽna ẽberã jai bara ɓaɗaba Jesua beɗea djuburiasia idji ume wãi carea. Baribʉrʉ Jesuba nãwã jarasia:

Diguiɗaa wãpeɗa jũmarãa jaradua Ãcõrẽba bʉ ume ne waiɓʉa oɗada.–

Ara maʉ̃da ẽberãra idji puruɗaa wãsia. Mama jũmarãa nẽbʉrʉsia Jesuba idji ume ne waiɓʉa oɗada.

Jesuba wẽrãcau ʉ̃rẽbabiɗa

Mateo 9:18-26; Marco 5:21-43

40 Galilea druaɗe ẽberãrã cãbana panʉba Jesura jʉ̃ã panasiɗaa. Idji jũẽsiɗe ãdjirãba bio capipia edasiɗaa. 41 8:41-42 Maʉ̃ne ẽberã Jairo abadada idjimaa zesia. Maʉ̃ Jairora judiorã dji jʉrebada deɗe dji boro basía. Idjia cauda aɓabe eroɓasia doce poa ɓʉda. Maʉ̃ wẽrãcaura jũãcãyã nũmasia. Jairora Jesu jĩrũ caita coɓepeɗa beɗea djuburiasia idji diguiɗaa wãmãrẽã.

Ara maʉ̃da Jesura wãsia baribʉrʉ wãbʉrʉɗe ẽberãrãba idjira pẽsua eropanasiɗaa. 43 Ãdjirã tãẽna wẽrã doce poa oamiaba jida ɓʉda nĩbasia. Maʉ̃ wẽrãba nẽãrã diabadarãa idji paratara jũma diaɗoasia,* baribʉrʉ ni aɓaʉba poya biabiɗaẽ́ basía. 44 Wẽrãra jẽdaareba zepeɗa Jesuba cacuaɗe jʉ̃ ɓʉ iɗe maãrĩ tãsia. Ara maʉ̃da oara poasia. 45 Maʉ̃ne Jesuba iwiɗisia:

–¿Caiba mʉ̃ra tãsi?–

Jũmarãba panusiɗaa tãnaẽ́ panʉda. Maʉ̃ carea Pedroba jarasia:

–Jaradiabari, ẽberãrãba bʉra pẽsua eropanʉa. ¿Sãwã bʉa iwiɗi ɓʉ caiba bʉra tãsida?–*

46 Baribʉrʉ Jesuba jarasia:

–Aɓaʉba mʉ̃ra tãsia. Mʉ̃a cawa ɓʉa mʉ̃ ʉɓʉaɗeba idjira biasida.–

47 Wẽrãba oɗara poya mẽrãẽ́da cawaɗa bẽrã ne wayaaba ure nũmʉda wãpeɗa Jesu jĩrũ caita chĩrãboroɗe coɓesia. Maʉ̃be jũmarã quĩrãpita idjia jarasia cãrẽ cãrẽã Jesura tãsida idjaɓa ara maʉ̃ba biasida. 48 Maʉ̃ne Jesuba jarasia:

–Cau, wãrãda biaida ĩjãna bẽrã bʉra biasia. Necai wãdua.–

49 Waɗi mama beɗea panʉne Jairo deɗeba aɓa zepeɗa Jairoa nãwã jarasia:

–Bʉ caura jaiɗasia. Jaradiabarira waa mĩã sẽrãdua.–

50 Maʉ̃ ũrĩsiɗe Jesuba jarasia:

–Ne wayarãdua. Bʉa soɗeba ĩjãibʉrʉ, idjira ʉ̃rẽbaya.–

51 Jairo deɗe jũẽpeɗa Jesuba Pedroda, Santiagoda,* Juaʉ̃da, dji wẽrãcau zezada, dji papa siɗa eɗa edesia. Waa dewarada eɗa wãbiẽ́ basía. 52 Maʉ̃ne ẽberãrãda dji wẽrãcau carea aujĩã duanasiɗaa. Maʉ̃ carea Jesuba jarasia:

–Jĩãrãnadua, naʉ̃ wẽrãcaura beuẽ́ ɓʉa, ãtebʉrʉ cãĩ ɓʉa.–

53 Maʉ̃ carea ẽberãrãba Jesumaa acʉɗapeɗa ipiɗasiɗaa, wẽrãcaura wãrãda beusida cawa panana bẽrã. 54 Baribʉrʉ Jesuba dji wẽrãcau jʉwaɗe jidapeɗa jarasia:

–¡Cau zaque, piraɓaridua!–

55 Mãwã jarabʉrʉɗe wẽrãcaura ʉ̃rẽbapeɗa piraɓarisia. Maʉ̃be Jesuba jarasia wẽrãcaura ne cobiɗamãrẽã. 56 Maʉ̃ unusiɗaɗe djibarirãba cawa crĩchaɗaẽ́ basía. Baribʉrʉ Jesuba ãdjía jarasia ni aɓaʉa jararãnamãrẽã.