Luca

Lucaba Teopiloa ɓʉ́ diabueɗa

1 Ãcõrẽba dadjirã tãẽna oɗaɗebemada zocãrãba ɓʉ́ quĩrĩãsiɗaa. 2 Jũma maʉ̃ oɗa unupeɗaɗaba nẽbʉrʉsiɗaa idjaɓa jaradiasiɗaa. Dji carta ɓʉpeɗaɗaba maʉ̃da ɓʉsiɗaa. 3 Bʉ dji droma ɓʉ Teopilo, mʉ̃a biɗa jũma maʉ̃ mãwãnada bio quĩrãcuita iwiɗiɗa bẽrã, mʉ̃maarã bia ɓʉa bʉ itea ariɗe ɓʉ́ diabueida. 4 Mãwã bʉa cawaya bʉ́a jaradiapeɗaɗara wãrãda.

Borocuebari Juaʉ̃ toɗi cawabiɗa

5 Herode Judea druaɗebema boro basiɗe sacerdote Zacariada ɓasia.* Maʉ̃ Zacariara sacerdoterã idji ume trajabada siɗa Abíarã abadjiɗaa.* Dji quima Elisabera Aaroʉ̃ ẽberãrãneba yõna basía. 6 Ãdjira umena Ãcõrẽ quĩrãpita jipa panasiɗaa. Ãcõrẽba obi jaraɗara jũma ĩjã o panʉ bẽrã biẽ́ jaraɗi neẽ́ panasiɗaa. 7 Baribʉrʉ Elisabera warra toca baɗa bẽrã warra neẽ́ panasiɗaa. Maʉ̃ awara bio drõãda panasiɗaa.

8 Mãwã panʉne Zacaria Ãcõrẽ de dromane trajai ewarida jũẽsia. Maʉ̃ bẽrã idjira, waabema sacerdoterã idji ume trajabada siɗa Ãcõrẽ quĩrãpita traja panasiɗaa. 9 Maʉ̃ne sacerdoterãba obada quĩrãca ne jemenesiɗaa caiba Ãcõrẽ de dromane eɗa incienso querada bá diaida ɓʉ cawaya. Maʉ̃ne Zacaria trʉ̃da odjasia.

10 Incienso quera bá diai horada jũẽna bẽrã Zacariara eɗa wãsia.* Maʉ̃ne puruba dajadaare Ãcõrẽa iwiɗi panasiɗaa. 11 Mãwã ɓʉɗe bajãnebema nezocada quera bá diabada jʉwa araare odjasia. 12 Idji unusiɗe Zacariara bio dauperapeɗa aɓeɗa cawa crĩchaẽ́ basía. 13 Baribʉrʉ bajãnebema nezocaba jarasia:

–Ne wayarãdua. Bʉa Ãcõrẽa iwiɗi ɓaɗara idjia ũrĩsia. Bʉ quima Elisabeba warrada toya. Idji trʉ̃ra ɓʉdua Juaʉ̃. 14 1:14-15 Maʉ̃ warra carea zocãrã ɓʉsriɗaɗia. Idjira Ãcõrẽ quĩrãpita dji droma bai bẽrã bʉ siɗa bio ɓʉsriɗa ɓaya. Uva ɓa aseada, itua siɗa doca baya. Ɓiteɗa ɓebʉrʉ ewariɗeba Ãcõrẽ Jaurera idji ume ɓaya.* 16 Idjia zocãrã israelerãra Ãcõrẽmaa jẽda zebiya. 17 Elíaba eroɓaɗa jaureda, ʉɓʉa siɗa bʉ warraba eroɓaya. Maʉ̃neba idjira dadjirã Boro na wãya dji zezada ãdji warrarã ume ibiabi carea.* Maʉ̃ awara ĩjãnaẽ́ ɓea siɗa carebaya jipa ɓeaba crĩchabada quĩrãca crĩchaɗamãrẽã. Mãwã carebaya puruba dadjirã Borora bia edaɗamãrẽã.–

18 Maʉ̃ne Zacariaba bajãnebema nezocaa iwiɗisia:

–¿Mʉ̃a sãwã cawai bʉa jara ɓʉra wãrãda? Mʉ̃ra bio drõãda ɓʉa. Mʉ̃ quima siɗa djorada ɓʉa.–

19 Bajãnebema nezocaba Zacaria jarasia:

–Mʉ̃ra Gabriel, Ãcõrẽ nezocaa. Idjia mʉ̃ra bʉmaa diabuesia maʉ̃ beɗea biada jaramãrẽã. 20 Mʉ̃a jara ɓʉra Ãcõrẽba ɓʉɗa ewariɗe wãrãda mãwãya. Baribʉrʉ ĩjãnaẽ́ bẽrã bʉra quĩrãme cara ɓeya aɓa bʉ quima warra tobʉrʉɗaa.–

21 Maʉ̃misa ẽberãrãba dajada jʉ̃ã panasiɗaa. Ãdjia cawaɗaẽ́ panasiɗaa sãwãẽrã Zacariara jãcua eɗa dãrãbʉrʉda. 22 Mãwã ɓʉɗe idjira dajadaa zesia baribʉrʉ poya beɗeaẽ́ basía. Quĩrãme cara ɓeɗa bẽrã aɓabe sẽyãneba beɗea ɓasia. Maʉ̃ba ẽberãrãba cawasiɗaa Ãcõrẽba idjía ne unubisida.

23 Idji Ãcõrẽ de dromane trajai ewari jõnacarea Zacariara diguiɗaa wãsia. 24 Mãwãnacarea idji quima Elisabera ɓiogoa ɓesia. Maʉ̃ bẽrã Elisabera jeɗeco juesuma diguiɗa ɓesia. Nãwã crĩchasia: 25 “Ãcõrẽba mʉ̃ra carebasia ɓiogoa ɓemãrẽã. Jãwã bia oɗaba mʉ̃ quĩrã perara ãyã ɓʉsia. Ẽberãrãba mʉ̃ra waa biẽ́ jaraɗaẽ́a.”

Bajãnebema nezocaba Mariaa jaraɗa

26 1:26-27 Elisabe sei jeɗeco ɓiogoa ɓeɗacarea Ãcõrẽba bajãnebema nezoca Gabrielda Galilea druaɗe Nazare puruɗaa diabuesia awẽrã umaquĩrã adua ɓʉ Mariamaa. Maʉ̃ Mariara Jose ume dji edaɗi carea beɗea bia panasiɗaa. Josera Daviɗeba zeɗa basía. 28 Bajãnebema nezocara Mariama jũẽpeɗa nãwã jarasia:

–¡Mẽrã! Ãcõrẽba bʉra bia eroɓʉa.* Idjira bʉ ume ɓʉa.–

29 Maʉ̃ beɗea ũrĩsiɗe Mariaba aɓeɗa cawa crĩchaẽ́ basía cãrẽ cãrẽã bajãnebema nezocara mãwã beɗea ɓʉda. 30 Maʉ̃ne bajãnebema nezocaba idjía jarasia:

–Maria, ne wayarãdua; Ãcõrẽba bʉra careba ɓʉa. 31 Maʉ̃ bẽrã bʉra ɓiogoa ɓepeɗa warrada toya. Maʉ̃ warra trʉ̃ra ɓʉdua Jesu.* 32 Idjira dji droma baya idjaɓa Ãcõrẽ dji dromaara ɓʉba idji Warraaɗa aya. Ãcõrẽba idjira israelerã boroda ɓʉya idji drõãenabema Davi ɓaɗa quĩrãca. 33 Idjira Jacoboɗeba yõpeɗaɗarã boroda ɓaya. Ewariza ãdjirãra pe eroɓaya.–*

34 Maʉ̃ne Mariaba bajãnebema nezocaa iwiɗisia:

–Mʉ̃ra umaquĩrã adua ɓʉda ¿sãwã ɓiogoa ɓei?–

35 Bajãnebema nezocaba panusia:

–Ãcõrẽ Jaurera bʉmaa zepeɗa idji ʉɓʉara bʉ ume ɓaya. Maʉ̃ bẽrã idjia dia ɓʉ warra bʉa tobʉrʉda Ãcõrẽba idji Warraaɗa aya. 36 Bʉ apipi Elisabe siɗa warra toya.* Djorada ɓʉmĩna idjaɓa warra tocaaɗa abadamĩna sei jeɗeco ɓʉa ɓiogoa ɓʉda. 37 Ãcõrẽba poya oẽ́ra neẽ́a.–

38 Mariaba panusia:

–Mʉ̃ra Ãcõrẽ nezocaa. Bia ɓʉa bʉa jaraɗa quĩrãca idjia oida.–

Maʉ̃be bajãnebema nezocara idji quĩrãpitabemada wãsia.

Mariaba Elisabe acʉɗe wãna

39 Mãwãnacarea Mariara isabe Elisabe puruɗaa wãsia. Maʉ̃ purura Judea drua eyaiɗa ɓʉɗe ɓʉa. 40 Mama Zacaria deɗe eɗa wãpeɗa Elisabea jarasia:

–¡Mẽrã!–

41 Elisabeba Maria beɗea ũrĩbʉrʉɗe idji warra ɓiteɗa quirura domicasia. Ara maʉ̃da Elisabera Ãcõrẽ Jaureɗeba ɓesia. 42 Maʉ̃ne Mariaa nãwã jĩgua jarasia:

–Bʉra wãrãda dewara wẽrãrã cãyãbara Ãcõrẽba biara careba ɓʉa. Bʉ warra siɗa Ãcõrẽba bio bia ɓʉya. 43 ¿Mʉ̃ra cai mʉ̃ Boro papaba jãwã acʉɗe ze ɓʉra? 44 Ara bʉ beɗea ũrĩbʉrʉɗe warra mʉ̃ ɓiteɗa ɓʉra ɓʉsriɗaba domicasia. 45 Ãcõrẽba jaraɗara wãrãda mãwãida ĩjãna bẽrã bʉra bio bia ɓʉa.–

46 Maʉ̃ne Mariaba jarasia:

Soɗeba mʉ̃a jaraya: Ãcõrẽra dji dromaa.*

47 Ãcõrẽ mʉ̃ ẽdrʉ edabari ume mʉ̃ra bio ɓʉsriɗa ɓʉa.

48 1:48-49 Idjia za quiru nezocara bia eroɓʉa.

Iɗiba ʉ̃taa jũmarãba jaraɗia Ãcõrẽ jũma poya ɓʉba mʉ̃ra bio careba ɓʉda, mʉ̃ itea ne waiɓʉada o ɓʉ bẽrã.

¡Aɓa idjidrʉ Ãcõrẽa! 50 Maʉ̃ bẽrã idji waya ɓeara ewariza quĩrã djuburia ɓaya.

51 Ãcõrẽba idji ʉɓʉaɗeba ne waiɓʉada ocuasia.

Ara ãdjiduɓa dji dromada crĩcha ɓeara idjia memenebisia.

52 Dji droma ɓeaɗara ãyã ɓʉcuapeɗa dji eɗaara queɗeada dji dromada ɓʉcuasia.

53 Dji ne neẽ́ queɗeaa ne jũma biada diasia, baribʉrʉ dji ne bara ɓeara jʉwa bari ãyã wãbicuasia.

54 1:54-55 Idji nezoca Israel purura carebasia. Idjia Abrahaʉ̃ra, idjiɗeba yõbʉdarã siɗa ewariza quĩrã djuburiaya dadji drõã naẽnabemarãa jaraɗa quĩrãca.

56 Mariara Elisabe deɗe jeɗeco ũbea ɓapeɗa diguiɗaa wãsia.

Borocuebari Juaʉ̃ toɗa

57 Idji ewari jũẽsiɗe Elisabera warra tosia. 58 Idji caita panabadaba, idji ẽberãrã biɗa maʉ̃ ũrĩsiɗaɗe idji ume ɓʉsriɗasiɗaa Ãcõrẽba bio quĩrã djuburiaɗa bẽrã.

59 Warra toɗacarea ocho ewari ɓʉɗe ãbaa dji jʉresiɗaa warra cacuara wẽãgoɗi carea.* Maʉ̃ne ʉ̃cʉrʉba idji zeza trʉ̃ Zacariada ɓʉ́ quĩrĩã panasiɗaa. 60 Baribʉrʉ dji papaba jarasia:

–Mãwã trʉ̃ ɓʉɗaẽ́a, ãtebʉrʉ idji trʉ̃ra ɓʉɗia Juaʉ̃.–

61 Ãdjirãba jarasiɗaa:

–¿Cãrẽã maʉ̃ trʉ̃ra ɓʉɗi? Bãrã ẽberãrã tãẽna maʉ̃ trʉ̃ra neẽ́a.–

62 Maʉ̃be dji zeza Zacariaa sẽyãneba iwiɗisiɗaa cãrẽ trʉ̃da ɓʉ́ quĩrĩã ɓʉ cawaya. 63 Maʉ̃ carea Zacariaba bacuru peweɗeada enebisia. Maʉ̃gʉɗe nãwã ɓʉsia: “Idji trʉ̃ra ɓʉɗia Juaʉ̃.”

Maʉ̃ unusiɗaɗe jũmarãba cawa crĩchaɗaẽ́ basía. 64 Ara maʉ̃ne Zacariara quĩrãme cara ɓaɗada waya beɗeasia. Ara maʉ̃da idjia Ãcõrẽa bia beɗeasia.

65 Jũma ãdji caita panabadaba maʉ̃nebema ũrĩsiɗaɗe Ãcõrẽ waya panʉba jũma Judea drua eyaiɗa ɓʉɗe nẽbʉrʉbadjiɗaa. 66 Jũma maʉ̃ ũrĩpeɗaɗaba jarabadjiɗaa: “Mãwã baibʉrʉ, maʉ̃gʉ warrara dji droma baya.” Mãwã jarasiɗaa Ãcõrẽ ʉɓʉara dji warra ume ɓʉ bẽrã.

67 Zacariara Ãcõrẽ Jaureɗeba ɓepeɗa nãwã beɗeasia:

68 ¡Israelerã Ãcõrẽra bio bia ɓʉa, idji ẽberãrãra ẽdrʉ edai carea ze ɓʉ bẽrã!

69 Idji nezoca Daviɗeba zeɗada diabuebʉrʉa dadji Ẽdrʉ Edabarida ɓamãrẽã.*

70 Naẽna Ãcõrẽba idjiɗeba beɗeabadarãa maʉ̃nebemada jarabisia.

71 Idjia jarabisia jũma dadjirã dji quĩrũnebemada, dadjirã quĩrãma panʉnebema siɗa ẽdrʉ edaida.

72 Mãwã oya dadji drõã naẽnabemarãa quĩrã djuburiayaɗa aɗa bẽrã

idjaɓa ãdjirã ume beɗea ɓʉɗada jũma oyaɗa aɗa bẽrã.

73 1:73-74 Idjia dadji drõãenabema Abrahaʉ̃a jarasia dadjirã dji quĩrũ jʉwaeɗabemada ẽdrʉ ɓʉida.

Mãwã ne wayaa neẽ́ dadjirãba idjira poya ẽpẽ panania.

75 Dadjirã zocai panʉmisa idji quĩrãpita biya, jipa nĩbaɗia.

76 Maʉ̃be Zacariaba idji warraɗebemada nãwã jarasia:

Warra, bʉra Ãcõrẽ dji dromaara ɓʉɗeba beɗeabariaɗa aɗia. Bʉra dadjirã Boro na wãya idji o jari carea.*

77 Bʉa israelerãa cawabiya sãwã Ãcõrẽba ãdji cadjiruara quĩrãdoapeɗa ẽdrʉ edaida.

78 Ãcõrẽ quĩrĩãra bio waiɓʉa ɓʉa. Dadji Ẽdrʉ Edabarira bajãneba zeya ʉ̃mãdau odjabari quĩrãca.

79 Maʉ̃ba dji pãĩmane ɓeaa, dji beuɗi waya ɓeaa biɗa Ãcõrẽra cawabiya.

Idjaɓa dadjirãa cawabiya sãwã idji ume necai pananida.

80 Dji warrara warisia idjaɓa Ãcõrẽ Jaureɗeba zarea ɓesia. Drõã ɓaɗacarea ẽjũã põãsa ewaraga ɓʉɗe ɓaɗe wãsia. Mama ɓabadjia aɓa jũmarã quĩrãpita beɗeabʉrʉ ewariɗaa.