Luca
Ãcõrẽmaa zeɗaẽ́bʉrʉ beuɗia
13 Mãwã panʉne ẽberãrãba Jesua jarasiɗaa ʉ̃cʉrʉ Galileaɗebemarãba animarã Ãcõrẽa babue dia panʉne Pilatoba ãdjirãra quenabisida. 2 Maʉ̃ carea Jesuba jarasia:
–Maʉ̃ ẽberãrãra bia mĩga beupeɗaɗa bẽrã ¿bãrãba crĩcha panʉca ãdjia wetara cadjiruara obadjiɗada waabema Galileaɗebemarãba obada cãyãbara? 3 Mʉ̃a jaraya: mãwãẽ́a. Baribʉrʉ bãrãba cadjirua obadara igaraɗapeɗa Ãcõrẽmaa zeɗaẽ́bʉrʉ bãrã siɗa beuɗia. 4 Siloeɗe de ʉ̃tʉ drasoa ɓʉda dieciocho ẽberãrã ʉ̃rʉ̃ ɓaesiɗe jũma beusiɗaa. Mãwã beupeɗaɗa bẽrã ¿bãrãba crĩcha panʉca ãdjia wetara cadjiruara obadjiɗada waabema Jerusaleʉ̃ne ɓeaba obada cãyãbara? 5 Mʉ̃a jaraya: mãwãẽ́a. Baribʉrʉ bãrãba cadjirua obadara igaraɗapeɗa Ãcõrẽmaa zeɗaẽ́bʉrʉ, bãrã siɗa beuɗia.–
Higojõ zaucaɗebema ne jara ɓʉ
6 Maʉ̃be ne jara ɓʉɗeba Jesuba ãdjirãa nãwã jaradiasia:
–Ẽberãba idji néuɗe higojõ bacuruda eroɓasia. Ewari aɓa maʉ̃ bacuru zau ɓʉ cawaya acʉɗe wãsia baribʉrʉ zauẽ́ ɓasia. 7 Maʉ̃ carea djibariba idji néu wagabaría nãwã jarasia: “Naʉ̃ bacuru zau ɓʉ cawaya naʉ̃ba poa ũbea acʉɗe ze ɓʉa baribʉrʉ zaucaa. Maʉ̃ bẽrã biara ɓʉa tutabueida. ¿Cãrẽ cãrẽã bacuru zaucada eroɓai?”
8 Baribʉrʉ dji néu wagabariba jarasia: “Mʉ̃ boro, biara ɓʉa poa aɓa jʉ̃ãnida. Mʉ̃a dji carraɗe egorora bogajupeɗa ne ɓʉya. Ãĩbẽrã maʉ̃ba zauisicada. 9 Za zei poaɗe zausira idu ɓʉya. Zauẽ́bʉrʉ tutabueya.”–
Ʉ̃nãũbada ewariɗe Jesuba wẽrã biabiɗa
10 Ʉ̃nãũbada ewariɗe Jesuba judiorã dji jʉrebada deɗe jaradia ɓasia. 11 Mama wẽrãda ɓasia. Maʉ̃ wẽrãra dieciocho poa jaiba ejũrẽã eroɓasia. Maʉ̃ bẽrã poya jipa jĩrũca basía. 12 Jesuba idji unusiɗe caita trʉ̃peɗa nãwã jarasia:
–Wẽrã, bʉ cacua biẽ́ ɓʉɗebemada biadua.–
13 Mãwã jarapeɗa Jesuba idji jʉwara ʉ̃rʉ̃ ɓʉsia. Ara maʉ̃da wẽrãra jipa ʉ̃ta nũmepeɗa Ãcõrẽa bia jarasia. 14 Baribʉrʉ Jesuba ʉ̃nãũbada ewariɗe biabiɗa bẽrã dji jʉrebada deɗebema borora quĩrũsia. Maʉ̃ne jũmarãa nãwã jarasia:
–Ʉ̃nãũbada ewari awara sei ewarida eropanʉa trajaɗi carea. Maʉ̃gʉ ewariɗebʉrʉ zeɗadua bãrãra biabiɗamãrẽã. Baribʉrʉ ʉ̃nãũbada ewariɗera zerãnadua.–
15 Maʉ̃ carea Jesuba jarasia:
–¡Bãrãba jaradiabada quĩrãca oɗacaa! ¿Ʉ̃nãũbada ewariɗe bãrã pacada wa burroda ẽrãnapeɗa baido doɗe edeɗacaca? 16 Mãwã baibʉrʉ ¿biẽ́ ɓʉca naʉ̃ wẽrãra, diauruba dieciocho poa biẽ́ eroɓaɗaɗebemada ʉ̃nãũbada ewariɗe biabida? ¿Idji siɗa Abrahaʉ̃neba yõnaẽ́ca?–
17 Jesuba maʉ̃ jarasiɗe idji biẽ́ jara panʉra bio perasiɗaa, baribʉrʉ idjia ne bia o ɓʉ carea purura bio ɓʉsriɗa panasiɗaa.
Mostaza taɗebema ne jara ɓʉ
18 Maʉ̃be Jesuba jarasia:
–Ãcõrẽba ẽberãrã pe eroɓʉra ¿cãrẽ quĩrãca ɓʉ? 19 Mostaza ta quĩrãca ɓʉa. Ẽberãba maʉ̃ tada idji ẽjũãne úsia. Tunupeɗa warisia aɓa bacuru waitabe nũmebʉrʉɗaa. Maʉ̃ bẽrã ĩbanara dji jʉwateɗe de ocuaɗe zesiɗaa.–
Paʉ̃ ẽsãbariɗebema ne jara ɓʉ
20 Maʉ̃ awara jarasia:
–Ãcõrẽba ẽberãrã pe eroɓʉra ¿cãrẽ quĩrãca ɓʉ? 21 Paʉ̃ ẽsãbari quĩrãca ɓʉa. Maʉ̃ paʉ̃ ẽsãbarira wẽrãba maãrĩ edapeɗa harina waiɓʉaɗe abuesia. Maʉ̃be bio puerapeɗa chũmʉsia aɓa jũma ẽsãbʉrʉɗaa.–
Eɗa wãbada pẽsua ɓʉ
22 Jerusaleʉ̃naa wãbʉrʉɗe Jesuba puru waiɓʉaɗe, puru zaqueɗe biɗa jaradiasia. 23 Maʉ̃ne aɓaʉba idjía iwiɗisia:
–Mʉ̃ Boro, ¿Ãcõrẽba zocãrãẽ́be ẽdrʉ edaica?–
Jesuba panusia:
Ne jũma oɗadua dji eɗa wãbada pẽsua ɓʉɗe eɗa wãni carea. Wãrãda eɗa wãni carea ɓeara zocãrã panʉa baribʉrʉ poya jũma eɗa wãnaẽ́a. 25 De djibariba dji eɗa wãbadara jũãtrʉ nũmʉnacarea dji dajada panʉba ewamãrẽã nãwã trʉ̃ jaraɗia: “Dai boro, dai boro, ewadua.” Baribʉrʉ de djibariba panuya: “Mʉ̃a bãrãra unucaa idjaɓa sãmabemada adua ɓʉa.” 26 Dji dajada panʉba nãwã jaraɗia: “Dairãra bʉ ume ãbaa ne cosiɗaa, idjaɓa bʉa dai puruɗe jaradia nĩbasiɗe arima panasiɗaa.” 27 Maʉ̃ne idjia bãrãa jaraya: “Mʉ̃a bãrãra unucaa idjaɓa sãmabemada adua ɓʉa. Cadjirua obadarã, ãyã wãnadua.”
28 Bãrã dji dajada ɓeara aujĩã panania idjaɓa puaba quiɗa ĩchia panania. Abrahaʉ̃da, Isada, Jacoboda idjaɓa Ãcõrẽneba beɗeabadarã siɗa Ãcõrẽ puruɗe ununia, baribʉrʉ bãrãda Ãcõrẽba idu eɗaa wãbiẽ́a. 29 Maʉ̃ ewariɗe drua ãĩbemarãda ʉ̃mãdau odjabariareba, ʉ̃mãdau ɓaebariareba, jʉwa acʉareba, jʉwa araɗeba biɗa zeɗia. Maʉ̃gʉrãra Ãcõrẽ puruɗe ne co chũpanenia. 30 Maʉ̃ne dji jĩrũarebemada dji nabemarãda ɓeaɗia, dji nabemarãda dji jĩrũarebemada ɓeaɗia.–*
Jesu Jerusaleʉ̃ carea sopuaɗa
31 Maʉ̃ ewariɗe ʉ̃cʉrʉ pariseorãda zeɗapeɗa Jesua jarasiɗaa:
–Namabemada isabe wãdua. Herodeba bʉra bea quĩrĩã ɓʉa.–*
32 Maʉ̃ne Jesuba ãdjía jarasia:
–Jãʉ̃ ẽberã usa pã quĩrãca ɓʉ́a nãwã jaraɗe wãnadua:* “Nane, nu biɗa mʉ̃a cacua biẽ́ ɓeara, jai bara ɓea siɗa biabicuaya. Mʉ̃a oida ɓʉra ewari ũbeaɗe jũma o eroɓaya.” 33 Baribʉrʉ iɗi, nu, nu nurẽma biɗa oɗe nĩbaya Jerusaleʉ̃ne jũẽi carea. Ãcõrẽneba beɗeabadarãda Jerusaleʉ̃ne beabada bẽrã mama wãida ɓʉa.
34 ¡Jerusaleʉ̃, Jerusaleʉ̃, bãrãba Ãcõrẽneba beɗeabadarãda beabadaa! ¡Ãcõrẽba diabueɗarã siɗa mõgaraba taɓari beabadaa! Mʉ̃a ɓarima zocãrã bãrãra ãbaa pe eda quĩrĩã ɓasia eterre wẽrãba idji warrarã i edre edabari quĩrãca. Mãwãmĩna bãrãba quĩrĩãnaẽ́ basía. 35 Maʉ̃ carea Ãcõrẽra waa bãrã ume ɓaẽ́a. Bãrãba mʉ̃ra waa ununaẽ́a aɓa mʉ̃ bia edabʉdaɗaa. Maʉ̃ ewariɗe nãwã jaraɗia: “¡Bio bia ɓʉa dadji Ãcõrẽ trʉ̃neba zebʉrʉra!”–