Luca

¿Cai trʉ̃neba Jesuba jaradia ɓʉ?

Mateo 21:23-27; Marco 11:27-33

20 Ewari aɓa Jesuba Ãcõrẽ de droma dajada ẽberãrãa beɗea bia Ãcõrẽ ãdjirã Boro baiɗebemada jaradia ɓasia. Maʉ̃ne sacerdote bororãda, judiorã ley jaradiabadarãda, judiorã dji dromarã siɗa zesiɗaa. 2 Ãdjirãba Jesua nãwã iwiɗisiɗaa:

–Daia jaradua, bʉa nama o ɓʉra ¿caiba obi ɓʉ?–*

3 Jesuba ãdjía jarasia:

–Mʉ̃a biɗa bãrãa iwiɗiya. Panunadua. 4 ¿Caiba Juaʉ̃ra diabuesi borocuemãrẽã? ¿Ẽberãba wa Bajãne Ɓʉba?–

5 Maʉ̃ne ara ãdjiduɓa jara duanesiɗaa:

–Bajãne Ɓʉba diabuesiaɗa aɗibʉrʉ idjia jaraya: “Maʉ̃da ¿cãrẽ cãrẽã ĩjãnaẽ́ basi?” 6 Baribʉrʉ ẽberãba diabuesiaɗa aɗibʉrʉ, puruba dadjirãra mõgaraba taɓari beaɗia. Purumaarã Juaʉ̃ra Ãcõrẽneba beɗeabari basía.–

7 Maʉ̃ bẽrã ãdjirãba nãwã panusiɗaa:

–Daiba adua panʉa caiba diabuesida.–

8 Maʉ̃ carea Jesuba jarasia:

–Mãẽteara mʉ̃a biɗa bãrãa jaraẽ́a caiba mʉ̃́a jãwã obi ɓʉda.–

Djãrã néu acʉbadaɗebema ne jara ɓʉ

Mateo 21:33-44; Marco 12:1-11

9 Mãwãnacarea Jesuba ẽberãrãa ne jara ɓʉɗeba nãwã jarasia:

–Ẽberãda ɓasia. Maʉ̃ ẽberãba uvada idji ẽjũãne úsia. Maʉ̃be idji néura ʉ̃cʉrʉ ẽberãrã jʉwaeɗa ɓʉsia. Ãdjirã ume beɗea ɓʉsia néu zaubʉrʉɗe jũmasãwã idjía diaɗida panʉda. Maʉ̃be tʉmʉ wãpeɗa mama dãrãsia. 10 Uva jara idji nezocada aɓa diabuesia néuɗebema idjía diaɗida panʉra edaɗe wãmãrẽã. Baribʉrʉ néu acʉ panʉba dji nezocara puoɗapeɗa jẽda jʉretabuesiɗaa ni cãrẽ siɗa diaɗaẽ́. 11 Maʉ̃ carea dewara nezocada diabuesia. Baribʉrʉ maʉ̃gʉ siɗa puoɗapeɗa biẽ́ jaraɗapeɗa jẽda jʉretabuesiɗaa ni cãrẽ siɗa diaɗaẽ́. 12 Maʉ̃ carea dewarada diabuesia, baribʉrʉ maʉ̃gʉ siɗa bio puoɗapeɗa ãyã jʉretabuesiɗaa.

13 Maʉ̃ carea néu djibariba ara idjiduɓa jarasia: “¿Jãʉ̃be mʉ̃a sãwã oi? Mʉ̃ warra bio quĩrĩã ɓʉda ãdjimaa diabueya; ãĩbẽrã idjidrʉ wayaɗisicada.” 14 Mãwãmĩna idji néu acʉ panʉba dji warra unubʉdaɗe jarasiɗaa: “Jari uruba dji zezaba eroɓʉra jũma edaya. ¡Idjira beataɗia! Mãwãbʉrʉ dji ẽjũãra dadjirã itea ɓeya.” 15 Ara maʉ̃da dji warrara néu ãĩ edeɗapeɗa beasiɗaa.

Bãrãmaarã néu djibariba ¿sãwã obá? 16 Araa wãpeɗa ãdjirã jũma quenapeɗa idji néura dewararãa acʉbiya.–

Dji arima ɓeaba maʉ̃ ũrĩsiɗaɗe jarasiɗaa:

–Biara ɓʉa Ãcõrẽba maʉ̃gʉra idu mãwãbiẽ́da.–

17 Baribʉrʉ Jesuba ãdjimaa acʉpeɗa jarasia:

–Mãẽteara ¿cãrẽ cãrẽã Ãcõrẽ Beɗeaɗe nãwã ɓʉ́ ɓʉ?

De obadaba mõgara igarapeɗaɗara dji biara ɓʉda ɓesia.*

18 Bariduada maʉ̃ mõgara ʉ̃rʉ̃ ɓaeibʉrʉ aɓeɗa jũma ɓʉgʉzoaya, idjaɓa maʉ̃ mõgarada aɓaʉ ʉ̃rʉ̃ ɓaeibʉrʉ dji ẽberãra pepeɗea taɓeya.–*

19 Sacerdote bororãba, judiorã ley jaradiabadarã biɗa cawasiɗaa Jesuba maʉ̃ jara ɓʉɗeba ãdjirãda biẽ́ jarasida. Jesura jida quĩrĩã panasiɗaa baribʉrʉ puruda waya panasiɗaa.

¿Romanebema boro itea parata jʉrʉ pebʉdaɗe diaɗida panʉca?

Mateo 22:15-22; Marco 12:13-17

20 20:20-21 Maʉ̃be judiorã dji dromarãba ʉ̃cʉrʉ diabuesiɗaa Jesuda quĩrãcuita acʉɗamãrẽã. Maʉ̃gʉrãba Jesu biẽ́ beɗeabʉrʉda ũrĩsiɗara ara maʉ̃da jidaɗapeɗa ãdji druaɗebema boro jʉwaɗe diaɗida crĩcha panasiɗaa. Ẽberã biarã quĩrãca wãnapeɗa Jesua nãwã iwiɗisiɗaa:

–Jaradiabari, daiba cawa panʉa bʉa jipa jaradiabarida. Bʉra ni aɓaʉare ɓacada, ãtebʉrʉ wãrã beɗea Ãcõrẽ oɗebemada jũmarãa jaradiabarida. 22 Mãẽteara daia jaradua, Romanebema boro itea parata jʉrʉ pebʉdaza ¿dadji judiorãba diaɗida bia ɓʉca wa biẽ́ ɓʉ?–

23 Baribʉrʉ Jesuba cawa ɓasia idjira nẽbʉraɗe ɓʉɗi carea mãwã panʉda. Maʉ̃ bẽrã jarasia:

–[¿Bãrãba cãrẽ cãrẽã mʉ̃ra biẽ́ beɗeabi quĩrĩã panʉ?]* 24 Mʉ̃́a parata pichida aɓa acʉbiɗadua. ¿Cai quĩrãdarrada naʉ̃ parataɗe ɓʉ? ¿Cai trʉ̃da ɓʉ?–

Ãdjirãba panusiɗaa:

–Romanebema boroɗeda.–

25 Maʉ̃ carea Jesuba ãdjía jarasia:

–Mãwã baibʉrʉ Romanebema boroɗera Romanebema boroa diaɗadua, idjaɓa Ãcõrẽnera Ãcõrẽa diaɗadua.–

26 Ãdjirãba Jesura jũmarã quĩrãpita poya biẽ́ beɗeabiɗaẽ́ basía. Ãtebʉrʉ idjia jaraɗa carea bio cawa crĩchaɗaẽ́ bẽrã aɓeɗa chupea duanesiɗaa.

Beuɗarã ʉ̃rẽbaɗiɗebema Jesuba jaraɗa

Mateo 22:23-33; Marco 12:18-27

27 Mãwã panʉne ʉ̃cʉrʉ saduceorãda idjimaa zesiɗaa. Saduceorãba ĩjãnacaa beupeɗaɗara ʉ̃rẽbaɗida. Maʉ̃ bẽrã Jesua nãwã iwiɗisiɗaa:

Jaradiabari, Moiseba dadjirã itea ɓʉsia ẽberãda warra neẽ́ ɓʉɗe jaiɗaibʉrʉ, idji djababa dji pẽdra wẽrãra edaida ɓʉda dji djaba jaiɗaɗa itea warra unui carea.* 29 Ewari aɓa djabarãda siete panasiɗaa. Dji nabemada quima edasia, baribʉrʉ warra neẽ́ jaiɗasia. 30 Maʉ̃ carea dji djaba idjiarebemaba dji pẽdra wẽrãra edasia baribʉrʉ idji siɗa warra neẽ́ jaiɗasia. 31 Maʉ̃ carea dji ũbeabemaba edasia baribʉrʉ idji siɗa warra neẽ́ jaiɗasia. Jũma dji djabarãba maʉ̃ wẽrãra edasiɗaa baribʉrʉ warra neẽ́ jaiɗasiɗaa. 32 Mãwãnacarea dji wẽrã siɗa jaiɗasia. 33 Maʉ̃ siete djabarãba aɓari wẽrãda edasiɗaa. Mãwãra ʉ̃rẽbaɗi ewariɗe ¿sãʉ̃gʉba idjira eroɓei?–

34 Maʉ̃ carea Jesuba panusia:

–Naʉ̃ ẽjũãne ẽberãra quima edabadaa idjaɓa quima diacuabadaa. 35 20:35-36 Baribʉrʉ ẽberãrã Ãcõrẽba bia unu ɓʉda ʉ̃rẽbaɗia. Maʉ̃ne ãdjirãra quima edaɗaẽ́a ni quima diaɗaẽ́a. Waa beuɗaẽ́a. Ãdjirãra Ãcõrẽ bajãnebema nezocarã quĩrãca ɓeaɗia. Ʉ̃rẽbapeɗaɗa bẽrã Ãcõrẽ warrarãa. 37 Maʉ̃ awara Moiseba bacuru zaque uruga nũmʉnebemada cartaɗe ɓʉsiɗe cawabisia beuɗarãra ʉ̃rẽbaɗida. Idjia Ãcõrẽra nãwã trʉ̃ jarasia: Abrahaʉ̃ Ãcõrẽ, Isa Ãcõrẽ, idjaɓa Jacobo Ãcõrẽ.* 38 Idjira beu ɓea Ãcõrẽẽ́a ãtebʉrʉ zocai ɓea Ãcõrẽa. Ãcõrẽmaarã jũmarãda zocai ɓeaa.–

39 Maʉ̃ carea ʉ̃cʉrʉ judiorã ley jaradiabadaba Jesua jarasiɗaa:

–Bʉa ariɗe panusia, Jaradiabari.–

40 Jesuba jũma bia panuna bẽrã dewararãba iwiɗiɗida wayasiɗaa.

Ãcõrẽba ẽdrʉ edabari diai jaraɗara ¿cai warra?

Mateo 22:41-46; Marco 12:35-37

41 Maʉ̃be Jesuba ãdjía iwiɗisia:

–¿Sãwãẽrã ẽberãrãba jara panʉ Ãcõrẽba ẽdrʉ edabari diai jaraɗara Davi warrada? 42 20:42-43 Daviba Salmo cartaɗe nãwã jarasia:

Dadjirã Boroba mʉ̃ boroa jarasia: mʉ̃ jʉwa araare chũmedua aɓa bʉ ume dji quĩrũrã mʉ̃a bʉ jʉwaeɗa ɓʉbʉrʉɗaa.*

44 Ãcõrẽba ẽdrʉ edabari diai jaraɗada Daviba mʉ̃ Boroaɗa asibʉrʉ, ¿sãwã Davi warra bai?–

Jesuba judiorã ley jaradiabadarã biẽ́ jaraɗa

Mateo 23:1-36; Marco 12:38-40; Luca 11:37-54

45 Jũmarãba ũrĩ duanʉne Jesuba idji ume nĩbabadarãa jarasia:

Judiorã ley jaradiabadaɗebemada quĩrãcuita ɓeaɗadua. Ãdjirãba djio nẽbʉa ɓeada jʉ̃ awua ɓeaa. Maʉ̃ awara puruɗe nĩnane quĩrĩãbadaa ẽberãrãba wayaaɗeba “mẽrã” aɗida. Judiorã dji jʉrebada deɗe ãdjira dji dromarã chũmebadaɗe chũme quĩrĩãbadaa; ãbaa ne cobʉdaɗe biɗa ara maʉ̃ quĩrãca obadaa. 47 Pẽdra wẽrãrãba eroɓeara jũma jãrĩbadamĩna dji biarãda crĩchabiɗi carea jũmarã quĩrãpita dãrã Ãcõrẽa iwiɗibadaa. Maʉ̃ carea Ãcõrẽba ãdjirãra biara cawa oya.–