Hecho
Sauloba Jesu ĩjãna
9 9:1-2 Maʉ̃ ewariɗe Sauloba waɗibiɗa dadjirã Boro ĩjã ɓeara quenai carea waraga ɓabadjia. Sacerdote dji droma ɓʉmaa wãpeɗa iwiɗisia cartada ɓʉcua diamãrẽã. Maʉ̃ cartara Damasco puruɗe judiorã dji jʉrebada deza edeida crĩcha ɓasia. Cartaɗe ɓʉ́ ɓasia ãdjirã tãẽna Jesu Oɗe nĩna umaquĩrãrãda, wẽrãrã siɗa jidapeɗa Jerusaleʉ̃naa jũma edeida ɓʉda. 2 – 3 Maʉ̃ cartara edapeɗa wãsia. Oɗe nĩne Damasco caita jũẽbʉrʉɗe cawaẽ́ne bajãneba uruada jʉ̃rã tẽũsia. 4 Maʉ̃ba Saulora egode ɓaebisia. Maʉ̃ne beɗeada ũrĩsia. Maʉ̃ beɗeaba jarasia:
–Saulo, Saulo, ¿cãrẽ cãrẽã mʉ̃ra biẽ́ oi carea ẽpẽ ɓʉ?–
5 Maʉ̃ne Sauloba iwiɗisia:
–Mʉ̃ boro, ¿bʉra cai?–
Dji beɗeaba panusia:
–Mʉ̃ra Jesua. Bʉa biẽ́ oi carea ẽpẽ ɓʉra mʉ̃́a. Ara bʉduɓa puabʉrʉa cũmia ʉ̃rʉ̃ tʉgabʉrʉ quĩrãca.* 6 Jãʉ̃be piradrʉpeɗa Damasco puruɗaa wãdua.* Jãma aɓaʉba jaraya bʉa cãrẽda oida ɓʉda.–
7 Saulo ume wãbʉdara bio dauperasiɗaa. Ãdjirãba beɗeara ũrĩsiɗamĩna ni aɓaʉda ununaẽ́ basía. 8 Saulora egode taɓapeɗa piradrʉsia, baribʉrʉ dau ogabʉrʉɗe poya unuẽ́ basía. Maʉ̃be idji ume wãbʉdaba idji jʉwaɗe jidaɗapeɗa Damascoɗaa edesiɗaa. 9 Mama idjia ewari ũbea unuẽ́ ɓasia, ne coẽ́ ɓasia, idjaɓa baido doẽ́ ɓasia.
10 Damascoɗe ẽberã Ananía abadada ɓasia. Maʉ̃ Ananíaba Jesucritora ĩjã ɓasia.* Cãĩmocara quĩrãca idjia unusia dadjirã Boroba nãwã jarabʉrʉda:
–¡Ananía!–
Idjia panusia:
–Mʉ̃ra nama ɓʉa, mʉ̃ Boro.–
11 Dadjirã Boroba jarasia:
–Piradrʉpeɗa Juda deɗaa wãdua. Maʉ̃ dera O Jipa Ɓʉ abadaɗe ɓʉa. Jũẽsira jaradua bʉa ẽberã Saulo Tarsoɗebemada acʉɗe ze ɓʉda. Ara nawena idjia Ãcõrẽa iwiɗi ɓʉa. 12 Idjia cãĩmocara quĩrãca unusia umaquĩrã Ananía abadada idjimaa zepeɗa idji ʉ̃rʉ̃ jʉwa ɓʉbʉrʉda idji dauba wayacusa unumãrẽã.–
13 Maʉ̃ne Ananíaba jarasia:
–Mʉ̃ Boro, mʉ̃a jãʉ̃ ẽberãnebemada ũrĩ ɓʉa. Zocãrãba jarabadaa Jerusaleʉ̃ne idjia bʉ ẽberãrãra bio biẽ́ o ɓʉda. 14 Maʉ̃ awara sacerdote bororã trʉ̃neba naʉ̃ puruɗaa ze ɓʉa bʉ ĩjã ɓeara jũma jida edei carea.–
15 Baribʉrʉ dadji Boroba jarasia:
–Wãdua. Mʉ̃a idjira edasia mʉ̃nebemada judiorãẽ́a, ãdjirã bororãa, idjaɓa israelerãa biɗa beɗeamãrẽã. 16 Mʉ̃a idjía cawabiya sãwã bia mĩga ɓaida ɓʉda mʉ̃nebemada beɗeai carea.–
17 Ara maʉ̃da Ananíara Saulo ɓʉmaa wãsia. Dji deɗe eɗa wãpeɗa idji jʉwara Saulo ʉ̃rʉ̃ ɓʉpeɗa jarasia:
–Djaba Saulo, dadji Boro Jesu bʉma oɗe odjaɗaba mʉ̃ra zebisia wayacusa bʉ dauba unumãrẽã idjaɓa Ãcõrẽ Jaureɗeba ɓemãrẽã.–
18 Ara maʉ̃da Saulo dauɗeba ɓeda e quĩrãca ɓeada jurrusia. Maʉ̃ne wayacusa unu ɓesia. Maʉ̃be piradrʉpeɗa borocuesia. 19 Maʉ̃bebʉrʉ ne copeɗa cacua ʉɓʉasia.
Saulo Damasco puruɗe ɓaɗa
Saulora Damascoɗe Jesu ĩjã ɓea ume dãrãsia. 20 Maʉ̃ne judiorã dji jʉrebada deza idjia jaradia ɓesia Jesura wãrãda Ãcõrẽ Warrada. 21 Jũma maʉ̃ ũrĩbʉdaba cawa crĩchaɗaẽ́ basía. Ãdjirãba nãwã iwiɗi duanasiɗaa:
–¿Naʉ̃gʉẽ́ca Jerusaleʉ̃ne Jesu ĩjã ɓearã jõbi quĩrĩã ɓaɗara? ¿Nama ze ɓʉẽ́ca ãdjirãra sacerdote bororãmaa preso edei carea?–
22 Baribʉrʉ Sauloba ewariza ebuɗaara cawabibadjia Jesura wãrãda Ãcõrẽba ẽdrʉ edabari diai jaraɗada. Maʉ̃ba Damascoɗebema judiorãba cawa crĩchaɗaẽ́ panesiɗaa.
Saulo mĩrũ wãna
23 Ewari zocãrã baɗacarea judiorã Damascoɗebemara Saulo beaɗi carea beɗea ausiɗaa. 24 Maʉ̃ carea ãsa, diamasi biɗa dji puruɗe eɗa wãbadama jʉ̃ã panasiɗaa. Baribʉrʉ ãdjia crĩcha panʉra Sauloba cawasia. 25 Maʉ̃ bẽrã diamasi Jesu ĩjã ɓeaba Saulora ẽ waiɓʉaɗe ɓʉɗapeɗa dji puru mõgaraba auɗu jũrã ca ɓʉɗeba uɗaa puru dajada ʉraɓari ɓʉsiɗaa.
Saulo Jerusaleʉ̃naa wãna
26 Saulo jẽda Jerusaleʉ̃naa wãsiɗe Jesu ĩjã ɓea ume ɓe quĩrĩã ɓasia.* Baribʉrʉ idjira waya panasiɗaa. Ãdjirãba ĩjãnaẽ́ panasiɗaa idjia wãrãda Jesura ĩjã ɓʉda. 27 Baribʉrʉ Bernabeba Saulora edesia Jesuba diabueɗarãmaa. Maʉ̃be idjia nẽbʉrʉsia sãwã Sauloba dadji Borora oɗe unusida, dadji Borora idji ume beɗeaɗada, idjaɓa sãwã Sauloba Damascoɗe Jesuɗebemada ne wayaa neẽ́ beɗeabadjida. 28 Mãwã Saulora ãdjirã ume ɓesia. Maʉ̃ne Jerusaleʉ̃ne Jesuɗebemada ne wayaa neẽ́ beɗea nĩbabadjia. 29 Judiorã dji griego beɗeaɗe beɗeabadarã ume Jesuɗebemada beɗeabadjia baribʉrʉ idjira bea quĩrĩã panasiɗaa. 30 Djabarãba maʉ̃ cawasiɗaɗe Saulora Cesarea puruɗaa edesiɗaa. Mamaʉba idji puru Tarsoɗaa diabuesiɗaa.
31 Mãwãnacarea Judea druaɗe, Galilea druaɗe, Samaria druaɗe biɗa djabarãra necai duanasiɗaa. Ãcõrẽ Jaureɗeba biara ĩjãsiɗaa, dadjirã Boro waya panʉneba nĩbasiɗaa idjaɓa Ãcõrẽ Jaure ʉɓʉaɗeba yõ wãsiɗaa.
Ẽberã Enea abada biaɗa
32 Maʉ̃ ewariɗe Pedrora Ãcõrẽ ẽberãrã acʉ nĩbabadjia. Ewari aɓa Lida puruɗe ɓeada acʉɗe wãsia. 33 Mama ẽberã Enea abadada unusia. Maʉ̃ ẽberãra ɓʉradrʉ ɓʉ bẽrã ocho poa cʉɗaɗe ɓasia. 34 Maʉ̃ne Pedroba jarasia:
–Enea, Jesucritoba bʉra biabisia. ¡Piradrʉdua! Bʉ cʉɗara ɓeɗadua.–
Ara maʉ̃da Eneara piradrʉsia. 35 Lida puruɗe, Saroʉ̃ ẽjũãne biɗa jũmarãba dji biaɗara unusiɗaa. Maʉ̃ carea dadjirã Borora ĩjãsiɗaa.
Dorca ʉ̃rẽbaɗa
36 Maʉ̃ ewariɗe Jesu ĩjã ɓʉ wẽrã Tabita abadada Jope puruɗe ɓasia. Griego beɗeaɗe idji trʉ̃ra Dorca abadjiɗaa.* Maʉ̃ djabawẽrãba ne biada o ɓabadjia. Ne neẽ́ queɗeara bio carebabadjia. 37 Ewari aɓa Dorcara cacua biẽ́ ɓepeɗa jaiɗasia. Maʉ̃be idjira sʉgʉɗapeɗa ʉ̃taarebema dejãne urraju ɓʉsiɗaa. 38 Jope purura Lida caita ɓasia. Jesu ĩjã ɓeaba ũrĩsiɗaa Pedrora Lidaɗe ɓʉda. Maʉ̃ carea ẽberãda umé idjimaa diabuesiɗaa nãwã beɗea djuburiaɗamãrẽã: “Daimaa isabe zedua.”
39 Ara maʉ̃da Pedrora ãdji ume wãsia. Jũẽsiɗaɗe idjira dji bẽwãrã ɓʉmaa edesiɗaa. Mama jũma pẽdra wẽrãrãda jĩã duanasiɗaa. Ãdjia Pedroa Dorcaba wua cajuɗada acʉbisiɗaa. 40 Maʉ̃ne Pedroba jũmarãda dajadaa wãbisia. Chĩrãboroɗe coɓepeɗa Ãcõrẽa iwiɗisia Dorca ʉ̃rẽbabimãrẽã. Iwiɗipeɗa dji bẽwãrãmaa acʉbʉrʉɗe jarasia:
–Tabita, ¡piradrʉdua!–
Ara maʉ̃da idjira dau ogasia. Pedro unubʉrʉɗe ʉ̃ta chũmesia. 41 Pedroba idjira jʉwaɗe jidapeɗa ʉ̃ta nũmebisia. Maʉ̃be djabarãra, pẽdra wẽrãrã siɗa trʉ̃cuapeɗa Dorca ʉ̃rẽbaɗada acʉbisia. 42 Jũma Jope puruɗe maʉ̃nebemada cawasiɗaa. Mãwã zocãrãba dadjirã Borora ĩjãsiɗaa. 43 Maʉ̃be Pedrora Jopeɗe dãrãsia ẽberã Simoʉ̃ abadama. Maʉ̃ Simoʉ̃ba animarã eda biya obadjia.