1 Corinto
Djabarã Jerusaleʉ̃nebema itea parata jʉrʉ pepeɗaɗa
16 Maʉ̃ awara bãrãba djabarã Jerusaleʉ̃nebema itea parata jʉrʉ pebʉdaɗebemada mʉ̃a jaraya. Mʉ̃a djabarã Galacia druaɗebemarãa jaraɗa quĩrãca oɗadua. 2 Nabema ewari domiaza bãdjiza edabʉdaɗebemada waga ɓʉɗadua. Mãwãra mʉ̃ jũẽbʉrʉɗe bãrãba ewabe jʉrʉ peɗaẽ́a. 3 Mʉ̃ jũẽbʉrʉɗe djabarã bãrãba edabʉdada mʉ̃a Jerusaleʉ̃naa parata diaɗe diabueya. Djabarã Jerusaleʉ̃nebemarãba ãdjira bia edaɗamãrẽã mʉ̃a ãdji ume cartada ɓʉ́ diabueya. 4 Baribʉrʉ bãrãmaarã mʉ̃ siɗa wãida bia ɓʉbʉrʉ, ãdji ume wãya.
Paulo Corintoɗaa wãida crĩchaɗa
5 Mʉ̃ra naãrã Macedonia druaɗaa wãida ɓʉa. Maʉ̃be bãrãmaa wãya. 6 Mʉ̃ra bãrã ume dãrãisicada. Ãĩbẽrã jũma naʉ̃ doiɗaara ɓaisicada. Maʉ̃be bãrãba mʉ̃ra poya carebaɗia mʉ̃dji wãbʉrʉmaa bia wãmãrẽã. 7 Ara nawena poya dãrã ɓaẽ́ bẽrã mʉ̃a bãrãra acʉɗe wã quĩrĩãẽ́a. Baribʉrʉ dadjirã Boroba quĩrĩãibʉrʉ, bãrãmaa wãbʉrʉɗe dãrãica ɓʉa. 8 Nama Epeso puruɗe ɓaya aɓa Pentecoste ewari droma jõbʉrʉɗaa.* 9 Nama mʉ̃ ume dji quĩrũda baramĩna nawena poya Ãcõrẽ beɗeara bia jaradia ɓaya idjaɓa zocãrãba ĩjãbʉdaa.
10 Djaba Timoteoda bãrãma jũẽibʉrʉ, idjira bãrã tãẽna bia edaɗadua wayarãmãrẽã. Dadjirã Boroba quĩrĩã ɓʉra idjia bia o ɓʉa mʉ̃a o ɓʉ quĩrãca. 11 Maʉ̃ carea idjira igararãnadua, ãtebʉrʉ carebaɗadua mʉ̃ acʉɗe zebʉrʉɗe necai zemãrẽã. Mʉ̃a, dewara djabarã biɗa idji zeida jʉ̃ã panʉa.
12 Dadjirã djaba Apoloa mʉ̃a beɗea djuburiasia dewara djabarã ume bãrã acʉɗe wãnamãrẽã. Baribʉrʉ ara nawena idjira wã quĩrĩãẽ́ ɓʉa. Poya wãbʉrʉɗe wãya.
Pauloba naʉ̃ cartaɗe jĩrũare ɓʉɗa
13 Quĩrãcuita ɓeaɗadua. Jesucritora bio ĩjã pananadua. Idjiɗeba sozarra ɓeaɗadua idjaɓa zarea ɓeaɗadua. 14 Ne jũma bãrãba obʉdara quĩrĩãneba oɗadua.
15 Djabarã, bãrãba cawa panʉa Acaya druaɗe Estepanaba, idji ẽberãrã biɗa naãrã Jesura ĩjãsiɗada idjaɓa ãdji crĩchara ɓʉcãdada jũma djabarã carebaɗi carea. 16 Mʉ̃a bãrãa beɗea djuburiaya ãdjira, jũma ãdji quĩrãca ɓea siɗa ẽpẽnamãrẽã. Jũma Ãcõrẽ traju o panʉra, djabarã careba panʉ siɗa ẽpẽnadua.
17 Djaba Estepanada, Portunatoda, Acaico siɗa mʉ̃ma jũẽpeɗaɗa bẽrã ɓʉsriɗa ɓʉa. Ãdjirãba bãrã cacuabari mʉ̃ra careba panʉa. 18 Ãdjirãba mʉ̃ sora ɓʉsriɗabisiɗaa bãrã so ɓʉsriɗabipeɗaɗa quĩrãca. Ãdjirãnebemada, djabarã ãdjirã quĩrãca panʉ siɗa bia crĩchaɗadua.
19 Djabarã Asia druaɗebemaba quĩrĩã panʉa bãrãra bia pananida. Djaba Aquilaba, djabawẽrã Priscilaba, djabarã ãdji deɗe ãbaa dji jʉrebada biɗa dadjirã Boroɗeba quĩrĩã panʉa bãrãra bia pananida. 20 Djabarã jũmarãba quĩrĩã panʉa bãrãra bia pananida. Wãrã quĩrĩãneba dji bia edaɗadua.*
21 Mʉ̃ra Pauloa. Naʉ̃gʉ beɗeara ara mʉ̃dji jʉwaba ɓʉbʉrʉa.
22 Bariduaba dadjirã Boro Jesucritoda quĩrĩãẽ́bʉrʉ, Ãcõrẽba maʉ̃ ẽberãra biẽ́ ɓʉya. ¡Zedua, dadjirã Boro!
23 Mʉ̃a quĩrĩã ɓʉa dadjirã Boro Jesucritoba idji biaɗeba bãrãra careba ɓaida. 24 Jesucritoɗeba mʉ̃a bãrãra wãrãda quĩrĩã ɓʉa.*