¡Warrada unusiɗada!

Abrahaʉ̃ra Sarame dãrãbʉrʉ naẽna mĩã cãĩna basiɗada. Amesiɗada ne biada eropanana Ur puruɗe. Ãyã panane wãsiɗada de djubibi quiruda. Baribʉrʉ Sarara sopuaẽ́ basída, idjia bio ĩjã ɓaɗa bẽrã Jeowara.

Saraba warra to quĩrĩã ɓasida. Agara nezoca ɓasida Saraɗe. Mãwãmĩna Saraba Abrahaʉ̃a jarasida: “Cãĩdua jãʉ̃gʉ wẽrãme warra tomãrẽã. Jãʉ̃gʉ warrara mʉ̃a quĩrĩãida mʉ̃re quĩrãca”. Mãwãnacare warrada tosida. Jãʉ̃gʉ warrara trʉ̃ ɓʉsiɗada Ismael.

Dãrã baɗacare, Abrahaʉ̃ba eroɓasida 99 poa. Saraba eroɓasida 89 poa. Maʉ̃ne ẽberãrã ũbea ãdjimaa wãsiɗaa. ¿Bʉa cawa ɓʉa jãʉ̃ ẽberãrã ũbea cai basiɗaa? Ãdjirãra angelerã basiɗada. Ãdjia jarasiɗada: “Abrahaʉ, naʉ̃gʉare poa zebʉrʉɗe naʉ ewari quĩrãca, Saraba warrada toida”. Mãʉ̃ bʉrʉ Sarara iduɓa ipiɗasida. Saraba crĩchasida:“¿Naʉ̃gʉ djora ɓʉba poya warrada toida?”

Poaga aɓa baɗacarea Saraba wãrãda warrada tosida. Jãwã angelerãba jaraɗa quĩrãca mãwãsida. Abrahaʉ̃ba trʉ̃ ɓʉsida Isa. Jãʉ̃ba jara quĩrĩã bʉ “ipiɗa”.

Isaba juesuma poa eroɓasiɗe Saraba unusida Ismaelba biẽ́ beɗea basia Isaɗebemada. Maʉ̃ carea, Saraba Abrahaʉ̃a jarasida: “Ãyã jʉretabuedua Ismael, Agara siɗa”. Naãrã quĩrũ ɓasida Abrahaʉ̃ra dji warra ãyã jʉretabuei carea. Maʉ̃ne Jeowaba jarasia: “Ũrĩdua bʉ quima Saraba jara ɓʉra. Mʉa bio acʉida Ismaelera, Agara siɗa. Mʉa bʉ́a jaraɗara, jũma carebaida Isaɗeba”.