Jeowaba Joseɗera quĩrãdoaẽ́ basída

Jose carceɗe ɓasiɗe, Paraoʉ̃ba dji Egiptoɗebema borora cãĩmocarasia. Ni aɓaʉba cawaɗaẽ́da cãrẽda jara quĩrĩã ɓasida. Maʉ̃ bʉrʉ, dji trajabariba Paraoʉ̃neba jarasida jãʉ̃ra: “Joseba poya jaraida cãrẽda jara quĩrĩã ɓʉda”. Ara maʉ̃da Paraoʉ̃ba jarasida Josera enenamãrẽã.

Paraoʉ̃ba idisida: “¿Poya mʉ̃a jaraida cãrẽda jara quĩrĩã ɓʉda naʉ̃ cãĩmocarara?” Joseba panusida: “Egiptoɗe ɓaida zocãrã ne coɗira siete poa, idjaɓa mãwãnacarea zeida siete poa jarrabada. Jʉrʉdua aɓa ẽberã wagaɗamãrẽã ne coɗira, jarraba beurãnamãrẽã”. Paraoʉ̃ba jarasida: “Bʉdrʉ aɓabe umaquĩrã bio crĩcha cawa ɓʉa Egiptoɗebema”. Baribʉrʉ ¿cãrẽ cãrẽa Joseba cawa ɓasida cãrẽda jara quĩrĩã ɓʉda jãʉ̃ cãĩmocara Paraoʉ̃neba? Jeowaba carebaɗa bẽrã.

Joseba bio wagasida coɗira siete poa. Mãwãnacarea zesida jarrabada naʉ̃ ẽjũãne. Ẽberãrãra jũẽsiɗada puru ɓeazabemada Josemaa ne coɗira nẽdo edaɗi carea. Dji zeze Jacoboba cawasida jãma coɗira bio barada Egiptoɗe. Maʉ̃ bʉrʉ diabuesida jãma dji warrarãda coɗira nẽdo edamãrẽã.

Dji warrara Jacoboɗera wãsiɗada acʉɗe Josera. Idjia cawasida ara maʉ̃da baribʉrʉ dji djabarãba cawaɗaẽ́ ɓasida idjira caida. Ãdjirãra chĩrãboroɗe copanesiɗaa Jose quĩrãpita, maʉ̃ bʉrʉ Joseba quĩrãnebasida idjia naẽna cãĩmocaraɗara quĩrãca. Joseba cawa quĩrĩã ɓasida waɗi unu ama panʉda, maʉ̃ bʉrʉ jarasida: “Bãrãra mʉ̃ acʉɗe ze panʉda mʉ̃ puru poyaɗibicaba”. Ãdjirãba panusiɗada: “¡Daiba acʉɗe ze panʉẽ́da! Dairã Canaaʉ̃nebemada. Dadjirãra doce djabarã panasiɗada baribʉrʉ aɓa beusida. Dadji djaba jẽdaarebemada dadji zezeme ɓʉda”. Maʉ̃ bʉrʉ Joseba jarasida: “Enenadua bãrã djaba jẽdaarebemada mãwãra mʉ̃a ĩjãya”. Ara maʉ̃da wãsiɗada ãdji deda dji zezemaa.

Dji cuariarã Jacoboɗera panesiɗada ne neẽ́a coɗira, maʉ̃ bʉrʉ wãyã diabuesida dji warrarãra Egiptoɗaa ne coɗira jʉrʉɗi carea. Mãwãnacarea edesiɗada dji djabara Benjamiʉ̃, dji djaba jẽdaarebema. Cawai carea dji djabarã sora, Joseba idji taza parataɗebema mẽrãbisida Benjamiʉ̃ bolsaɗe. Trajabadarãba Joseɗeba unusiɗada dji taza Benjamiʉ̃ bolsaɗe. Dji djabarãba cawaɗaẽ́ basída. Mãʉ̃ carea Jose djabarãba jarasiɗaa: “Mʉ̃ djuburia, dairãdrʉ quẽãnadua, baribʉrʉ Benjamiʉ̃ra quẽãrãnadua”.

Jãwã Joseba cawasida dji djabarãra awara panesiɗada. Poya droaẽ́ basida, maʉ̃ bʉrʉ ara maʉ̃da idjira jĩãsida. Idjia jarasida: “Mʉ̃ra Josea, mʉ̃ra bãrã djaba. ¿Mʉ̃ zezera waɗi zocai ɓʉda?”. Dji djabarãba bio cawaɗaẽ́ basía. Joseba jarasida: “Sopuarãnadua, jãʉ̃ jãwã oɗara Jeowaba mʉ̃ra ɓesida nama ẽberãrã ẽdrʉ edamãrẽã. Enenadua mʉ zezera nama”.

Dji djabarãra Joseɗera wãsiɗada ãdji deɗaa, nẽbʉrʉɗe beɗea biara ɓʉda dji zezea. Idjia edesiɗada Egiptoɗaa. Dãrã ɓaɗacarea Josera wãyã dji zezeme ãbaa panasiɗada.