Pẽdra wẽrã warrara ʉ̃rẽbabisia

Jãʉ̃ ewariɗe põãsa nũmasiɗe, Jeowaba jarasida Elíaa: “Wãdua Sareptaɗaa. Jãma ɓʉda wẽrã pẽdrada. Jãʉ̃ba ne cobida bʉra”. Puruɗe eɗa wãsiɗe Elíaba unusida pẽdra wẽrãda tʉbʉ jʉrʉpe ɓʉda. Maʉ̃ bʉrʉ idisida baido doi carea. Idjaɓa idisida paʉ̃da mããrĩ coi carea. Baribʉrʉ pẽdra wẽrãba panusida: “Neẽ́ ɓʉɗa paʉ̃ diai careara. Aɓabe eroɓʉda harinada idjaɓa nedragada. Jãʉ̃gʉra eroɓʉda mʉ̃ warra cobi carea idjaɓa mʉ̃a coi carea”. Eliaba panusida: “Jeowaba jarasia: Bʉa mʉ̃́da paʉ̃da mããrĩ oibʉrʉ, bʉa eroɓaida nedragada idjaɓa harina siɗa, ẽjũã põãsaɗe nũmʉmisa bʉa coira eroɓaida”.

Ara maʉ̃da pẽdra wẽrãra wãsida idji deɗaa. Osida paʉ̃da propeta Jeowaɗebema carea. Pẽdra dji warra, ãdjirã eropanasiɗada coɗira dãrã naʉ̃ ẽjũã põãsaɗe nũmʉmisa, Jeowaba jaraɗa quĩrãca. Ãdji zocoɗe harina eropanʉra jõẽ́ basida idjaɓa ãdji nedragara jõẽ́ basida ewari põãsa nũmʉmisa.

Mãwãnacarea, ¿cãrẽda mãwãsida? Bio djuburiasida. Dji warra zaque pẽdra wẽrã bio enferma ɓesida mãwãnacarea beubarisida. Jãʉ̃ wẽrãba mĩã djuburia idisida Elía carebamãrẽã. Ara maʉ̃da Elíaba bara edasida warra zaquera dji papaba eroɓʉɗe. Edesida ʉ̃taarebema deɗaa. Jãma cʉɗaɗe ɓʉpeɗa, maʉ̃bebʉrʉ dji idisida: “Jeowa, mʉ̃ djuburia wãyã zocai ɓʉda jãʉ̃ warrara”. ¿Cawa basida cãrẽã Jeowaba jãʉ̃gʉ ne ununacada zareada jãwã oi basida? Naẽna jãʉ̃ra jãwã ununacaa basida beuɗada wãyã pirabari ɓeaẽ́da. Idjaɓa pẽdra wẽrã dji warra zaquera israelitaɗebemarãẽ́ basida.

¡Ara maʉ̃da warrara ʉ̃yãbabisida! ¡Wãyã zocaibisida! Elíaba jarasida pẽdra wẽrã: “¡Acʉdua bʉ warrara zocai ɓʉda!” Dji wẽrã bio ɓʉsriɗasida. Maʉ̃ bʉrʉ jarasida Elíaa: “Ʉ̃rãbʉrʉ cawasia bʉra umaquĩrã Ãcõrẽnebemada zebʉrʉda. Jãʉ̃ jara ɓʉra Jeowaɗeba zebʉrʉda. Maʉ̃ bʉrʉ wãrãda o basida”.