QUEDUA NAÃRÃBEMA | SOPUA ƁɄƊE, ¿BEU QUĨRĨÃBARIDA?
2 Jʉrʉdua bʉ carebamãrẽã
“Bãrãba jũmawãyã crĩcha panʉra Ãcõrẽa jũma jaraɗadua, idjia bãrãra waga ɓʉ bẽrã” (1 PEDRO 5:7).
Eɗauɗe crĩchaida beɗea droma bio zarea ɓʉ bẽrã, biara ɓʉɗa beuida. Baribʉrʉ ne awara oida ɓʉda bia crĩchai carea.
Ʉ̃taa iwiɗida. Jãʉ̃ra bio biara ɓʉda dadji so bia sentimãrẽã. Ãcõrẽba dadji beɗea ũrĩ quĩrĩã ɓʉda. Maʉ̃ne bʉa crĩcha ɓʉra jũma jaraida idjia. Ara maʉ̃da ʉ̃taa dji iwiɗida Ãcõrẽa (Salmo 55:22).
Ʉ̃taa dji iwiɗibʉrʉɗe idji trʉ̃ra jaraida. Ãcõrẽ trʉ̃ra Jeowa (Salmo 62:8). Soɗeba jũma jaradua, idjira dji bia quĩrãca ɓʉda (Isaías 55:6; Santiago 2:23); Ʉtaa dji iwiɗibʉrʉɗe biara ɓʉda bʉ dji ɓʉmaʉba ʉ̃taa dji iwiɗida Ãcõrẽa.
Fundación Americana para la Prevención del Suicidio jarasiɗada: “Zocãrã ẽberãrãba ãɗuba ne opeɗa beuɗi carea, ãdji crĩchaɗara biẽ́ panasiɗada. Maʉ̃ne ãdjirãba nẽãrã diabarira jʉrʉɗacada carebaɗamãrẽã”.
Bʉduɓa baẽ́da. Bʉ quĩrĩãra bʉ́a bio carebaida. Bʉ dji biara, bʉ cuariarã siɗa bio careba quĩrĩã ɓʉda bʉ́a bio quĩrĩã ɓʉ bẽrã. Idjaɓa beɗea ɓea Jeowaɗebemarãba, deza deza Ãcõrẽ Beɗea jaradia panʉne, ununida ẽberãrã ãduɓa ne opeɗa beuɗa quĩrĩã panʉda. Beɗea bea Jeowaɗebemarãba beɗea bia jaradia panʉne ãdji crĩcha, ãdji so awara panenida. Jesuba oɗa quĩrãca, ara maʉ̃ quĩrãca dadjirãba carebaɗida (Juaʉ̃ 13:35).
Nẽãrã diabariba carebaida. Ʉ̃cʉrʉ ẽberãba ewariza sopua crĩcha nũme ɓaɗa bẽrã, idjiduɓa ne opeɗa beubadada. Jãʉ̃gʉba idji crĩcha biẽ́ unu ɓʉ bẽrã beu quĩrĩã baɗada.a
QUĨRÃNEBADUA: Ejemploda, aɓa ẽberã oɗe wãbʉrʉɗe, baeɗe wãida eɓasusuaɗe, ¿cãrẽda oibara? Jʉrʉida carebaɗamãrẽã. Ara jãʉ̃gʉ quĩrãca ɓʉda, ẽberã bio sopua baibʉrʉ jʉrʉida carebaɗamãrẽã, idjaɓa jʉrʉida nẽãrã diabadada.
¿CÃRẼDÃ OIBARAI?: Jʉrʉdua nẽãrã diabadarãda ɓʉda sopua baibʉrʉ, bʉ carebamãrẽã.
a Ewariza bʉa crĩcha ɓepeɗa, beuida, jãʉ̃da ara maʉ̃da jʉrʉida nẽãrã diabadada carebaɗamãrẽã. Idjaɓa trʉ̃ida telepononeba bʉ cuariarãda carebaɗamãrẽã.