Ba bo Jehôva ngiagh

Mengoan mebèñ ôsu, niène Bisraelitas be nga kôrô Egipto, ane be nga siane nkôô Sinaí, éde be nga tobe wéñ ôyôm tam. Jehôva a nga dzô Moisés naa a ke nkôô ayôp ye dzô ñe naa : “Me nga kôre Bisraelitas. Nge be kang ya dzale metsing mam, ba ye bo ayong dam ngura aval.” Ane Moisés a nga sighi nkôô ya ke dzô Bisraelitas é dzam Jehôva a nga dzô. Bisraelitas be nga yalane ya ? Be nga yalane naa : “Bia ye bo é dzam ésese Jehôva a dzô bia naa bi bo.”

Éde Moisés a nga bera bere nkôô. Ô wèñ, Jehôva a nga dzô ñe naa : “Niène melu melal ma ye kuiñ, ma ye kobe ya wa. Dzôghe ayong naa môr ézing a taa bere nkôô Sinaí ôyôp.” Ane Moisés a nga bera sighi nkôô ye dzô Bisraelitas naa be kôman, amu Jehôva a ye kobe ya be.

Éyong melu melal meté me nga kuiñ, Bisraelitas be nga yen beveleves, ya yen fe nkut ô too nsut nkôô ayôp. Be nga wokh fe môra édung nzalang ya môra édung tong. Éde Jehôva a nga sighi nkôô a nduan été. Bisraelitas be nga ko édedèè wong, aval é nga ve naa be ku beñeñèè. Nkôô ô nga fonghan, ô mbe fe ndzalan ya ôtsira. Édung tong é nga bera ke da bo édedèè ngu’u. Éde Jehôva a nga dzô naa : “Me ne Jehôva. Miaa yiène ki kang benzame befe.”

Moisés a nga bera bere nkôô, ô wéñ éñe Jehôva a nga ve ñe metsing akal ayong. Metsing meté été, a nga dzô bo aval ba yiène ñe kang, ya aval ba yiène bo mam éning deba. Moisés a nga tsili metsing meté ya lang mo Bisraelitas. Ane Bisraelitas be nga kiagh naa : “Bia ye bo é dzam sese Jehôva a dzô bia naa bi bo”. Ôwe, be nga bo Nzame ngiagh. Ve, ye be nga ye de dzale ?