Béé dzi ki dzale é ngiagh deba

Jehôva a nga dzô Moisés naa : “Bereghe é vôm me ne, nkôô. Ma ye tsili metsing mam mebam mekoa ya kee wô mo.” Moisés a nga ke nkôô ayôp, éde a nga tobe wèñ tang môs ya melu 40. Nté a mbe wèñ, Jehôva a nga tsili awôm metsing mebam mekoa mebèñ ayô, ane a nga kee mo Moisés.

Niène tam é nga lôt, Bisraelitas be nga tem naa Moisés a likh-yang bo. Éde be nga dzô Aarón naa : “Bia yi é môr a wulu ya bia. Boghe bia nzame !” Éde Aarón a nga yalane bo naa : “Zaane é kông sese mi bele.” Éde Aarón a nga mane ñeme kông té ya bo éyema ñat. Éde ayong é nga dzô naa : “É ñat ñi é ne é nzame wèè a nga vèè bia Egipto !” Éde be nga sum naa ba kang éyema té ya bo fet. Ye dzam té é mbe abé ? Ôwé, Amu naa ayong é nga kiagh Jehôva naa ba ye kang fave éñe. Ve, béé dzi ki dzale é ngiagh be nga bo.

Jehôva a nga yen é dzam ésese é nga lôt, éde nga dzô Moisés naa : “Kele é vôm ayong é ne. Be nga bianeyang ma ya kang évus nzame.” Moisés a nga sighi nkôô a bele mebam mebèñ ô mo.

Éyong Moisés a nga bo naa a ntoo bébéñ campamento, éde a nga wokh ane ayong da yiè dzia. Niène a nga siène, a nga kuane naa, ba dzem ya kang éyema ñat. Moisés a nga wokh édedèè abé akal dzam té. A nga wua mebam mebèñ ôsi, éde me nga mane buelé. Éyong té éde a nga buiñ éyema té. Ane a nga sili Aarón naa : “Amu dzé ô va likh naa ayong é likh wô naa ô bo mbia dzam ñi ?” Éde Aarón a nga yalane ñe naa : “Ô taa wokh abé. Wamièn wa yem ane ayong té é ne. Be va yi nzame, ane maa me va mane dzighi é kông deba ya bo éyema di !” Aarón éé nga yiène ki bo dzam té. Éde Moisés a nga bera bere nkôô, ya dzaa Jehôva naa a djii ayong.

Jehôva a nga djii é Bisraelitas be nga kômô ñe kang. Ke é mbe édedèè éban naa Bisraelitas be bèè Moisés ane ntebe ôsu wôba, nga ?