David ba Goliat

Jehôva a nga dzô Samuel naa : “Kele é nda Jesé. É moan fam wèñ mboo éñe a ye bo é kéza a ye bera djié Israel.” Éde Samuel a nga ke é nda Jesé. Éyong a nga yen ntôô moan fam Jesé, éde a nga tem naa : “Ma bunu naa éñi éñe be va top”. Ve, Jehôva a nga dzô Samuel naa, se ki éñii té éñe me va top. Éde Jehôva a nga dzô ñe naa : “Ma yen é dzam é ne môr a n’nem été, se fave aval a yene ô mis.”

Jesé a nga lere Samuel é boan besaman bèñ befe. Ve, Samuel a nga dzô ñe naa : “Jehôva aa ndzi ki top mboo ézing ye été. Ye naa waa bele boan befam befe ?” Jesé a nga yalane ñe naa : “Me bele nfe, éñi a dang mong, David. A ne nseng é kale mintôma miam.” Éyong David a nga ñii, Jehôva a nga dzô Samuel naa : “Éñe alé !” Ane Samuel a nga shuii David mboan nlô é waa ñe ane é kéza a nga ye bera djié Israel.

Ôyôm tam ôsu, Bisraelitas be nga lumane ya Befilisteos, éba be mbe be bele môra mbo-aluman a too andang, éñi a mbe é luman akal deba a too éyôla naa Goliat. Alu ya ômôs, a mbe é poghe Bisraelitas, é yônane naa : “Lômghane môr naa a zu lumane ya ma. Nge a wun ma, bia ye bo alo’o denan. Ve, nge ma me wun ñe, mia ye bo alo’o dèè.”

David a nga ke nseng bita ya bidzi akal é bobeñang be mbe bezima, é vôm nsama bezima bi ye Israel ô mbe. Ane a nga bèè bifiè Goliat a mbe é kobe, éde a nga dzô naa : “Ma ye lumane ya ñe !” Kéza Saúl a nga dzô ñe naa : “Ve, ô ne fave ômômong”. David a nga yalane ñe naa : “Jehôva a ye ma vole”.

Saúl a nga kômô naa David a belan étôp alumane dèñ. Ve, éde David a nga dzô ñe naa : “Méé se ki belan étôp alumane di.” David a nga toa mban-ndama, éde a nga ke é vôm moan ôshuiñ ô mbe ye top mekoa metan, ane a nga ñiè mo é moan épwaa wèñ été. Éyong té David a nga ke mbii é vôm Goliat a mbe. Andang môr té é nga yônan, é dzô ñe naa : “Ômômong wi, zaa va, ma ye likh naa anoan ye a dzôp ya betsit be ye afan, be dzi wa.” David aa nga ko ki wong. Éde, ñe a nga yônane fe ñe naa : “Wa zu ébe ma ya ôkeng ya fe akong, ve me ma zu ébe wa, ya éyôla Jehôva. Se ki bia ébe wa lumane a bo, wa lumane ya Nzame. É môr ase a ne va, a ye yen naa Jehôva éñe a dang ngu’u a lôr ôkeng nga ki akong. A ye mina kee mina besese, é mo maa.”

David a nga toa akoa a furu de mban-ndama été, éde a nga wua do ya é ngu’u ése dèñ. Ya avole Jehôva, akoa é nga ke tetele, ane é nga ke bembe Goliat asu. Andang môr té é nga ku mbim ô si. Éyong té, éde Befilisteos be nga tup nfa ye naa be taa be wiñ. Ébe wa ki, ye ô bele mebun ébe Jehôva ane David a mbe a bele mo ?