David ba Saúl

Niène David a nga wiñ Goliat, éde Kéza Saúl a nga tele ñe ane ntebe ôsu ye nsama bezima wèñ. David a nga wun abuiñ meluman, éde a nga sum fe naa a bele abuiñ éwôgha. Éyong sese David a mbe é so aluman, binenga be nga bo bé dzem ya yiè bya bé dzô naa : “Saúl a nga wiñ bizukh, ve David ñe a va wiñ mewôm bizukh !” Dzam té é nga likh naa Saúl a sum naa a daghe David ya mbia be-mis ye kômô fe ñe wiñ.

David a mbe é bira yem bôm arpa nge ki harpe. Môs ézing, éyong David a nga bôm akal Saúl, éde kéza a nga wua ñe akong. David a nga dzigha saalé akong té avôô, ane é nga ke bembe nfim. Niène dzam té é nga lôt, Saúl a nga bera dzeng abuiñ biyong bife naa a wiñ David. Asughlan, David a nga tup, éde a nga ke sobe éyang été.

Saúl a nga ñong nsama bezima wèñ ô mbe ô bele befam 3 000 naa a ke a dzeng David. Éyong ézing, Saúl a nga ñii a nda-akoa été, é vôm David ya é bôr bèñ be nga ke sobe. É bôr be nga wulu ya David be nga dzô ñe ô si-si naa : “É tam duè éde ñi naa ô wiñ Saúl.” David a nga yir Saúl bébéñ éde a nga kikh ñe éfus ye étôp kéza a mbe a beghe. Saúl aa dzi da ñu tang. Ve, ôsu vaa, David a nga wôrane n’nem abé amu aa dzi ki lere ngang ébe é kéza Jehôva a nga waa mboan. Ya dzam té, aa dzi ki likh naa é bôr bèñ be wiñ Saúl. Éyong Saúl a nga kôrô a nda-akoa été, éde David a nga luè Saúl, é dzô ñe naa : “Me mba wa wiñ, ve maa dzi da bo !” A téé ye tam té, ye Saúl a nga tsen ye sum naa a belane David mbeng ?

Kaa dzôm. Saúl a nga tsini naa a dziran a ñe. Éyong té alu ézing, David ya é moan kal wèñ Abisái be nga ke ñii é campamento Saúl a mbe. A ke kuiñ Abner, é môr a nga wulu a Saúl, ñe a mbe fe ôyô. Abisái a nga dzô naa : “É tam duè éde ñi ! Lighe naa me wiñ Saúl.” Ve, David a nga yalane ñe naa : “Jehôva émièn a ye belane ñe. Tuaghe akong dèñ ya é ndakh mendzim dzèñ bi ke.”

Éyong té David a nga bet nkôô ô mbe bébéñ vaa. Ôyôp wéñ, a mbe yen é campamento Saúl. Éde David a nga yônane naa : “A Abner, amu dzé wéé dzi ki kame a kéza ? É ndakh mendzim dèñ ya akong dèñ bi ne vôm mbé ?” Saúl a nga yem é king David, éde a nga dzô ñe naa : “Ô mba ma wiñ, ve wéé dzi de bo. Me yenang faa naa wa, wa ye tebe kéza ye Israel.” Éyong té éde Saúl a nga bulan é nda kéza dzèñ. Ve, se ki bôr besese be ye é nda-bôr Saúl ébe be nga fem David.