É moan nkus minenga a bera ning

É tam nkôt ô mbe, Jehôva a nga dzô Elías nge ki Élie naa : “Kele a Sarepta. Ô wéñ nkus minenga wa ye wa ve bidzi.” Mbéñ ye a kisôan, Elías a nga yen nkus minenga wé ke wa toa ndzaa. Éde a nga dzaa ñe élas mendzim. Éyong minenga té a nga ke naa a ke ñe ñong mendzim, ane Elías a nga dzô ñe naa : “Éngôngoo, zaa fe ma étun mfem.” Ve, éde nkus minenga ô nga yalane ñe naa : “Maa bele ki nfem me ne wa ve. A lighang ma fave ôyôm harina nge ki farine ya mboan, naa me kôman ôdzô-dzôm bia é ndôma dzam bi ne dzi. Ane Elías a nga dzô ñe naa : “Nge ô yam ma étun nfem té, Jehôva a kiagh naa harina duè, ya mboan wiè baa ye ki man, ya ke kuiñ memveng ma ye bera sum naa ma nong.”

Éyong té éde nkus minenga ô nga ke é nda dzèñ naa a ke yam nfem akal nkulu-medzô Jehôva. Aval ane Jehôva a nga kiagh do, nkus minenga ya é ndôma dzèñ be nga bele bidzi é tam ésese nkôt ô nga tobe. Abôna harina dèñ nge ki abôna mboan dèñ, bi nga tsini abôm.

Ôsu vaa, éde mbimbia dzam a nga boban. Ômômoan nkus minenga té ô nga sum ôkôan, ane a nga wu. Ane minenga té a nga dzaa Elías naa a vole ñe. Elías a nga ñong moan é mo mèñ été, éde a nga bere a ñe édzina é mbe ôyôp. Ane a nga buii moan énong ye sum naa a yaghlan é dzô naa : “Jehôva, éngôngoo bera ve ômômoan wi éning.” Ye wa yem amu dzé dzam té é mbe éyaghane naa Jehôva a bo do ? Amu naa a ke kuiñ tam té, a ke kuè môr ézing aa be ki tare bulan éning. Nfa mboo, nkus minenga té ya é ndôma dzèñ béé mbe ki Bisraelitas.

Ve, ane moan a nga bulan éning, ye bera sum naa a vebe ! Elías a nga dzô nkus minenga naa : “Daghe é moan wiè a nga bera ning !” Ane a nga tobe abuiñ mevakh, éde a nga dzô Elías naa : “Me yemang faa, bebela ya bebela naa, ô ne môr a Nzame ! É dzam wa dzô da so ébe Nzame, amu éyong ase da dzalban.”