Jehôva a ve Elías nge ki Élie ngu’u

Jezabel a nga wokh é dzam é nga lôt ya bekulu-medzô Baal, ane a nga bira wokh ôlun. A nga lôm naa be ke dzô Elías naa : “Ôkiri, wa wa ye fe wu ane bekulu-medzô Baal.” Elías a nga bira ko wong, éde a nga tup éyang été. A nga yaghlane é dzô naa : “Jehôva, méé se fa zômô. Lighe me naa me wu.” Elías a mbe édedèè mvoaran, éde a nga ke ôyô élé asi.

Angele a nga véé Elías ya moan king é dzô ñe naa : « Tebghe, ô dzi. » Elías a nga yen nfem ézizang mekoa ya ndakh mendzim. Ane a nga dzi ya ñu, éde fe a nga ke ôyô. Angele a nga bera ñe véé éyong bèè, é dzô ñe naa : “Dzighe. Wa yiane bele ngu’u akal ékena wa ye bo.” Ya dzam té, éde Elías a nga bera dzi avitsang. Ane a nga bo ékena tang môs 40, ya melu 40, a ke kuiñ nkôô Horeb. Ô wéñ Elías a nga ñii é moan nda akoa été naa a ke ôyô. Ve, Jehôva a nga kobe ñe. Éde a nga dzô ñe naa : « A Elías, dzé wa bo va ? » Elías a nga yalane ñe naa : “Bisraelitas be ndamaneyang é ngiagh be nga bo wa. Be maneya tsam me-altar muè, be maneya fe wiñ bekulu-medzô buè. Éndagha, be nga dzeng-hang naa, be wiñ fe ma !”

Jehôva a nga dzô Elías naa : “kuighe atan, ye tebe nkôô ayôp.” Éyong té éde, ngu-ngu’u nfongha ô nga vumu. Ôsu vaa, si é nga fonghane, éde nduan é nga yông fe. Éyong té, Elías a nga wokh moan king. Ya dzam té, éde a nga buru asu ya étôp, ane a nga likh a tele a moan nda akoa atan. Jehôva a nga sili ñe amu dzé a nga tup. Éde Elías a nga yalane a ñe naa : “Ma étam me ligheyang nkulu-medzô !” Ve, Jehôva a nga dzô ñe naa : “Wéé se ki étam. Bôr 7 000 be ngen Israel naa ma ba lughu. Ken, dzôghe Eliseo naa éñe me va top naa a ye tebe nkulu-medzô évang duè.” Étéñ été ébién, éde Elías a nga ke bo é mam mesese Jehôva a nga dzô ñe naa a bo. Ye wa tem naa Jehôva ñe a ye fe wa vole nge ô bo ñe mewokh ? Ôwé, a ye da bo. Éndagha, bia zu yen é dzam é nga lôt éyong tam nkôt é nga kuiñ.