Jehôva a nga lere Jonás ôdzibi

Bôr be ya Nínive, kisoan ézing ye Asiria, be mbe édedaa mbimbia be-bôt. Éde Jehôva a nga lôm nkulu medzô wèñ Jonás, naa ke be dzô naa, be tsene mefulu. Ve Jonás a nga tup a kéñ zen éfe. A nga dang é tsimi a mbe é ke a Tarsis.

A mang été wèñ, mora ôkôs ônen ô nga bo, bewulu tsimi be nga ko wong. Ane môr ase ya été a nga sum yaghlan benzame bèñ, béé sili naa : “Amu dzé é dzam di da boban ?” Asughlan, Jonás a nga dzô be naa : “Ma me ne bidzô. Me va tup amu méé va kômô ki bo é dzam Jehôva a va dzô me naa me bo. Wuaghane ma a mang été, éyong té ôkôs wa ye sim.” Bewulu tsimi baa nga kumu ki wua Jonas, ve amu a nga sili de mban, éde be nga wua ñe a mang été. Niène be nga bo de, ôkôs ô nga sim.

Jonás a nga simane naa a zu wu. Nté sese a mbe é ñang a mang été, a nga yaghlane Jehôva. Jehôva a nga lôm môra koas. Ane koas té é nga mine ñe, ve kaa ñe wiñ. A too abum koas été, Jonás a nga dzô Jehôva meyaghlane été naa : “Ma kiagh wô naa, ma ye wô bo mewokh éyong ésese.” Jehôva a nga baghle Jonás abum môra koas été tang melu melal. Éyong té a nga ve naa koas té é ke yô Jonás nsakh mang.

Amben Jehôva a nga kôre Jonás, ye é nga yili naa Jonás a nga yiène ki fe ke a Nínive ? Kaa. Jehôva a nga bera ñe lôm wèñ. Éyong té, éde Jonás a nga bo mewokh. A nga ke a Nínive ye dzô mbimbia be-bôr beté naa : “Ébe melu 40, Nínive a ye tobe ntsaman.” Ane éyaghane dzam é nga boban. Bôr be ya Nínive be nga bèè ye tsen mefulu meba. Kéza a nga dzô ayong dèñ naa : “N’yaghlane Nzame ya dzôban abé daa. Tam ézing aa ye ki bia wiñ.” Ane ayong ése é nga dzôban abé ése be nga bo Nzame. Éyong Jehôva a nga yen de, aa dzi ki fe tsam Nínive.

Jonás a nga wokh abé amu naa kisoan déé dzi ki tobe ntsaman. Tame simane : Jehôva a nga lere Jonás ôdzibi ye yen fe ñe éngôngoo, ve Jonás ñe a mbe kaa yen bôr be ya Nínive éngôngoo ! Ndaane do, a nga kôrô a kisôan ye ke tobe nda éloa asi naa a ñong nfuang éé wokh fe abé. Niène éloa é nga mane wu, ôlun ô nga tugha ñe bera ber a n’nem. Éde Jehôva a nga dzô ñe naa : “Ye, wa yen éloa éngôngoo a lôr Beninivitas. Ve ma, ma yen bôr be ya Nínive éngôngoo. Akal té éde be va tobe nkôrane.” Za ayeghle Nzame a nga kumu ve Jonás ? Naa bôr be ya Nínive be nga dang éban a lôr zeze éloa !