Ester a kôre ayong dèñ

Ester a mbe étong Judía, édi é mbe é too é kisoan ya Persia be nga luè naa Susa. Abuiñ mimbu ô mvus, kéza Nabucodonosor a nga vaa é mvong bôr dzèñ a Jerusalén. É moan ñang-ndôm wèñ, a too éyôla naa Mardoqueo éñe a nga yale ñe, a mbe mbo ésèñ Kéza Asuero ya Persia.

Kéza Asuero a nga yi nféféñ kéza minenga. Éde bebo-bisèñ bèñ be nga ke ñe lere é binenga be nga dang mbeng é si dzèñ, été Ester ñe a mbe fe. Ébe binenga beté, kéza a nga top Ester naa éñe a bo kéza minenga. Mardoqueo a nga dzô Ester naa a taa ki dzô môr ézing naa a ne Judía.

Éngung môr ézing é too éyôla naa Hamán a mbe ndjié bitong bikéza. A nga kumu naa môr ase a kur ñe mebong asu, ve Mardoqueo aa nga kuru ki ñe mebong asu. Hamán a nga wokh dzam té édedaa abé naa, a nga kumu ñe wiñ. Éyong Hamán a nga yem naa Mardoqueo a ne moan Judío, a nga kômane aval a mbe mane wiñ Bejudíos bese be ya si té. A nga dzô kéza naa : “Bejudíos be ne abé ; ba yiane be mane wiñ besese”. Asuero a nga yalane ñe naa : “Boghe é dzam wa dang yen mbeng”. Ane a nga likh ñe naa a bo atsing. Atsing Hamán a nga bo é nga dzô naa alu 13 ya é ngoan Adar, bôr ba yiane wiñ Bejudíos. Ve, Jehôva a nga yen é dzam sese é nga lôt.

Ester aa nga yem ki dzam ézing ébe atsing té. Ane Mardoqueo a nga lom ñe do, a dzô fe ñe naa : “Wa yiane ke kobe kéza”. Ester a nga yalane ñe naa : “É môr sese a ke yen kéza kaa naa émièn éñe a bane ñe, a yiane wu. Daa é ntoo melu 30 kaa naa kéza a luè ma ! Vedaa, ma ye ke. Nge a lere ma ntum édjié wèñ, ma ye ning. Ve nge a bo kaa de bo, ma ye wu.”

Ester a nga ke nseng é nda kéza. Niène kéza a nga yen ñe, a nga lere ñe ntum édjié wèñ. Ester a nga yir bébéñ, éde kéza a nga sili ñe naa : “Za dzam wa kumu naa me bo akal duè, a Ester ?” Ester a nga dzô ñe naa : “Ma kumu naa ô zu ya Hamán é fet ma ye dzemle. Éyong be mbe fet té, Ester a nga bera ba bane fet éfe. Éyong be mbe é fet bèè, kéza a nga bera sili Ester naa : “Za dzam wa kumu naa me bo akal duè ?” Ane a nga dzô ñe naa : Môr ézing a kumu ma wiñ, ma ye ayong dam, éngôngoo kôreghe bia. Kéza a nga sili ñe naa : “Za a kumu wa wiñ ?” Ane a nga yalane ñe naa : “Mbimbia môr ñi, Hamán”. Asuero a nga wokh édedaa abé naa, étéñ té ébién a nga lôm naa be wiñ Hamán.

Ve, môr ézing éé mbe ki fe tsam atsing Hamán a nga bo, amben kéza émièn. Éde, kéza a nga nomane Mardoqueo ane ndjiè bitong bikéza, a likh fe ñe naa a bo nféféñ atsing. Mardoqueo a nga bo nféféñ atsing éfe é nga dzô naa Bejudíos be mbe kame bébién éyong ba ye lumane ya bo. Alu 13 ya é ngoan Adar, ayong Bejudíos é nga wiñ minzizing mieba. A téé ye môs té, Bejudíos ba dzemle n’wunane té, mimbu misese.