Daniel a ne ébéñ bebuémbuém été

Darío moan Medo, a mbe kéza nfe ya Babilonia. Darío a nga ñu tang naa Daniel a mbe ngura aval. Éde, a nga tele Daniel ane é môr a wulu ya é bôr be ne édedaa éban é si dzèñ. Bôr beté be nga vini Daniel be nga kumu fe man a ñe. Be nga yem naa Daniel a yaghlane Jehôva biyong bilal ébe môs. Ya dzam té, éde be nga dzô Darío naa : “A kéza, atsing da yiane bo naa, bôr besese ba yiane yaghlan fave wa. Nge môr a biane atsing té, ba yiane ñe wua ébéñ bebuémbuém.” Darío a nga dzing ôsimane té, ane a nga san atsing té.

Niène Daniel a nga wokh nféféñ atsing té, éde a nga ke é nda dzèñ. Ô wéñ, a nga kur mebong, a nga yaghlane Jehôva ôsu é wunu a mbe a yoo. Minsusum mi-bôr mité be nga ñii étéñ té ébién é nda dzèñ, éde be nga kuane ñe a yaghlan. Éyong té, éde be nga ke ba mara mbii naa ba ke dzô Darío naa : “Daniel a biane wa. A bo meyaghlane melal ébe môs, akal é Nzame wèñ.” Darío a nga bira dzing Daniel, aa nga kumu ki naa be wiñ ñe. Éde a nga lôr ngura té môs, é tem é dzam a mbe bo, naa a kôre Daniel. Ve, amben émién éé mbe ki fe tsen atsing a kuè be sanang. Ya dzam té, éé mbe ki fe a bele dzam éfe a mbe bo niène ve naa, a lôm naa be wua Daniel ébéñ bebuémbuém be mbe bé lôban be too fe ayokh.

Alu té, Darío aa mbe ki ke ôyô amu a nga yep akal Daniel. Kikiri, a nga ke a mara é vôm ébéñ é mbe, ane a nga dong ôsi, a yônane naa : “A Daniel, ye é Nzame wiè a ve kôre wa ?”

Darío a nga wokh king. A mbe Daniel ! Éde a nga yalane Darío naa : “Angele Jehôva a va fet anu bebuémbuém. Béé dzi ki ma bo dzam ézing.” Darío a mbe édedaa mevakh ! Éde a nga lôm naa be vèè Daniel ébéñ ôsi. Daniel a nga kôrô kaa aveng ézing ô ñuu. Ôsu vaa, kéza a nga lôm naa : “É bôr be nga somane Daniel be wua bo ébéñ.” Niène be nga wua bo, bebuémbuém be nga mane ba dzi étéñ té ébién.

Darío a nga ve ayong dèñ atsing di : “Bôr besese ba yiane kang é Nzame Daniel. Amu naa a nga kôre Daniel ébéñ bebuémbuém été.”

Ébe wa ki, ye wa, wa yaghlane fe Jehôva melu mesese ane Daniel ?