Bangele ba kanghle abyale Yésu

Ndjié Beromanos, César Augusto, a nga lôm naa Bejudíos besese be ke é vôm be nga byale naa ba ke tsiliban. Aval té, éde José ba María be nga bo ékena naa ba ke a Belén, amu naa éñe é mvong José é nga so wéñ. A kuane a ntoo é tam María a nga yiane byèñ é moan wèñ.

Éyong be nga kuiñ a Belén, é vôm mboo be nga kuane naa be ne lighi ô mbe fave é vôm betsit ba tobe. Ô wéñ, éñe María a nga byèñ Yésu. Ane a nga furu ñe bitôp bi mbe ôfefep été, éde be nga bui ñe ya nkee é vôm ba ve betsit bidzi.

Bébéñ a Belén, bekale mintôma be nga lôr alu nseng, bé kale mintôma mieba. Étéñ té ébién, éde angele a nga lereban ébe bo, be nga yen éyèè, ya é duma Jehôva ézizang deba. Bekale mintôma be nga bira sighan. Ve, angele a nga dzô be naa : “Mi taa ko wong. Me va so mina mbemba mefuèñ. Mesías a va byale ému, a Belén.” Éyong té, abuiñ bangele befe be nga bera lereban, a dzôp été, bé dzô naa : “Duma é boghe ya Nzame ya dzôp, ya naa, mvoa é boghe a si.” Éyong té, éde bangele be nga dzang. Za dzam bekale mintôma be nga wôrane ?

Be nga dzôhane bevoo ya éba bevoo naa : “Nkehan a Belén éndagha !” Aval té éde be nga ke étéñ té ébién. Éde be nga kuane José ba María é vôm betsit ba tobe ya é moan a kuè a ndaghe byale.

É bôr besese be nga wokh é dzam angele a nga dzô bekale mintôma be nga bira yaghan. María a nga tem abuiñ ébe bifiè angele a nga dzô, éé dzi ki bi vuèn môs ézing. Bekale mintôma be nga bera bulane ya minsama mintôma mieba, bé ve Jehôva akiba akal é mam be nga yen ya wokh.