Jehôva a nga kame Yésu

Si ézing é mbe é vôm nlô-dzôp wa byale bébéñ ya Israel. Bôr be ye ô wéñ be mbe be bele mebun naa atétéñ é mbe ba lere zen. Alu ézing, bôr be ye si té be nga yen a dzôp, é dzôm é nga fônane ôtétéñ, wé bira ngiaban ô mbe fe wé wulu, ane be nga béé wô. « Ôtétéñ » té, ô nga ke kuiñ a bo a Jerusalén. Ane bôr beté be nga ke ba sili bôr naa : “É moan a ye bo kéza Bejudíos a ne vôm mbé ? Bi va so naa bia zu ñe kur mebong”.

Herodes, kéza ya Jerusalén, a nga wokh mefuèñ nfa nféféñ kéza té, ane a nga bira yep. Éde, a nga sili befara naa : “Vôm mbé é kéza ñi a nga yiane byale ?” Be nga yalane ñe naa : “Bekulu-medzô be nga dzô naa a ye byale a Belén.” Éde Herodes a nga luè é bôr be nga so é si é mbe é vôm nlô-dzôp wa byale, ye dzô be naa : “Kelan a Belén, dzenghane ômumoan té wéñ. Éyong té, bulghane naa mi dzô ma é vôm a ne. Amu ma kumu fe ñe ke kur mebong.” Ve, dzam té é mbe minaa.

« Ôtétéñ » ô nga bera sum naa wa wulu a dzôp été. Ane bôr beté be nga béé wô a ke kuiñ a Belén. Éyong té éde « ôtétéñ » ô nga tebe nda ézing ayôp, éde bôr beté be nga ñii. Ane be nga kuane Yésu ba ñia, María. Be nga kuru ômumoan té mebong, ane be nga ve ñe bedas ane kông, incienso nge ki oliban, ya mirra nge ki myrrhe. Ve, ye Jehôva éñe faa a nga lôm bôr beté é vôm Yésu a mbe ? Kaa dzôm.

Alu té, Jehôva a nga dzô José nge ki Joseph biyeyem naa : “Herodes a kumu wiñ Yésu. Tebeghe, ñonghe ñu ngal ya é moan wiè, tupghane fe Egipto. Lighane ô wéñ, mi taa ki dughan a ke kuiñ éyong ma ye wa dzô naa abé é lôrang.” Étéñ té ébién, éde José ya é mvong dzèñ be nga ke Egipto.

Nfa mboo, Jehôva a nga dzô bôr be ye é si é mbe é vôm nlô-dzôp wa byale naa, be taa bera dughan ébe Herodes. Éyong Herodes a nga ñu tang naa baa ye ki bera dughan, a nga bira wokh abé. Amu a kuè aa mbe ki fe a bele aval a mbe kuan a Yésu. Éde a nga lôm naa be mane wiñ boan befam besese be ya Belén, éba be mbe be bele n’mièñ Yésu. Ve, Yésu a nga tobe nkôran, amu a mbe ôyap, Egipto.

Tam é nga lôt, ane Herodes a nga wu. Éyong té, éde Jehôva a nga dzô José naa : “Abé é lôrang, mi ntoo dughan.” José, María, ya Yésu be nga dughan Israel, éde be nga ke tobe a kisoan Nazaret.