Yésu a yeghle beyeghe bèñ aval ba yaghlan

É mam mese Befariseos nge ki Bepharisien be mbe béé bo, be nga bo me akal a karane ya bôt. Niène be nga bo é dzam é ne mbeng, be nga dzeng naa be vaghane ya é bôr bevoo. Be nga bobo meyaghlan é vôm bôr abuiñ ba lôt nfa ye naa môr ase a saghe be. Be mbe bé yeghe ye baghle ya nlô, meyaghlan me mbe ayap ya baalane mo Besinagogas nge ki minseng minseng, é vôm bôr be mbe wokh ane ba kobe. Éde bôr be nga kam éyong Yésu a nga dzô be naa : “Mi taa yaghlan ane Befariseos. Ba bunu naa be ne dukh Nzame amu ba kobe abuiñ, ve Nzame a se ki aval té. Meyaghlan ma daghe fave élat denan ya Jehôva. Éyong mia yaghlan, mi taa baalé mam mevoo mevoo. Jehôva a dzing naa ô dzô ñe é mam wa wôran.

“É ne mina yiène yaghlan aval di : « É Tare wèè a ne a dzôp, éyôla duè é boghe nfuban. Édjié duè é zakh. Nkômane wiè ô boban a si va, aval ane wa boban a dzôp. » Yésu a nga sili fe naa be yaghlane akal bidzi bi ya môs, akal n’dzamane minsem mieba ye é mam mefe ba kômô.

Yésu a nga bera koghle naa : “Mi taa sim naa mia yaghlan. Kenghan ôsu ya sili Ésaa wônan Jehôva, é mam me ne mbeng. Bebyèñ bese ba kômô ve é boan beba é mam me ne mbeng. Za ésaa a ne bo naa, nge é moan wèñ a sili ñe nfem, éyong té a ye ñe zu kee akok ? Nge ki naa, nge a sili koas, a ye ñe zu kee ñô ?”

A kôre ye vèè, Yésu a nga lere be ayeghle ba yiène ñong : “Nge mina, mia yem ve é boan benan é mam me ne mbeng, é ne bebela naa, Ésaa wèè Jehôva, a ye bia ve nfufup nsisim wèñ ? Éde bia yiène ñe wô sili.” Ye wa belane melepgha Yésu ? Ô ne ki yaghlane akal beza mam ?