Ntun ya nkôô ayôp

Niène a nga mane top beyeghe 12, Yésu a nga sighe nkôô ya ke kuiñ é vôm nsama bôr ô nga kôan. Be nga so a Galilea, a Judea, a Tiro, a Sidón, a Siria, ya nfa mboo ye Jordán. Be nga so minkôkoan ye é bôr mbimbia minsisim mi nga tsible. Yésu a nga mane lerre bese. Ane a nga bet nkôô ayôp naa a yeghle be. A nga dzô be é dzam ba yiène bo nge ba kômô tobe angom ya Nzame. Bia yiène yem naa, bi ne ashuèn ya Jehôva, bia dzeng fe naa, bi yeghe a dzing ñe. Ve, bii se ki dzô naa bia dzing Nzame nge biaa dzing ki é bôr bevoo. Bia yiène lere bôr bese mbemba fulu ye tobe sôsôe ya be, ambene minzinzing miè.

Yésu a nga dzô naa : “Se mengom menan éme mina dzing étam. Mina yiène fe dzing minzinzing mienan ye dzame be abé ba bo, ya n’nem ôse. Nge wa yen naa môr ézing a bele wô dzam a n’nem, dzigha ñe ke yen ye dzôban abé duè. Boghan é bôr bevoo aval mina kômô naa be bo mina.”

Yésu a nga ve fe mbemba melepgha ma daghe akum ya si. A nga dzô naa : “Da dang mbeng naa ô bo angom Jehôva ndaane naa ô dzeng naa ô bele abuiñ mono. Be ne wup mono té, vedaa, môr ézing éé se ki wup angom mina Jehôva. Dzameghane naa mina yep a n’nem nfa é dzôm mina ye dzi, é dzô mina ye ñu, nge ki é dzôm mina ye boat. Daghane anoan : be bele abuiñ bidzi éyong ése amu Nzame a bis be. Mi ne fiang yep a n’nem, se ki éde da ye ve naa, mi koghlane môs mboo éning denan. Simghane naa Jehôva a yem é dzôm mina kômô.”

A kuane naa bôr baa be ki wokh môr nfe éé kobe ane Yésu. Betebe ôsu ya menda menzame meba be mbe kaa be yeghle mam meté . Ve, amu dzé Yésu a mbe mbemba n’yeghle ? Amu é mam mese a nga kobe me nga so ébe Jehôva.