Be biyang Yésu

Yésu babe mintôô mièñ be nga ke Nkôô olivos nge ki bolivier, bé lôt a yee ya Cedrón. A kuane naa ézizang alu é lôrang, ya naa ngomdan daa fe é mbe abôm. Niène be nga kuiñ afup Getsemaní, Yésu a nga dzô beyeghe bèñ naa : “Lighane va, ye tsini naa mina momo.” Ane a nga ke ôyôm ôyap ya bo,ye kur mebong ôsi. Amu a nga bira yep a n’nem, éde a nga yaghlane Jehôva naa : « Nkômane wiè ô boghe. » Ane Jehôva a nga lôm angele naa a zu ve Yésu ngu’u. Éyong Yésu a zu daghe beyeghe bèñ, a kuane be bô ôyô. Éde a nga dzô be naa : “Vééghan ôyô ! Se tam ya ke ôyô éde di ! A nto awôla minzizing miam mia zu me biñ.”

Ane Judas ve siène ya môra nsama bizima be bele mimpwara, ya bingeng. A mbe é yem é vôm a mbe kôane Yésu, amu be mbe bé zu afup té. Judas a nga dzô bizima a nga so bio naa a ye be lere aval ba yem za a ne Yésu. Ane a nga yir Yésu bébéñ ye dzô ñe naa : “Mbôlô, a N’yeghle,” ye ñang ne amang. Yésu a nga dzô naa : A Judas, ye wa kong ma, wé ñang ma amang ?”

Yésu a nga yir nsama bizima bébéñ ye sili be naa : « Mia dzeng za ? » Be nga yalane naa : « Yésu ya Nazaret. » Éde a dzô be naa : « A ne ma. » Befam bete b enga bulan ô mvus ye vane ku ôsi. Yésu a nga bera be sili naa : « Mia dzeng za ? » Baa be bera yalane naa : « Yésu ya Nazaret. » Yésu a yalane a bo naa : “Me dzôhang mina naa, ma mene ñe. Lighane naa bôr beté be ke.”

Éyong Pedro nge ki Pierre a woghang é dzam da lôt, ane a nga toa mpwara wèñ ye kikh Malkus alo, nkôm é fara n’nen. Ve, Éyong Yésu a nga name môr té alo éde a nga let. Ane ki a nga dzô Pedro naa : “Ñièghe mpwara wiè é vôm wa be. Nge wa lumane ya mpwara, wa ye fe wu ya mpwara.” Ane bizima bi nga biñ Yésu, be mane ñe tsini mo. Beyeghe bèñ be nga mane tup. Ane môra nsama bizima ô nga biñ Yésu ve ke ñe ébe Anás nge ki Anne, ndjiè befara. Anás a nga sum sili Yésu minsili, a kôre ye vèè a nga lôm ñe ébe Caifás nge ki Caïphe é fara n’nen. Ve za dzam da ye biane mintôô ?