Pedro a dzô naa aa yem ki Yésu

Éyong Yésu a mbe a nda a yôp babe beyeghe bèñ, a nga dzô be naa : “Mina bese mina ye me lame alu di.” Pedro nge ki Pierre a nga dzô naa : “Ma, kaa dzôm ! Nge é bôr besese ba, ba lame wa, ma, maa ye ki wô vaghle lame.” Vedaa, Yésu a nga dzô Pedro naa : “Kaa naa n’nôm kup a long, wa ye dzô biyong bilal naa waa yem ki ma.”

Éyong bizima bi nga k’a Yésu ébe Caifás nge ki Caïphe, a kuène naa, abuiñ beyeghe be mana tup. Ve beyeghe bebèñ ébe be nga tông ñe ye nsama bôr. Pedro a mbe môr mboo ye été. A nga ke kuiñ nseng ye é nda Caifás, ye wobane nduan. Nkaba nduan ô nga ve naa, mbo-ésèñ minenga a yen ñe asu, éde a nga dzô Pedro naa : “Ma yem wa ! Ô mbe ya Yésu !”

Ane Pedro a nga dzô naa : “Kaa ! Méé mbe ki ya ñe ! Maa yem ki é dzam wa tsiè !” A nga ke étun ôngôô. Vedaa, mbo-ésèñ minenga nfe a nga yen ñe ye dzô nsama bôr naa : “É môr ñi a mbe ya Yésu !” Pedro a nga dzô naa : “Maa vaghle ki yem Yésu !” Môr nfe a nga dzô naa : “Ô ne môr mboo ye été ! Aval wa kobe da lere naa ô ne môr ya Galilea, ane Yésu. Ve Pedro a kane bindang naa : “Maa yem ki ñe ! ”

Éyong té ébiéñ, éde n’nôm kup a nga long. A a nga yen ane Yésu a venghan, ye daghe ñe. A nga simane é dzam Yésu a nga dzô ñe, ane a nga kuiñ atan, é bira yii.

Nté té, bôr be ya Sanedrín be nga sulane ébe Caifás naa be kikh Yésu nsang. A kuène naa be ñonghang nkighane naa ba wiñ Yésu, ve be mbe bé dzeng akalgha é ne ve naa be bo de. Vedaa, béé mbe ki be bele akalgha é ne ve naa be bo do. Asughlan, ane Caifás a nga sili Yésu émién naa : “Ye ô ne é Moan Nzame ?” Yésu a nga dzô naa : “Me ne ñe.” Éde Caifás a nga dzô naa : “Za mekalgha mefe bia bera dzeng. A tè-hang Nzame !” Ane bese be nga kikh naa : “Môr té a yiène wu.” Be nga sum bime ñe mebèñ memang ye tu ñe menden asu. Be nga buru ñe mis, ye bime ñe bé dzô naa : “Nge ô ne nkulu medzô, tame bia dzô é môr a va bime wa !”

Niène kiri é nga lene, be nga k’a Yésu a Sanedrín, ye bera sili ñe naa : “Ye ô ne é Moan Nzame ?” Yésu a nga yalane be naa : “Mina bebién mia dzô naa me ne é Moan Nzame.” Ane be nga kikh naa a tè-hang Nzame. Éde ba k’a ñe ébe Poncio Pilato, é ngomane Beromanos nge ki Beromain. Za dzam da ye boban ? Bia ye de yen ôsu.