AYEGHLE 18
N’vaane é bôt bevoo ngu’u éyong bi ne bisulan bi y’ékoan
« Tughane daghe bevoo ya éba bevoo [. . . ], n’vaane é bôt bevoo ngu’u »—BEHÉB. 10:24, 25.
ZA 88 Lereghe ma mezen mwiè
AKIGHE BESa
1. Amu dzé bia ve biyalan bisulan bi y’ékoan ?
AMU dzé bia tobe bisulan bi y’ékoan ? Ôsusua, akal a lughu Jehôva (Bya 26:12 ; 111:1). Bia tobe fe bisulan, amu, bi ne vaane ngu’u bevoo y’éba bevoo metam me ne minzukh ma (1 Beth. 5:11). Éyong bia bere wo, ye ve éyalan, bia dzale minsonghane mibèñ mité.
2. Za biyong bi bele naa, bia ve biyalan bisulan bi y’ékoan ?
2 Sono ése, bi bele biyong naa, bia ve biyalan bisulan bi ye bikoan bia. Éfônan, bi ne ve biyalan éyong bia bo ayeghle Ô Momo. Bisulane bia bi ye ézizang sono, bi ne fe ve biyalan éyong bia bo mimbeng mi-mam mi ya nsisim, ayeghe Bible y’ékoan ya mengap ba sili é bôt be ne vèè naa be yalane minsili mizing.
3. Za minzukh bi ne tubane mio, aval avé ki nten Behébreu 10:24, 25 é ne bia vole ?
3 Bia bese bia kômô lughu Jehôva ye ve bobedzang ya bekal baa ngu’u. Ve, éyong bia ve biyalan, bi ne tubane minzukh. Bi ne ko wong naa, bia ve biyalan, nge ki, bi ne kômô ve éyalan ya n’nem ôse, ve daa, baa top ki bia, aval bia kômô de. Aval avé bi ne dang minzukh mité ? É dzam ntôl Pablo a nga dzô Behébreu é ne bia vole a yalane nsili té. Éyong a nga kobe amu dzé é ne éban naa bi tobe bisulan bi y’ékoan, ntôl Pablo a nga dzô naa, bia yiène bembe nfa y’a « vaane ngu’u bevoo ya éba bevoo » (A lang Behébreu 10:24, 25). Éyong bia yen nté mbé, amben é boan biyalan bia ve, bia wône é bôt bevoo mebun, bia tugha wokh amu dzé é ne éban naa, bi ve biyalan bisulan bi y’ékoan. Ye naa, nge baa ve ki bia nkobe éyong sese, bia ye bele mevakh akal naa, é bôt bevoo be va bele éyong naa, be ve éyalan—1 Pierre 3:8.
4. Mam melal mevé, bia zu yen ayeghle di été ?
4 Ayeghle di été, bia zu sum yen aval avé bi ne vaane ngu’u bevoo ya éba bevoo é boan bikôan, é vôm é bôt ba yalan béé se ki abuiñ. Bia ye fe yen aval avé bi ne vaane ngu’u é bura bikôan, é vôm é bôt ba ve biyalan be ne abuiñ. Asughlan, bia ye yen aval avé é mam bia dzô biyalane bia été, bi ne ve é bôt bevoo ngu’u.
N’VAANE É BÔT BEVOO NGU’U É BOAN BIKÔAN ÉTÉ
5. Aval avé bi ne ve é bôt bevoo ngu’u, éyong bii se ki abuiñ ésulan ?
5 É boan bikôan nge ki boan minsama mii be ki bikôan, é bôt ba bere wo naa ba yalane, béé se ki abuiñ. Biyong bizing é môt a wulu ayeghle, a yiène yane aayap naa, é môt a kômô ve éyalan a bere wo. É ne ve naa, ésulan é yen ane da bem, ye fe naa, daa vaghle ki ve ngu’u. Ô ne bo za dzam ? Tobghe nkômane naa, wa bere wo abuiñ biyong. Éyong wa bo de, ô ne ve naa é bôt bevoo be bira fe ve biyalan.
6-7. Aval avé bi ne saghe é wong bia wôran nfa y’a ve biyalan ?
6 Za dzam ô ne bo, nge wa ko wong éyong wa simane naa wa ve biyalane ? Abuiñ y’ébe bia ba ko fe wong. Ve, nfa ye naa, bi ve bobedzang ya bekal baa ngu’u, bi ne belane mefakh mefe ma ve naa, bi saghe wong té. Aval avé bi ne de bo ?
7 Mi ne belane ayôm boan mefakh mézing ma kuiñ meyeghle me ye b’Ô Momob be ye melu ô mvus. Éfônan, a yem kômane (Mink. 21:5). Nté sese mia ye tugha wokh ayeghle, aval té fe, miaa ye ki fe ko wong naa, mina ve biyalan. Édi voo é ne naa, mia yiène ve biyalan bi ne bitun (Mink. 15:23 ; 17:27). Éyalan é ne étun da ye mina ve naa, mi taa dang ko wong. Éyalan é ne étun, é ne bo édi déé bele ki abuiñ bifiè, ébubu a wokh akal bobedzang ya bekal buè, amu déé bele ki abuiñ mesiman. A yalane ya bifiè buè da ye lere naa, ô va yem kômane ye naa, ô va tugha wokh ayeghle.
8. Aval avé Jehôva a yen mengu’u bia ve ?
8 Nge a ne naa, ô vaghang mefakh ma, ve daa, ô tèè naa, ô ngene wa ko wong, za dzam ô ne bo ? Tobghe ndzi-n’nem naa, Jehôva a bira dzing mengu’u wa ve naa ô bo de (Luc 21:1-4). Jehôva aa sili ki bia naa, bi bo é dzam a yem naa, bii se ki bo (Beph. 4:5). Kômane é dzam ô ne bo, aval ô ne de bo, ye yaghlane naa, n’nem ô bôme wa ôsi. Ôsusua, ô ne tare kômane naa, wa ve éyalan é ne étun.
N’VAANE É BÔT BEVOO NGU’U É BURA BIKÔAN ÉTÉ
9. Amu dzé é ne bo nzukh naa, bi ve biyalan é bura bikoan été ?
9 Nge ékoan duè é bele abuiñ bekare fuèñ, é ne bo édedèè nzukh naa, ô ve éyalan. A ne kuiñ naa, abuiñ bobedzang ye bekal buè ba bere wo étéñ daa, éde é môt a wulu ayeghle a ne kaa yen énam duè. Éfônan, Danielle a mbe a bele abuiñ mevakh éyong ésese a nga ve biyalan bisulanc. A yen de a ne dzam daa y’ékang a ve Nzame, aval a ne ve é bôt bevoo ngu’u, ye aval a ne wône mebun mèñ ébe meyeghle me ya Bible. Ve, niène a nga ke é bura ékoan, éé mbe ki fe ve abuiñ biyalan, biyong bizing kaa ki ve éyalan daa. Danielle a dzô naa : « Me nga wokh dzam té abé, me nga wôran ane me dzimleyang dzam ézing. Éyong dzam té da bodan abuiñ biyong, ô ne simane naa é moadzang a wulu ayeghle a vang de bo. »
10. Za dzam bi ne bo nge bia kômô ve éyalan ?
10 Ye wa fe ô wôraneyang é dzam Danielle a nga wôran ? Nge é ne nèè, ô ne kômô sili mo ôsi, ô nga bo v’a bèè ane ésulan da lôt. Ve, ô taa sili mo ôsi. Za dzam ô ne bo ? Ô ne dzeng naa, ô kômane abuiñ biyalan akal ésulan ésese. Nge baa top ki wa éyong ayeghle da sum, ô ngene ô bele tam nté sese ayeghle da ke ôsu. Éyong wa kômane akal ayeghle y’Ô Momo, dzenghe naa, ô fas aval mebong mesese ma laran ye nlô-adzô ye ayeghle té. Nge wa bo de, wa ye bele mbemba biyalan bi ya ve, nté sese ayeghle da ye ke ôsu. Ya fe naa, ô ne kôman akal mebong ma tsiè adzô be bebela be ne édokh ye nzukh ya ve ayilgha (1 Becor. 2:10). Amu dzé ? Amu naa, aval mebong meté, méé bele ki abuiñ bôt ba kômô ve biyalan. Nga kuiñ naa, amben ô mana dzale mefakh meté mesese, wa yen naa, ébe abuiñ bisulan wéé dzi ki ve biyalan, za dzam ô ne bo ? Keng yen é moadzang a wulu ayeghle kaa naa, ésulan é sum, ye dzô ñe minsili wa kômô yalane mie, éyong ayeghle da ye boban.
11. Za dzam nten Bephilippien 2:4 da tsini bia naa bi bo ?
11 A lang Bephilippien 2:4. Ya nsisim Nzame, ntôl Pablo a nga dzô bekristen naa, be bis é bôt bevoo. Aval avé bi ne dzale melepgha meté éyong bia tobe bisulan ? Bia yiène simane naa, é bôt bevoo baa fe, ba kômô ve biyalan ane bia.
Aval mia likh naa é bôt bevoo be kobe éyong mia lèè minlang, mia yiène fe likh naa, é bôt bevoo be ve biyalan bisulan (A daghe abong 12)
12. Aval avé bi ne yeme ve é bôt bevoo ngu’u éyong bi ne bisulan ? (A daghe fe évaghle).
12 Tame fas é dzam di. Éyong wa lèè minlang ya memvuiñ muè, ye wa likh be éyong naa, baa fe be kobe ? Wa ve be éyong, nga ! Amu wa kômô naa, baa fe be kobe. Aval daa fe, éyong bi ne bisulan bia kômô naa, é bôt bevoo baa fe be ve biyalan. Bebela a ne naa, a ve bobedzang ya bekal baa éyong naa, be lere mebun meba béé ve biyalan, é ne fe ngum aval bi ne be ve ngu’u éyong bi ne bisulan (1 Becor. 10:24). N’tamane yen aval bi ne bo dzam té.
13. Aval avé bi ne ve naa, abuiñ bôt be ve biyalan bisulan ?
13 É dzam daa bi ne bo, é ne a ve biyalan bi ne étun, naa, abuiñ bôt be bele fe éyong naa, ba yalane. Bemvene ya bekare fuèñ be ne akeng, be ne lere éfônan nfa té. Amben éyong wa ve éyalan é ne étun, ô taa mane kulu mesimane mesese. Nge ô mane kulu é mam mese me ne abong été, é bôt bevoo baa ye ki bera bele dzam ya dzô. Éfônan, abong di, da ve mefakh mebèñ ; a ve biyalan bi ne étun, ye kaa mane kulu mesimane mesese. Nge wa ba tare ve nkobe akal abong té, dzenghe fave naa, ô ngône ôsiman ôvoo.
Éyong évé bi ne top naa, biaa bere ki wo, nge ki naa, bia bere wo ésulan ? (A daghe abong 14)f
14. Dzé é ne bia vole naa, bi yem abim biyong bia yiène bere wo ? (A daghe fe évaghle).
14 Ô taa dzeng naa ô bere wo éyong ésese naa wa be dang yen. Nge bia bira bere wo, é ne yene ane bia kômô yemle é môt a wulu ayeghle naa, a top bia, amben é bôt bevoo béé be ki yalane. Dzam té é ne vane ve naa, é bôt bevoo be sili mo ôsi—Eccl. 3:7.
15. (a) Aval avé bia yiène ñong mam nge baa top ki bia naa, bi ve éyalan ? (b) Aval avé é bôt ba wulu ayeghle ba lere naa, ba bis môt asese ? (A daghe nkaalé, « Nge wa, wa wulu ayeghle. »)
15 Nge abuiñ bôt da bere mo éyong ayeghle da boban é ne kuiñ naa, baa ve ki wô nkobe aval wa kômô. Biyong bizing, é môt a wulu ayeghle éé se ki mane ve môt asese nkobe. Dzam té é ne bia pôô atakh ô ñuu, ve daa, biaa yiène ki de yen n’nem abé—Eccl. 7:9.
16. Aval avé bi ne saghe é bôt ba yalane bisulan ?
16 Nge wéé se ki yalan abim wa kômô, ye wéé se tugha bèè éyong é bôt bevoo ba yalan ? Éde, niène ésulane da man, ô ke be saghe akal é mbemba biyalan be va ve. A saghe bobeñong ye bekal buè akal é mbemba biyalan be va ve, da ve fe ngu’u ane biyalan ô mbaa ve (Mink. 10:21). A kuru môt foas akal é mbemba éyalane a va ve, daa fe, é ne ngura aval ye bi ne saghe é bôt bevoo.
MEVAL MEFE BI NE SAGHE É BÔT BEVOO
17. (a) Aval avé béésaa be ne vole é boan beba naa, be yem kômane mbemba biyalan ? (b) Aval ane bia yen de éngengeng été, za mam menii, bia yiène bo naa, bi kômane mbemba éyalan ? (A daghe fe atoan é ne asi).
17 Za dzam afe bi ne bo naa, bi saghe é bôt bevoo bisulan bia ? Nge ô ne ésaa, voleghe é boan buè naa, be kômane biyalan bia yiène ya mimbu mieba (Mat. 21:16). Biyong bizing ayeghle été, be wula tsiè adzô é larane mintiè mia boban ézizang n’nôm ba ngal, nge ki é mam ma daghe abo dulu, ve, é ne kuiñ naa, abong daa nge ki bibèñ bi ne bele é mam mong a ne yalan. Ya fe naa, voleghan é boan benan a wokh amu dzé baa ye ki be ve nkobe éyong sese ba ye bere wo. A lere be dzam té da ye ve naa, be taa tobe biwuiñ éyong ba ye top bôt befe naa, be ve biyalan—1 Tim. 6:18d.
18. Aval avé bi ne bo kaa tele bia bebièn ôsu, éyong bia ve biyalan ? (Minkana 27:2)
18 Kada môt y’ébe bia, a ne kôman é mbemba éyalan da lughu Jehôva ye saghe bekristen bevoo (Mink. 25:11). Afang bo naa, biyong bizing bi ne ve moan éyalan a tsinan éning daa, biaa yiène ki bira kobe aval da ye ve naa, bi tele bia bibièn ôsu (A lang Minkana 27:2 ; 2 Becor. 10:18). Ndaane de, bia kômô ve mengu’u naa, bi bembe fave ébe Jehôva, éfiè dèñ, ye ayong dèñ (Mel. 4:11). Bebela a ne naa, nge nsili wa saghe bia naa, bi kobe é dzam da tsinane bia bebièn, bia yiène de bo. Éfônan y’é dzam da tsinane dzam té, bia ye de yen abong da zu di.
19. (a) Za dzam da ye lôt nge bi lere é bôt bevoo ngang ? (Beromain 1:11, 12) (b) Dzé wa dang dzing nfa ya ve biyalan bisulan ?
19 Afang bo naa, bii bele ki metsing ma lere aval bia yiène ve biyalan, ve bia besese bi ne ve mengu’u naa, biyalan bia ve, bi saghe é bôt bevoo. Dzam té é ne yili naa, bia bira yalan nge ki bia tobe ya mesan ya ayôm biyong bi bele naa bia yalan, ya fe a tobe ya mesan akal é bôt ba ve biyalan. Éyong bia bembe ébe mbeng é bôt bevoo ékoan été, bia besese bi ne « vaane ngu’u »—A lang Beromain 1:11, 12.
ZA 93 Boran bisulan bia
a Bia ve é bôt bevoo ngu’u, éyong bia ve biyalan bisulan bi y’ékoan. Ve, bôt bézing be ne ko wong naa, be ve biyalan. Éba bevoo, ba dzing ba ve biyalan bisulan, ve, béé se ki be ve nkobe éyong ésese. Ébe bitéñ bité bise, aval avé bi ne lere naa, bia bis é bôt bevoo ye ve be ngu’u ? Aval avé, biyalane bia, bi ne ve naa, bobedzang ya bekal bèè be dzinghane ye tsini naa, ba bo é mam me ne mbeng ?Ayeghle di, da zu bia de lere.
b Nge wa kômô bele mefakh mefe, keng daghe La Atalaya de enero 2019, pág. 8-13 ; ya éñi ye 1 de septiembre de 2003, pág. 19-22 nge ki La Tour de Garde janvier 2019 p. 8-13 ; ya éñi ye 1er septembre 2003 p. 19-22.
c Be nga tsen biyôla bizing.
d Daghan éngengene Prepara bien tu comentario, nge ki Prepare ta réponse a nden wèè jw.org.
e Daghe a La Atalaya, 15 de julio 2013, pág. 32, ya fe éñi ya 1 de septiembre 2003, pág. 21-22 nge ki La Tour de Garde, 15 juillet 2013 p. 32 ya éñi 1 septembre 2003 p. 21-22.
f AYILGHA YE É FÔRÔ A NE: É môra ékoan été, é moadzang wèè a va ve éyalan, a likh naa, é bôt bevoo baa fe, be bele éyong ya ve biyalan ésulan.