Aval bi ne tsini naa bia veme éñeghe dèè bevoo ya éba bevoo

1-2. (a) Amu dzé ntôl Paul a mbe dzô naa éñeghe é ne é fulu « da dang » éban ? (b) Za minsili bia ye fas ayeghle di été ?

ÉYONG Paul a nga kobe adzô mebun, ôyane, y’édzing, a nga mane adzô dèñ éé dzô naa « édi da dang éban ébe [mefulu] mesese meté, é ne édzing » (1 Becor. 13:13). Amu dzé Paul a mbe de dzô ? Amu naa, melu ma zu, biaa ye ki fe bera yi naa bi bele mebun ébe mengiagh Nzame nfa melu ma zu nge ki a bele ôyane naa mengiagh meté ma ye dzalban, amu tam té da ye kuène naa mesese meté me manang dzalban. Ve, da ye bo éban naa, bi k’ôsu y’a ñeghe Jehôva y’é bôt bevoo. Akal dzam té, édzing dèè akal deba da ye tsini naa da vem mbèmbèè.

² Akal da ye bo éban naa bi k’ôsu y’a ñeghane bevoo y’éba bevoo, éde bia zu yalane minsili milal. Ôsusua, amu dzé bia yiène ñeghane bevoo y’éba bevoo ? Éwi bèè, aval avé bi ne leran édzing bevoo y’éba bevoo ? Éwi lal, aval avé bi ne tsini naa bia veme édzing dèè bevoo y’éba bevoo ?

AMU DZÉ BIA YIÈNE ÑEGHANE BEVOO Y’ÉBA BEVOO ?

3. Mekalgha mevé bi bele naa bi ñeghane bevoo y’éba bevoo ?

³ Amu dzé é ne éban naa bi ñeghane bevoo y’éba bevoo ? Éyong bia lere éñeghe dèè akal bobedzang, bia lere naa bi ne beña bekristen. Yésu a nga dzô beyeghe bèñ naa : « Ye dzam té, bôt besese ba ye yem naa mi ne beyeghe bam, nge mi bele éñeghe bevoo akal éba bevoo » (Jean 13:35). Ye fe naa, a bele éñeghe bevoo y’éba bevoo, da baghle bia élat été. Paul a nga luè éñeghe naa « é dzôm da ve ña élat » (Becol. 3:14). Ve, akalgha éfe da dang éban, y’amu dzé bia yiène tsini naa bia ñeghane bevoo y’éba bevoo é ne. Ntôl Jean a nga tsili bekristen bevoo naa : « É môt a ñeghe Nzame a yiène fe ñeghe moanñang » (1 Jean 4:21). Éyong bia leran éñeghe bevoo y’éba bevoo, bia lere éñeghe dèè akal Nzame.

4-5. Lereghan éfônane da lere aval éñeghe dèè akal Nzame é ne élat ye éñeghe bi bele akal bevoo y’éba bevoo.

⁴ Aval avé éñeghe bi bele akal Nzame é ne élat ye éñeghe bia lere bobedzang ye bekal bèè ? Naa bi ve éfônan, n’yeneghan élat é ne ézizang n’nem ye minfa mi ñuu mivoo. Éyong dokira a bere anu dèñ é wo wèè ayô naa yem nge n’nem wèè ô ne ngu’u nge ki atakh, a ne yem mam mézing ma lere nge n’nem wèè ô ne mvoa nge ki naa wa koan. Za ayeghle bi ne ñong y’éfônan té ?

⁵ Aval dokira a ne yem nge n’nem wèè ô ne mvoa nge ki naa wa koan éyong a bèè aval wa kut, bi ne yem nté mbé éñeghe dèè akal Nzame é ne ngu’u, éyong bia fas aval bia ñeghe é bôt bevoo. Nge bi yen naa éñeghe dèè akal bekristen bevoo é bohang naa da takh, dzam té é ne lere naa éñeghe dèè akal Nzame daa fe é bohang naa da takh. Ve, éyong bi ne mban a lere bobedzang ye bekal bèè éñeghe, a ne é ndem da lere naa, éñeghe dèè akal Nzame é ne ngu’u.

6. Amu dzé bia yiène yep a n’nem nge bia yen naa éñeghe bi bele akal bobedzang ye bekal bèè é nga taghang ? (1 Jean 4:7-9, 11)

⁶ Bia yiène yep a n’nem nge bia yen naa éñeghe bi bele akal bobedzang ye bekal bèè é nga bohang naa da takh. Amu dzé ? Amu dzam té da lere naa élat dèè ye Jehôva é sumang naa da takh. Ntôl Jean a ve naa bi tugha wokh dzam té, éyong a simane biè naa : « É môt aa ñeghe ki é moanñang a yen, éé se ki ñeghe é Nzame aa yen ki » (1 Jean 4:20). Za ayeghle bia ñong ? Jehôva a ne biè yen n’nem mbeng fave nge bia « ñeghane bevoo y’éba bevoo »—A lang 1 Jean 4:7-9, 11.

AVAL AVÉ BI NE LERAN ÉDZING BEVOO Y’ÉBA BEVOO ?

7-8. Meval mevé bi ne lere édzing dèè akal bevoo y’éba bevoo ?

⁷ Ébe abuiñ biyong Nkobe Nzame été, bia yen atsing da dzô naa « bi dzinghane bevoo y’éba bevoo » (Jean 15:12, 17 ; Bero. 13:8 ; 1 Beth. 4:9 ; 1 Pierre 1:22 ; 1 Jean 4:11). Ve, édzing é ne é dzam bia wôran a n’nem été, môt ézing éé se ki yen. Éde, aval avé bi ne ve naa édzing bi bele akal bevoo y’éba bevoo é yene ? Bi ne de bo ye bifiè biè ye mimboane miè.

⁸ Bi bele abuiñ meval bi ne lere bobedzang ye bekal bèè naa bia dzing be. Bifônane bizing bi y’été éé bi : « Kobghan bebela bevoo y’éba bevoo » (Zach. 8:16). « Tsinighane naa mia baghle mvoa ézizang bevoo y’éba bevoo » (Marc 9:50). Tebeghan ôsu « nfa y’a lerane ngang bevoo y’éba bevoo » (Bero. 12:10). « Yemghane ñong bevoo y’éba bevoo » (Bero. 15:7). « Tsinighane naa [. . .] mia dzamane bevoo y’éba bevoo » (Becol. 3:13). « Tsinighane naa mia baghe mimbeghe bevoo y’éba bevoo » (Begal. 6:2). « Tsinighane naa mia fôlane bevoo y’éba bevoo » (1 Beth. 4:18). « Tsinighane naa [. . .] mia longhane bevoo y’éba bevoo » (1 Beth. 5:11). « Yaghlan bevoo akal éba bevoo »—Jacq. 5:16.

9. Amu dzé a fôlô é bôt bevoo é ne aval é ne éban bi ne be lere naa bia dzing be ? (A daghe fe évaghle).

⁹ N’yeneghan aval évoo ye meval bi ne lere édzing dèè ane bi va yen de mebong bi ndaghe mane ma. Bia ye fas é dzam Paul a nga dzô di : « Tsinighane naa mia fôlane bevoo y’éba bevoo. » Amu dzé a fôlô é bôt bevoo é ne aval é ne éban bi ne be lere édzing ? Aval abakh da kobe adzô é mam ma tsinane Bible da dzô de, éfiè Paul a belane de akal « a fôlô » da yili « a tebe môt a nfeng naa ô saghe ñe éyong a tubane bura minzukh. » Aval té, éyong bia fôlô ñe, bia vole é kristen a tele minzukh été, naa a bera tebe ye k’ôsu y’a sèhane Jehôva ye sôsôe. Éyong ésese bia fôlô moadzang nge ki kal dzèè, bia lere naa bia dzing ñe—2 Becor. 7:6, 7, 13.

10. Za élat é ne ézizang a wôran mintéñ é môt mboo ye a fôlô ñe ?

¹⁰ Élat é ne ézizang a wôrane mintéñ é bôt bevoo ye fôlô be. Aval avé ? É môt a wôrane mintéñ é bôt bevoo, a fôlô be ye dzeng naa a sule minzukh mieba. Éde, ôsusua bia tare wôrane mintéñ é bôt bevoo ; éyong té bia fôlô be. Yeneghe aval Paul a lere élat é ne ézizang é fulu y’a wokh mintèñ é bôt bevoo Jehôva ye afôlô A ve be. Paul a kobe adzô Jehôva ane « Ésaa n’nem éngôngoo ye é Nzame a fôlô min’nem misese » (2 Becor. 1:3). Ane bia yeghe de atoan akal ayeghle y’éfus té, Paul a belane éfiè « n’nem éngôngoo » naa a kobe adzô a wôrane mintèñ é bôt bevoo. Éde « ba luè Nzame naa Ésaa nge ki Tsîn ye n’nem éngôngoo, amu fulu y’a wôrane mintèñ é bôt bevoo da so ébe ñe. » Éde, mintèñ a wôrane vèè, mia tsini ñe naa a fôlô « bia ébe minzukh misese bia tubane mio » (2 Becor. 1:4). Aval ane mendzim me ne nfuban y’avuèñ ma kuiñ ôtông ma sule é môt a wokh évéé, aval té éde Jehôva a sule ye fôlô é bôt ba dzukh. Aval avé bi ne vu Jehôva nfa y’a wokh mintèñ é bôt bevoo ye fôlô be ? Aval évoo bi ne de bo é ne, a bele mefulu me ne bia vole a wôrane mintèñ é bôt bevoo ye fôlô be. Mefulu mézing me y’été me ne mevé ?

11. Aval ane bia lang de minten Becolossien 3:12 ye 1 Pierre 3:8, za mefulu mefe bia yiène bele, me ne bia vole a baghle édzing da ye bia tsini naa bi fôlô é bôt bevoo ?

¹¹ Za dzam da ye bia vole a baghle édzing bia yi nfa y’a « tsini naa bia fôlane bevoo y’éba bevoo » môs mesese ? Bia yiène dzeng naa bi bele mbemba mefulu ane, a ngomane y’é bôt bevoo, éñeghe bobeñang, ye mbemba fulu (A lang Becolossien 3:12 ; 1 Pierre 3:8). Aval avé mefulu meté ma ye bia vole ? Éyong bia wôrane mintèñ bobedzang ye bekal bèè, ye bira yep a n’nem akal deba, bia ye bele nkôman ô ne ngu’u naa bia fôlô be éyong ba tubane minzukh. Aval ane Yésu a nga lere de, « é mam me ne môt n’dzalane a n’nem été, éme ma ye ñe kuiñ añu. Mbemba môt a kule é mbemba be-mam ma so ñe a n’nem été » (Mat. 12:34, 35). A fôlô bobedzang ye bekal bèè é ne aval é ne édedèè éban bi ne be lere édzing dèè.

AVAL AVÉ BI NE TSINI NAA BIA VEME ÉDZING DÈÈ BEVOO Y’ÉBA BEVOO ?

12. (a) Amu dzé bia yiène k’ôsu y’a bo nkee naa bi taa dzimle édzing bevoo y’éba bevoo ? (b) Za nsili bia zu yalane wô abong di ?

¹² Bia besese bia kômô « tsini naa bia dzinghane bevoo y’éba bevoo » (1 Jean 4:7). Ve, é ne éban akal dèè, naa bi simane mbam Yésu naa, « édzing abuiñ bôt [da ye] sibi » (Mat. 24:12). Yésu éé dzi ki dzô naa abuiñ ye beyeghe bèñ ba ye bo kaa fe lere édzing. Ve daa, bia yiène bo nkee naa bi taa dzimle édzing dèè ane bôt be y’émo di. Ye dzam té ôsiman, n’fasghan é môra nsili wi : Dzé da ye bia vole naa bi yen nge édzing dèè akal bobedzang é ne ngu’u ?

13. Dzé da ye bia vole a yem nge édzing dèè akal bobedzang é ne ngu’u ?

¹³ Aval évoo bi ne yem nge édzing dèè é ne ngu’u, é ne a fas aval bia ñong mam éyong bi tele bitéñ bizing bi y’éning (2 Becor. 8:8). Ntôl Pedro nge ki Pierre a tu étéñ daa y’été, a dzô naa : « A lôr mam mesese beleghan édzing é ne ngu’u bevoo y’éba bevoo, amu édzing da buru abuiñ minsem » (1 Pierre 4:8). Éde, aval bia ñong mam éyong bobedzang ba bo bikop nge ki naa ba bo é mam ma dzughe bia, da ye bia vole a yem nge édzing daa akal deba é ne ngu’u.

14. Aval ane bia lang de nten 1 Pierre 4:8, z’aval édzing bia yiène bele ? Vakh éfônan.

¹⁴ N’tughane daghe bifiè Pedro nge ki Pierre a belane bio. Éfaalé ôsua ye éfus 8 da tugha lere aval édzing bia yiène bele ; « édzing é ne ngu’u. » Éfiè Pierre a belane de akal « ngu’u » da yili naa, « a ndineban. » Éfaalé bèè ye éfus, da lere é dzam édzing é ne ngu’u é ne bo. Da buru minsem bobedzang. Bi ne de vaghle aval di : Bia biñ édzing dèè ye mo mebèñ ane abong étôp da ndineban, éyong té bia ndini de ya ke kuiñ da buru se ki nsem mboo nge ki mimbèñ, ve « abuiñ minsem. » A « buru » é ne aval éfe bi ne dzô naa, a dzame. Aval ane abong étôp é ne dzip atoan mvin, édzing da ye bia vole a buru nge ki a dzame bikop nge ki bivus bobedzang.

15. Nge édzing dèè akal bobedzang ye bekal bèè é ne édedèè ngu’u, za dzam bi ne bo ? (Becolossien 3:13)

¹⁵ Édzing bi bele akal é bôt bevoo da yiène bo aval ngu’u da ve naa, bi dzame bikop bieba ; amben biyong bizing, dzam té é nge ndzukh (A lang Becolossien 3:13). Éyong bia dzame é bôt bevoo, bia lere naa édzing dèè é ne ngu’u ye naa bia kômô ve Jehôva n’nem mbeng. Za dzam afe é ne bia vole a dzame é boan bikop é bôt bevoo ba bo, kaa ki dzigha wokh ôlun akal é boan be-mam ba bo bia ?

16-17. Dzé da ye bia vole a biane é boan mefulu me ne abé ébe é bôt bevoo ? Vakh éfônan (A daghe fe évaghle).

¹⁶ Bembeye ébe mefulu me ne mbeng ébe bobeñong ye bekal buè se ki ébe mefulu me ne be abé. Fasghan éfônane di. Tame simane naa wa kôane ye bobeñong ye bekal buè. Mia lôt mbemba tam, ye naa amangha môs té, mia ñong fôrô mia bese mi too nsama. Ve, wa bera ñong befôrô bebèñ nga sia kuiñ naa éñi ôsua a ne abé. Abong di, ô mbele befôrô belal. Ve, wa yen naa ébe fôrô mboo y’été, moadzang mboo a bele ôtat asu. Za dzam wa bo ye fôrô té ? Wa tsam ñe, amu ô bele befôrô bebèñ befe, é vôm môr asese a ne, ye naa moadzang té a wèñ.

¹⁷ Bi ne vaghane befôrô bi va baghle alé ye mesimane bia baghle. Bi wula baghle mbemba mesimane ye metam bi va lôt ya bobedzang ye bekal bèè. Ve, nga kuiñ naa, tam évoo y’été, moadzang nge ki kal dzèè a dzô nge ki a bo é dzam é ne abé. Za dzam bia yiène bo ye mbimbia ôsimane té ? Ye waa yiène dzeng naa ô tsam nge ki a vuène de, aval ane ô va bo de ye é fôrô a va kuiñ abé ? (Mink. 19:11 ; Beéph. 4:32) Bi ne tsam ôsimane wèè été, é moan ékop moadzang a va bo, amu bia yem naa bi bele abuiñ mbemba mesimane mefe me ye metam bi va lôt ye moadzang té. Aval mesimane meté éme bia kômô baghlé ye dzing.

AMU DZÉ ÉDZING DA DANG ÉBAN ÉMU

18. Za mam me tele ôsu nfa édzing bi va yen ayeghle di été ?

¹⁸ Amu dzé bia kômô tsini naa bia bele éñeghe é ne ngu’u bevoo y’éba bevoo ? Ane bi va yen de, éyong bia lere bobedzang ya bekal bèè éñeghe, bia lere naa bia ñeghe Jehôva. Aval avé bi ne lere éñeghe dèè akal bekristen bevoo ? Aval évoo bi ne de bo, a ne a fôlô be. Nge bia wokh mintèñ é bôt bevoo, bia ye « tsini naa bia fôlane bevoo y’éba bevoo. » Aval avé bi ne tsini naa bia wône édzing dèè bevoo y’éba bevoo ? A ne éyong bia ve mengu’u mesese mèè naa bia dzame bikop é bôt bevoo.

19. Amu dzé da dang éban naa bi leran édzing bevoo y’éba bevoo ému ?

¹⁹ Amu dzé da dang éban naa bi leran édzing bevoo y’éba bevoo ému ? Baghlan akalgha Pedro nge ki Pierre a ve di : « Amangha ye mam mesese é ntoo bebéñ. Akal dzam té, [. . .] beleghan édzing é ne ngu’u bevoo y’éba bevoo » (1 Pierre 4:7, 8). Nté amangha y’émo di da yir bebéñ, za dzam bia ye tubane de ? Éé simane beyeghe bèñ, Yésu a nga ve nkulan adzô wi : « Meyong mesese ma ye mina vini étom éyôla dam » (Mat. 24:9). Naa bi zôme zing té, bia yiène k’ôsu y’a tobe élat. Éyong bia bo de, Satan aa ye ki wun nfa mengu’u a ve naa a kane bia, amu bi ne élat bevoo y’éba bevoo y’éñeghe ; é « dzôm da ve ña élat »—Becol. 3:14 ; Beph. 2:1, 2.