Éyong é ne wô ndzukh naa ô vebane nféféñ ékôan

Nicolas ye Céline be nga tubane aval ndzukh ôfe. Be nga yebe naa ba ke nféféñ ékoan aval ntem ékôan ye Fala é nga sili be de. Ba dzô naa : « Niène mevakh bi nga wôrane éyong bi nga siène me nga man, éde bi nga sum wôran éwiñ, amu bi nga kômô yen mengom maa ye n’nôm ékôan daa. A ke kuane naa, biaa be ki biñ élat é ne ngu’u ye bobedzang be ye nféféñ ékôan bi mbea. » Éyong bia yen mindzukh mité mise, dzé é ne wô vole naa ô bo mesan ye yeme veban nféféñ ékôan ? Za dzam é bôr bevoo be ne bo naa be vole ? Biborane bivé ô ne bele nfa ya nsisim, ye naa, aval avé wa fe ô ne saghe é bôr bevoo nféféñ ékôan duè été ?

METSIN METSING MENII ME NE WÔ VOLE A VEBAN YE DANG MINDZUKH MITÉ

1. Yagbe ébe Jehôva (Bya 37:5). Kazumi ye Japon, a nga kôre ékôan a nga tobe mimbu 20 éyong be nga lôm n’nôm kisôan éfe akal ésèñ. Aval avé a nga « buii é zen dèñ émo Jehôva été » ? A dzô naa : « Me nga dzia bo mé wuè Jehôva n’nem wom, akal me mbe mé wôrane naa me ne étam, a ko wong ye bele meyep a n’nem. Éyong ése me nga yaghlane ñe, Jehôva a nga ve ma é ngu’u me nga yi. »

Aval avé ô ne tugha yem a yegbe ébe Jehôva ? Aval biloa bia yi mendzim ye bidzi naa bi vem, éde fe, nge bia kômô naa mbunane waa ô vem, bia yiène wô ve mendzim ye bidzi nfa ya nsisim. Nicolas, éñi bi va tare tu, a nga yen naa, a binan bifônan Abraham, Yésu, ye Pablo nge ki Paul, é nga wône mebun mèñ ébe avole Jehôva, amu be nga likh é mbemba bitobgha bieba naa be ke dzale nkômane Nzame. Nge ô ne mban a yeghe Biblia, da ye wô vole a dang aval ntsenane ôsese ô ne boban éning duè, wa ye fe yeghe é mam ô ne belane me naa ô saghe bôr be ye nféféñ ékôan duè.

2. Ô taa dzeng naa ô vaghane mam (Eccl. 7:10). Éyong Jules a nga kôre a Benin naa a ke tobe Estados Unidos nge ki États-Unis, a nga yiène dzeng naa, a veban ye nféféñ mboane mam ôfe. Jules a simane naa : « Me mbe mé wôran ane ma yiène kanghle é môr ase ma tôbane ñe, éning dam. » Éde a nga sum naa a tebe bobeñang ye bekal bèñ be ye nféféñ ékôan dèñ ôyap, amu naa mboane mam wôba ô mbe wé selan ye é wèñ. Ve daa, éyong a nga dzeng naa a tugha be yem, éde ôsiman a mbe a bele akal bobeñang ye bekal bèñ ô nga tsen. A dzô naa : « É vôm ôsese bi ne bo a si va, boan bebôr bese be ne aval daa. Niène ve nkobe ye mboane mam, éme ma selan. É ne édedèè éban naa, bi yebe bôr aval be ne. » Ya dzam té, ô taa ndzeng naa, ô vaghane nféféñ ékôan ô ne, ye édi ô mbe. É ne ane kal dzaa ézing é ne mpwaghe-mefan a too éyôla naa, Anne-Lise a dzô : « Méé dzi ki so nféféñ vôm naa me zu kuane é mam me nga likh ô mvus, ve daa, nge me nga so, a ne amu me nga kômô yem minféféñ mimam. »

Bemvene ba fe, baa yiène ki dzeng naa, be vaghane mboane mam ye ékôan be mbe ye éwi ye nféféñ ékôan deba. A bo mam aval afe, daa yili ki éyong ése naa me ne mboane abé. É ne fakh naa ô tare dzeng naa ô yem aval ba bo mam nféféñ vôm, ndaane a sum naa, wa ve melepgha (Eccl. 3:1, 7b). A yeghle bobeñong ye é mbemba éfônane duè, éde da dang mbeng, a lôr a dzeng naa wa yemle bôr naa be siman ane wa (2 Becor. 1:24).

3. Dzenghe naa ô bo abuiñ mam ye é bôr bevoo (Beph. 1:27). Amben é va sili wa abuiñ tam, ye ngu’u naa ô zu tobe nféféñ vôm, wa yiène dzeng naa, ô dzigha ke bisulan a Nda ékôan nge é ne boban, nféféñ ékôan duè. Dzam té é ne éban, amu naa, nge bôr be ye nféféñ ékôan duè baa vaghle ki wô yen môs ézing, nge ki naa, ba yen wa fave ayôm biyong, be ne bo yè naa be vole wa ? Lucinda é kal dzaa a nga ke tobe é mura kisôan ye Sudáfrica nge ki Afrique du Sud, ye bengoan bèñ bebèñ, a simane naa : « Mengom mam me nga lep me naa me bembe naa ma yir bôr be ye nféféñ ékôan dam bébéñ, mé kuiñ ye be minkanghle ye yalane bisulan. Éde, bi nga ve fe naa, be ne bo bé bo bisulan akal minkanghle é nda dzaa. »

« A sèñ ngu’u bevoo ye éba bevoo » nfa é mam ma daghe ékôan, da ye wône mebun maa, ye fe éma bobedzang. Anne-Lise, éñi bi va tare tu, a dzô naa, bemvene be nga saghe ñe naa a kuiñ minkanghle ya môr ase. Éde é nga sughlane ya ? A dzô naa : « Me nga yen mamién ane môr mboo ye ékôan. » Éyong wa vole baghle ye ve Nda ékôan nfuban, wa lere naa, ô nga ñong-hang ékôan té ane é duè. Nge bobeñong ye bekal buè be dzigha vebane ye wa, wa ye be sum ñong ane bôr be ye é nda bôr duè.

4. Dzenghe naa ô bele minféféñ mengom (2 Becor. 6:11-13). Éyong wa lere é bôr bevoo naa wa bis be, da ye wa bo ébubu a lar mengom ya be, ya dzam té, boghe wé siène avôô bisulan, ye ñong tam ya tugha yem bobeñong ye bekal éyong bisulan bia man. A ve mengu’u naa ô yem ye baghle biyôla bieba. A simane biyôla bieba, a bo ayông, ye bo aval môr é ne ébubu naa be kobe ya ñe, da ve naa bôr be yir wô bébéñ, ye vole naa ô bele mbemba minféféñ mengom.

Ndaane naa ô ko wong naa ô bo kaa bo ane é bôr bevoo, lighe naa bobeñong ye bekal buè be ye nféféñ ékôan ô ntoo, be yem aval môr ô ne. Vughe éfônane Lucinda. A dzô naa : « Nge bi bele mbemba mengom éndagha, a ne amu naa, bi bele fulu ya tare bo bi bane é bôr bevoo é nda dzaa. »

« VEHANE BEVOO YE ÉBA BEVOO MBEMBA NSOHAN »

A ñii a Nda ékôan kaa naa wa yem asu ézing été, é ne ve bôr bézing meyep a n’nem. Nfa té, za dzam ô ne bo naa ô vole é môr a ndaghe so ékôan denan ? Ntôl Pablo nge ki Paul a saghe bia naa : « Vehane bevoo ye éba bevoo mbemba nsohan aval Cristo nge ki Christ ñ’a fe, a nga ve mia mbemba nsohan » (Bero. 15:7). Éyong bemvene ba vu éfônane Cristo, ba vole é bôr be ndaghe so ékôan été, a wôrane naa, be ne mbemba nsohan. (A dagha nkaalé « É dzam da ye vole a kôman ékena duè akal nféféñ ékôan. ») Ve daa, ékôan ngura, amben bong, be ne bele ngap nfa ya bele minféféñ mengom.

A ve é bôr bevoo mbemba nsohan, da yili fe naa, bi lere be añep ye ve be avole ba yi. Éfônan, kal dzaa ézing, a nga ñong é tam dzèñ naa, a ke a lere éñi mboo a ndaghe so ékôan deba, kisoan, ye fe aval a ne ñong metua ye train, éyong a kômô ke vôm ézing. Dzam té, é nga name kal dzaa té, ye vole ñe naa, a yem veban.

É VÔM Ô NE DZIGHA VEM A NSISIM

Éyong étanda da vem, a dziè bo é dzimle ékôp dèñ, ya ke kuiñ a bele mefap ma vole ñe a yele. Aval daa fe, éyong bia siane nféféñ ékôan, é ne éban naa bi vèè, ôyôm dzam ôse ô ne ve naa bi taa yele ya mefap maa, ésèñ bia bo Jehôva. Nicolas ye Céline ba dzô naa : « A ke tobe nféféñ vôm, da ve mbemba ayeghle. Éyong bia yiène vebane ya minféféñ mi bôr, ye nféféñ mboane mam, da tsini bia naa, bi yeghe a bele mbemba mefulu mefe. » Jean-Charles, éñi bi va tu ôyô, a kanghle bia aval é nda-bôr dzèñ é nga buane de : « A ke nféféñ ékôan, é nga vole é boan baa naa, be vem a nsisim, ye yir Jehôva bébéñ. Fave, ayôm mengoan ôsu niène bi nga siène, éde ngoan dzaa a nga sum bele meyem ésulan ye ézizang sono, ye fe naa, ndôma dzaa ki, é nga bo nkare-fuèñ. »

Za dzam ô ne bo nge étéñ duè, daa ve ki wô naa ô ke ékôan da yi avole ? Ô ne fe dzeng naa, ô wôran ane ô ne ékôan éfe, éyong wa dzale mefakh mézing be va ve nlô adzô wi été. Nté té, yagbe ébe Jehôva, vakh é ngu’u duè ése bisèñ bia boban ékôan été, ane, a dzeng naa wa ke minkanghle ye é bôr bevoo, a dzeng naa ô bele minféféñ mengom, ye yemle élat é ne ézizang min’nôm mengom muè ye wa. Ô ne fe dzeng meval ô ne vole é moadzang nge ki kal dzaa ézing é ndaghe so, nge ki éñi a kômô vole ékôan duè été. Amu naa édzing éde é ne é fulu ba yeme de beña bekristen, éde éyong wa lere de, dzam té é ne vole naa ô tugha bera yir Jehôva bébéñ (Jean 13:35). Ô ne tobe ndzi-n’nem naa, « aval metungha meté, ma ve Nzame n’nem mbeng » (Behéb. 13:16).

Amben a ke ékôan éfe é ne so abuiñ mindzukh, ve, abuiñ bekristen be va yem veban ye tobe mevakh nféféñ ékôan deba. Wa fe, ô ne de bo ! Anne-Lise a dzô naa : « A tsen ékôan da ye ve naa, Jehôva a vole wa aval waa be ki de tare yen. » Kazumi, ñ’a fe, a yem éndagha naa, « éyong wa tsen ékôan, ô ne yen avole Jehôva meval waa be ki de tare yen môs ézing. » Za dzam ki Jules ñ’a dzô nfa té ? A dzô naa : « Mengom me nga bo, me nga vole me naa, me taa veghle bera wôrane naa me mbe n’neng. Éndagha, ma wôrane naa, me ntoo môr mboo ye ékôan té, ye fe naa, nge ma sia kôre ékôan té ému, da ye me ve n’nem mintèñ. »