É dzam éyôla Jehôva da yili akal Yésu

1-2. (a) Za dzam Yésu a nga bo alu é mbe kaa naa be wiñ ñe ? (b) Za minsili bia ye yalane mio ayeghle di été ?

BI NE é môs nii ye sono, é too alu 14 ye ngoan Nisan, mbu 33 ye melu maa. Yésu a lôr Ésesang ndziane Nti ya besôsôe mintôô mièñ. A yem naa, é ligheyang avitsang tam naa Judas a kong ñe. A yem fe naa, minzizing mièñ mia zu ñe tsible ye naa, ôsu vaa, ba ye ñe wiñ. Ya dzam té, niène be nga mane dzi, éde a nga saghe mintôô mièñ ngalan abuiñ mam a nga dzô be. Ye naa, ôyôm tam kaa naa besese be ke, éde Yésu a nga bo meyaghlane me mbe édedaa éban. Ntôô Juan a nga tsili me ; bia kuane me nten Jean abong 17.

² Ayeghle di été, bia ye yen é mam mézing meyaghlane Yésu meté me ne bia yeghle. Za dzam é nga kele ñe n’nem ôyôp avitsang tam kaa naa a wu ? Aval avé meyaghlane meté ma lere é dzam é mbe éban akal dèñ é tam ésese ésèñ minkanghle dèñ é nga bem a si va ? Ntamane yen biyalane ye minsili mité.

« ME VA BO NAA BE YEM ÉYÔLA DUÈ »

3. Za dzam Yésu a nga dzô nfa éyôla Jehôva, ye naa za dzam a nga kômô dzô ? (Jean 17:6, 26).

³ Meyaghlane mèñ été, Yésu a nga dzô naa : « Me va bo naa, be yem éyôla duè ». Meyaghlane meté été, a baalé biyong bibèñ naa a nga bo naa beyeghe bèñ be yem éyôla Jehôva (a lang Jean 17:6, 26). Za dzam a nga kômô dzô ? Ye a nga kare be éyôla be mbe kaa yem ? Beyeghe Yésu be mbe boan Bejudíos. Dzam té da yili naa, a ke kuane naa be nga yemhang naa, Nzame a mbe éyôla naa Jehôva. Bia kuan éyôla té a lôr biyong 7 000 Mintsili Behebreos été. Éde, Yésu aa mbe ki é kobe éyôla Nzame ébién, ve, a mbe é kobe é dzam é mbe éyôla té ayat. Yésu a nga vole beyeghe bèñ naa be tugha yem Jehôva. Da yili naa, dzé é ne é ngiagh Jehôva a bele akal si ye boan be-bôr, za dzam a bohang, za dzam a ye bo, ye mefulu a bele. Niène ve Yésu étam éñe a tugha yem Jehôva.

4-5. (a) Za éfônane bi ne belane de naa bi wokh é dzam a yem éyôla môr da yili ? (b) Minfa mivé beyeghe Yésu be nga yem éyôla Jehôva ?

⁴ Éfônan, tame simane naa mvene mboo ye ékôan duè a ne éyôla naa David, a ne fe é dokira a sale bôt. É ntoo abuiñ mimbu ave wa yem moadzang té. Ve, môs ézing wa sia ku nkôkoan ônen. Éde, ba ke ya wa é nda-biang moadzang té a bo ésèñ. Éyong té a belane n’yemane wèñ naa a sèñ wa. Ye éyôla moadzang té é nga yiliyang bura dzam akal duè éndagha ? Ôwé ! David éé se ki fe é mvene wa so wa yem ; a ntoo fe é dokira a nga sale wa, éñi a nga sèñ wa.

⁵ Aval daa té fe, a kuane naa beyeghe Yésu be nga yemhang éyôla Jehôva. Ve, amu ésèñ minkanghle Yésu, éde éyôla té é nga bele mura ayilgha akal deba. Amu dzé bi ne de dzô ? Amu naa, Yésu a mbe é lere mefulu Ésaa wèñ ébe é mam mesese a nga dzô ye bo. Aval té éde mintôô mièñ mi nga tugha « yem » Jehôva, bé bèè aval Yésu a mbe é yeghle, ye daghe aval a mbe é ñong bôt (Jean 14:9 ; 17:3).

« ÉYÔLA DUÈ ÉBIÉN, ÉDI Ô NGA KEE MA »

6. Nfa ôvé Jehôva a nga kee Yésu éyôla dèñ ? (Jean 17:11, 12).

⁶ Meyaghlane mèñ été, Yésu a nga yaghlan akal beyeghe bèñ é dzô naa : « Kaleghe bo amu éyôla duè ébién, édi ô nga kee ma » (a lang Jean 17:11, 12). Ye dzam té é mbe dé yili naa, a sum ye tam té, be nga ye luè Yésu naa Jehôva ? Momo. Tame daghe naa meyaghlane mèñ été, é tu éyôla Jehôva, Yésu a nga dzô naa é ne « éyôla duè ébién ». Da yili naa, éyôla Jehôva déé dzi ki sughlane bo éyôla Yésu. Za dzam Yésu a mbe é kômô faa dzô éyong a nga dzô naa be nga kee ñe éyôla Nzame ? Ôsusua, a mbe nlômane Nzame é kobe fe évang dèñ. A nga so a si va ya éyôla Ésaa wèñ, éde fe a nga bo bura mekengha ya éyôla té (Jean 5:43 ; 10:25). Dzam afe é ne naa, éyôla Yésu da yili naa « Jehôva a ne akôrgha ». Éde, ayilgha ye éyôla Yésu é bele éyôla Jehôva été.

7. Amu dzé Yésu a mbe kobe akal Jehôva ? Vakh éfônan.

⁷ Éfônan, embajador nge ki ambassadeur a ne kobe akal ndjié amu naa éñe ndjié a va lôm. Éde, é dzam embajador a dzô é bele ngu’u ane ndjié émién éñe a va dzô de. Aval daa fe, Jehôva éñe a nga lôm Yésu, éde ñe a nga kobe bôr akal Jehôva (Mat. 21:9 ; Luc 13:35).

8. Amu dzé Jehôva a nga dzô naa éyôla dèñ é mbe « ébe » Yésu amben kaa naa Yésu a so a si va ? (Akôre 23:20, 21).

⁸ Biblia a luè Yésu naa « Éfiè » amu naa, Jehôva a nga belane ñe naa, a kare bangele ye fe boan be-bôr é mam a mbe é kômô naa be bo (Jean 1:1-3). Éyong ézing, Yésu éñe a mbe é angele Jehôva a nga belane ñe naa, a kale Bisraelitas éyong be mbe éyang été. Éyong Jehôva a nga dzô Bisraelitas naa be bo angele té mewokh, Jehôva a nga kare fe be amu dzé be nga yiène de bo. A nga dzô be naa : « Amu éyôla dam é ne ébe ñea » (a lang Akôre 23:20, 21). Éyôla Jehôva é mbe « ébe » Yésu amu naa, éñe a kobe évang Jehôva ye fe naa, éñe a ne é môr a dang tebe ôsu nfa a sukh éyôla Ésaa asi ye fubu de.

« A TAT, LUGHE ÉYÔLA DUÈ »

9. Nté mbé éyôla Jehôva é mbe éban akal Yésu ? Vakh ayilgha.

⁹ Aval ane bi ndaghe de yen ôyô, éyôla Jehôva é mbe édedaa éban akal Yésu amben kaa naa, a so a si va. Biaa yaghane ki naa, é dzam ésese Yésu a nga bo éyong a mbe a si va, é mbe é laran ya éyôla Jehôva ! Éyong a mbe amanegha ye ésèñ minkanghle dèñ, Yésu a nga luè ñe ôyap ôyô é dzô naa : « A Tat, lughe éyôla duè ». Étéñ té ébién, éde Ésaa a nga yalane ñe ya mura king dé bam a dzôp été, naa : « Me lugheyang do, ma ye fe da bera lughe » (Jean 12:28).

10-11. (a) Za aval Yésu a nga lughe éyôla Jehôva ? (A daghe fe évaghle). (b) Amu dzé ba yiène fubu éyôla Jehôva ye kamane do ?

¹⁰ Yésu a nga lughe fe éyôla Jehôva. Za aval ? Aval évoo a nga bo de, a ne é lere é mbemba mefulu Ésaa wèñ ngalane mimboane mièñ akal é bôr bevoo. Ve, a kuane naa mam mefe me ngen ma dzeng nfa ye naa a lughe éyôla té. Be nga yiène fubu éyôla Jehôva ye kamaneb fe éwôgha dèñ. Yésu a nga lere abim avé dzam té é mbe éban éyong a nga yeghle betông bèñ aval ba yiène yaghlan. A nga dzô naa : « É Tare waa a ne a dzôp été, boghe naa éyôla duè é tobe nfufup » (Mat. 6:9).

¹¹ Amu dzé ba yiène fubu éyôla Jehôva ye kamane do ? Amu naa, éyong bia bera daghe é dzam é nga boban ô mvus afup Edén, Satan a nga biane ye ve Jehôva Nzame mvin. Satan a nga dzô naa, Jehôva a mbe n’nenaa ye naa, a mbe é tep Adán ba Eva é dzôm é mbe mvèñ akal deba (Atar. 3:1-5). Satan a nga dzô fe naa, aval Jehôva a mbe é bo mam déé mbe ki sôsôe. Minaa Satan a nga kobe alé, mi nga name faa éwôgha Jehôva, nge ki éyôla dèñ. Ôsu, melu Job, Satan a nga dzô naa, é bôr ba sèhane Jehôva, ba bo de fave amu é mam ba ñong ébe ñe. Ôsu vaa, éde n’nenaa té ô nga dzô naa, moan môr ézing aa dzing ki Jehôva ya bebela aval da ve naa amben mindzukh été, a tsini naa a sèhane ñe (Job 1:9-11 ; 2:4). Tam é nga kuiñ naa be lere za a mbe n’nenaa, ye Jehôva nge ki Satan.

« MA TEP ÉNING DAM »

12. Za dzam Yésu a mbe nkoghane naa a bo amu édzing dèñ akal éyôla Jehôva ?

¹² Amu édzing dèñ akal Jehôva, Yésu a nga kômô bo é dzam ésese a mbe bo naa, a fubu ye kaman éyôla Jehôva. Yésu a nga dzô naa : « Ma tep éning dam » (Jean 10:17, 18). Ôwé, a mbe fe nkoghane naa a wu akal éyôla Jehôvac. É boan be-bôr ôsua Adán ba Eva, be mbe kaa ékop, ve, be nga lum Jehôva mvus ye top é ngam Satan. Nfa wèñ, Yésu a mbe nkoghane naa a zu a si va ye lere édzing dèñ akal Jehôva. Yésu a nga bo de, é ning aval é ne sôsôe kaa bo ékop (Behéb. 4:15 ; 5:7-10). A nga baghle é sôsôe dèñ ya ke kuiñ awu dèñ, nkum mindzukh ayô (Behéb. 12:2). Aval té, éde a nga lere édzing dèñ akal Jehôva ya éyôla dèñ.

13. Amu dzé Yésu a mbe é môr a nga yiène nfa ya lere naa Satan éñe a ne n’nenaa ? (A daghe fe évaghle).

¹³ É mam mesese Yésu a nga bo éning dèñ me nga lere naa, Satan éñe a ne n’nenaa se ki Jehôva ! (Jean 8:44). Yésu éñe a dang yem Jehôva a lôr é bôr besese be ninghang a si ye a dzôp été. Éde, nge moan dzam ézing é mbe bebela ébe é mam Satan a bôr Jehôva, Yésu a mbe de yem. Ve, Yésu a nga tebe naa bip nfa ya kaman éyôla nge ki éwôgha Jehôva. Amben éyong é nga yene ane Jehôva a lameyang ñe, Yésu a mbe nkoghane naa a wu, ndaane naa a lume ndzidzing Ésaa wèñ mvusd (Mat. 27:46).

« ME VA [. . .] MAN ÉSÈÑ Ô NGA KEE MA »

14. Aval avé Jehôva a nga boran é sôsôe Yésu ?

¹⁴ Meyaghlan a nga bo alu kaa naa a wu, Yésu a mbe dzô naa : « Me va [. . .] man ésèñ ô nga kee ma naa me bo. » A mbe a bele mebun naa Jehôva a ye boran é sôsôe dèñ (Jean 17:4, 5). Mebun Yésu a mbe a bele ébe Ésaa, méé mbe ki zeze. Jehôva éé dzi ki ñe lame a song été (Bisè mintôl 2:23, 24). A nga wômô Yésu ye ve ñe étéñ da dang ôyap yôp a dzôp été (Beph. 2:8, 9). Asughlan, Yésu a nga djié ane kéza ye Édjié Nzame. Za mam Édjié Nzame da ye bo ? É ngap bèè ye meyaghlane Yésu da dzô bia naa : « Édjié duè é zakh. Nkômane wiè [éwi Jehôva] ô dzalban, a dzôp été, ya fe a si va » (Mat. 6:10).

15. Za mam mefe Yésu a ye bo ?

¹⁵ Melu ma zu, Yésu a nkune lumane minzizing Jehôva ye mane wiñ mbimbia be-bôr Armagedón (Mel. 16:14, 16 ; 19:11-16). Ôyôm tam ôsu vèè, a ye wua Satan « édoa ébéñ » été, da yili naa étéñ daa ve naa éé se ki fe bo dzam ézing, édi da fônan awu (Mel. 20:1-3). Yésu a ye bera ve boan be-bôr mvoa ye éning é ne kaa ékop, é tam Édjié toyini a mimbu dèñ. A ye wômô bewu. A ye ve naa si ése ngura é bera bo paraíso. Nkômane Jehôva wa ye dzalban ! (Mel. 21:1-4).

16. Éning da ye fônan a dzé éyong Édjié toyini mimbu da ye kuiñ amanegha ?

¹⁶ Éning da ye fônan a dzé éyong Édjié toyini mimbu da ye kuiñ amanegha ? Nsem boan be-bôr wa ye man, baa ye ki fe bo bôr a bikop. Boan be-bôr baa ye ki fe dzaa naa minsem mieba mi tobe ndjiane ngalane ntang ; daa ye ki fe bo éban naa môr ézing a ve naa be bele élar ya Nzame nge ki naa be bele befara. Ye naa, « nzizing wa sughlan, awu [da so ébe Adán], daa ye ki fe bera bo ». Mesong ma ye bo bikukuèñ. Bewu ba ye wômô. Môr ézing aa ye ki fe bera bo bikop (1 Becor. 15:25, 26).

17-18. (a) Dzam avé da boban amanegha ye Édjié toyini a mimbu ? (b) Za dzam Yésu a ye bo éyong é tam édjié dèñ da ye man ? (1 Becorinthien 15:24, 28). (A daghe fe évaghle).

¹⁷ Dzam avé éfe da boban amanegha ye Édjié toyini a mimbu ? Tam té, ngura aval dzam ézing da ye boban. Môr ézing aa ye ki bera bele bisô naa Jehôva a ne nfufup ye é Nzame a ne sôsôe. Za aval ? Afup Edén été, Satan a nga dzô naa Jehôva a ne n’nenaa ye fe naa, aa djié ki boan be-bôr ya édzing. A sum ye tam té, be va fubu éyôla dèñ abuiñ biyong ngalan é bôr ba kang ye ve ñe ngang. Éde, amanegha ye Édjié toyini a mimbu, éwôgha Jehôva da ye tugha mane tobe nkaman. A ke kuane a lereyang naa, a ne ndzidzing Tare waa a ne a dzôp été.

¹⁸ Amanegha ye Édjié toyini mimbu, môr ase a ye yem naa é mam mese Satan a nga dzô nfa Jehôva me mbe minaa. Za dzam Yésu a ye bo éyong tam édjié dèñ da ye man ? Ye a ye béé éfônane Satan ye tebe Jehôva é ngam ayat ? Momo ! (A lang 1 Becorinthien 15:24, 28). Ya n’nem ôse, Yésu a ye bulan Ésaa, Édjié. A ye yebe édjié Jehôva. Ôwé, kaa naa a vu éfônane Satan, Yésu a yebe naa a likh mam mesese amu édzing dèñ akal Jehôva. Ye naa, asughlan éyong ba ye wiñ Satan, éyôla Jehôva da ye lighe nfufup ya nkaman.

19. Za ayilgha éyôla Jehôva é bele akal Yésu ?

¹⁹ Biaa yaghane ki naa, Jehôva a nga kômô ve Yésu éyôla dèñ ! Yésu a nga tugha lere aval môr Ésaa a ne. Éde, za ayilgha éyôla Jehôva é bele akal Yésu ? Ébe ñe, da yili mam mese. A mbe nkoghane naa a wu akal éyôla té, ye fe naa, éyong Édjié toyini a mimbu da ye man, ya n’nem ôsese, a ye tobe nkoghane naa a bulane Jehôva mam mesese. Za aval bi ne vu éfônane Yésu ? Bia ye yalane nsili té ayeghle da zu.