Adán ba Eva be nga bo Nzame melo

Môs ézing, éyong Eva a mbe étam, ñô ézing é nga kobe ya ñe. É nga dzô ñe naa : “Ye é ne bebela naa, Nzame aa kômô ki naa mi dzi bibuma bi ye bilé bisese ?” Éde Eva a nga yalane naa : “Bi ne dzi bibuma bi ye bilé bisese, ô vèè ve évoo. Nge bi dzi ébuma ye élé té, bia ye wu.” Ve, ane ñô é nga dzô ñe naa : “Miaa ye ki wu. Bebela a ne naa, nge mi dzi ébuma ye élé té, mia ye bo ane Nzame.” Ye dzam té é mbe bebela ? Kaa, é mbe minèè. Ve, Eva a nga bunu de. Amu a mbe é bira daghe ébuma ye élé té, éde a nga kômô de dzi. A nga dzi ébuma ye élé té, ye ve fe de Adán. Adán a mbe é yem naa nge be bo Nzame melo, be nga ye wu. Ve, Adán a nga dzi ébuma ye élé be nga kîlî be.

Ôyôm tam ôsu vèè, môs té, Jehôva a nga kobe Adán ba Eva. A nga sili be amu dzé be nga bo ñe melo. Eva a nga ve ñô bidzô, Adán ñe ki a nga ve Eva bidzô. Amu Adán ba Eva be nga bo ñe melo, éde Jehôva a nga tsirane be afup Éden. Nfa ye naa be taa vaghle bera ñii été môs ézing, éde a nga tele bangele ye môra zoa ôkeng é bele nduan, añii ye afup Éden.

Jehôva a nga kiagh fe naa a ye fe ve é môr a nga dukh Eva, akira. Éé mbe ki ña ñô éde é nga kobe ye Eva. Jehôva éé dzi ki likh naa beñô be kobe. A mbe mbia angele éñe a nga ve naa ñô é kobe. A nga bo de naa a dukh Eva. Angele té, ba luè ñe naa, Satan, Debele. Melu ma zu, Jehôva a ye wiñ Satan. Aval té, aa ye ki fe bera dukh boan be-bôr nfa ye naa be bo mbia be-mam.