Abrahán ba Sara be nga bo Nzame mewokh

Kisoan ézing é too éyôla naa Ur é mbe bébéñ Babel. Kisoan té, bôr béé mbe ki bé kang Jehôva, ve be mbe bé kang abuiñ benzame befe. Ve môr ézing a mbe é ning a Ur, é kang fave Jehôva. A mbe éyôla naa Abrahán.

Jehôva a nga dzô Abrahán naa : “Kôrôghe é nda duè, mina é nda-bôr duè, ye ke é si ma ye wô lere.” Ane Nzame a nga kiagh ñe naa : “Wa ye bo môra ayong, ye naa, ma ye bo bôr besese be ya si mbeng akal duè.”

Abrahán éé mbe ki é yem é vôm Jehôva a mbe é lôm ñe, ve a mbe a bele mebun ébe ñe. Éde, Abrahán, ngal wèñ Sara, Taré nge ki Téra ésaa, ye Lot é moan-kaa wèñ, be nga bo Nzame mewokh, ane be nga mane kakh mimbagha mieba ye sum ékena é nga ye bem.

Abrahán a mbe a bele mimbu 75 éyong a nga ke siène ye é nda-bôr dzèñ é si Jehôva a nga kômô naa be yen. Si té é mbe éyôla naa Canaán. Vèè, Jehôva a nga kobe ye Abrahán ye bo ñe é ngiagh ñi : “É si sese ô tèè ñi, ma ye de kee é boan buè.” Ve, abong té Abrahán ye Sara be ntoo min’nôm, ye naa, béé mbe ki be bele boan. Éde, aval avé Jehôva a nga ye dzale é ngiagh dèñ ?