Kié, moan a sohang !

Abong té é ntoo abuiñ mimbu ave Abraham ba Sara be nga lughan. Be nga likh é mbemba nda be mbe be bele a Ur, naa ba ke ba ning bibem été. Ve, Sara éé dzi ki vaghle kè môs ézing, amu a mbe a bele mebun ébe Jehôva.

Sara a mbe é bira kômô bele moan, éde a nga dzô Abraham naa : “Nge mbo-ésèñ wom, Agar a byè moan, me ne ñe ñong ane é moan wom.” Ye tam, ane Agar a nga byèñ moan. Éde a nga yô ñe naa, Ismael.

Abuiñ mimbu ôsu, atoo naa Abraham a mbe a bele mimbu 99, Sara ñe a ki mimbu 89, bôr belal be nga zu be fep. Éde Abraham a nga bane be naa be zu wèèghan élé asi, ye ve be bidzi. Ye wa yem beza be mbe bôr beté ? A mbe bangele ! Be nga dzô Abraham naa : “Mbu wa zu wi, é tam ñi, wa ye ñu-ngal mia ye bele moan.” Sara a mbe é bèè nté be mbe bé kobe, a too ébem été. A nga wuèñ n’nem wèñ été ye tem naa : “Ye me ne faa bera byèñ moan, atoo naa me ntoo aval édedèè n’nôm di ?”

Mbu ô nga zu vèè, ane Sara a nga byèñ moan fam, fave aval Jehôva a nga kiagh de ngalan é bangele bèñ. Abraham a nga luè moan té naa Isaac, é dzam da yili naa « luèñ ».

Éyong Isaac a nga kuiñ mimbu mitan, Sara a nga yen ane Ismael a poghe ñe. Amu a mbe é kômô kamane ndôma dzèñ, éde a nga ke yen Abraham ye sili ñe naa a tsirane Agar ye Ismael. Ôsusua, Abraham éé dzi ki kômô bo dzam té. Ve, Jehôva a nga dzô Abraham naa : “Bèèghe Sara. Ma ye fe kale Ismael. Ve, a ne ngalane Isaac éde ma ye dzale é ngiagh me nga bo wa.”