É templo Jehôva

Éyong Salomón a nga tebe ane kéza ya Israel, Jehôva a nga sili ñe naa : “Dzé wa kumu naa me ve wa ?” Éde Salomón a nga yalane naa : “Me ne étong, maa be ki tugha yem a bo mam. Éngôngoo va ma fakh naa me yem a kale ayong duè.” Jehôva a nga dzô ñe naa : “Amu naa ô dzaa ma fakh, ma ye wa bo é môr a dang fakh éning ése ngura, ma ye fe wa ve abuiñ akum. Nge ô tugha ma bo mewokh, wa ye fe ning ayap.”

Salomón a nga sum naa a long templo nge ki temple. A nga belan a kông, miang, mebam, ya mekoa. Bizukh befam ya binenga éba be mbe akeng ébe ésèñ melong be nga zu vole a bo ésèñ. Be nga long templo tang mimbu zangbwa. Éyong té, ane é môs be nga kee Jehôva templo é nga kuiñ. Ya dzam té, éde be nga ve metungha altar ôyôp. Salomón a nga kur mebong altar ôsu naa a yaghlan é dzô naa : “A Jehôva, wa yiane é templo a ne n’nen ya mbeng a lôr éñi. Ve éngôngoo yebeghe ôlughu wèè ya meyaghlane mèè.” Wa tem ya, ye Jehôva a nga yebe templo, ye bèè fe meyaghlane Salomón ? Niène Salomón a nga mane meyaghlan, nduan é nga so a dzôp été, é nga mane min metungha me mbe altar. Aval té éde Jehôva a nga lere naa a yebe templo. Niène Bisraelitas be nga yen do, be nga tobe mevakh.

Kéza Salomón a nga bira bele éwôgha Israel ngura, ya mevôm me mbe ôyap, amu a mbe a bele abuiñ fakh. Bôr be nga ke naa ba ke ña yen, naa a vole ba kôm mintsiè be mbe be bele. Amben kéza minenga ya Sheba a nga ke ñe fep, naa a ke ñe a vakh ya minsili mina ayèñ. Niène a nga wokh biyalane Salomón, ane a nga dzô naa : “Maa ve yebe é dzam bôr be nga kare ma, ve éndagha ma yen naa ô ne édedèè fakh a lôr abim be nga kane ma. Jehôva é Nzame wiè, a ve borane wa.” Israel éning é mbe édedèè mbeng, bôr be mbe fe mevakh. Ve mam me nga ye tsen avitsang tam ôsu vèè.